ليلة من العمر

البارت التاسع والعشرون

كام البيت ماينطي مجال من الخطار
الجيران كلهم اجو اصدقاء جدي وعمي حتى اصدقاء اوس
اول مره اعرف ابو دم البارد هذا عنده اصدقاء
وبعدين بلشت العشيره ..

متجمعين والبيت خبصه
الي عرفته انو ذوله بيت عمامي
يعني اخوان جدو وجهالهم واحفادهم والسلاله الكريمه مالتهم
وجوي ناس اول مره اشوفهم
ويبووو تعال عرفهم علية وهاي فلان بنت فلان الي صار وياها فلان شي
واكره شي ديصير بحياتي
وكل وحده تكعد تستنتج اي تشبه امها
والخ دكول عيون ابوها صدقه لله
وبالاخير اكتشفت والدي الله يرحمه عيونه خضر !!
شون اشبه عيونه مادري
البيت جان خبصه فعلياً وبس جان على ايدي اني وخاله هاجر وبنان
الخواتين الي اجو كل وحده ساحبه نفسها وكاعده اطك حنج
دكول صارلهم قرن ممسولفين
واللي اعرفه هما جايين زيارة لمريض مفروض يجون شوي ويروحون
رحم الله من زار وخفف ..
ويانه ابن عمهم الصغير هيج يطلع اصغر من بنان جان هو يجي يقدم وياخذ الماي والجاي
وبنتين من بناتهم جوي بس كعدو هيج شمعات فگر
رحت يم خاله هاجر وهمستلها:- خاله
هاجر:- ها خاله
بيلسان:- ذوله راح يباتون؟
باوعتلي وهزت براسها بأي
فتحت عيوني على وسعهن:- وين هو وين يكفي كلهم
هاجر:- لا مو كلهم بس بيت عمج كريم وخليل
بيلسان:-اي ماخليتي قصور هما بس جهالهم بعدال عشيره
هاجر:- مو هما ذوله لأن بيوتهم مو هنا
بيلسان:- فـ لازم يلبدون
هاجر:-اي بالضبط
هزيت بيدي فاتت عمه نعمة
نعمة:- ها شكو
هاجر:- اريد قيس يجي حتى يوديني للبيت نجيب فراشات خاف ميكفي
نعمة:- لا يمعوده شون مايكفي هو بس عمو خليل راح يبقى
هاجر:- ها كريم يرجع ؟
نعمة:-اي هو ومرته راجعين اعتقد

رحت اغسل بالمواعين انا وبنان
هلكنا كل شويه نغسل وهم مايخلصون
راحو عائلتين
احس شوي ارتاحيت نوعاً ما
ولو هم بعد خبصه
صح احب الخطار وهيج يعني
بس هالاجواء اول مره علية تمر
كل الي شايفتهم اني بيت عمامي الثنين وكل واحد عنده فد ثلاث جهال ومكتفي بيهم
اما ذوله!!!!
كل واحد عنده فد درزن ولد ودرزن بنات
ونص الولد مزوجين وعدهم درزن جهال
وحاله يرثى لها صراحة ..

شويه ودخلوا قيس واوس للمطبخ يتمضحكون
اوس:-دكافي شلحيت
باوعنالهم ..حجت خاله هاجر:- هاي شبيكم
حجا قيس وهو كوه من الضحك
قيس:- سعدون ابن علاء تفل بنص استكان عمو خليل
هاجر:-لااااااا
قيس:- اي والله وذاك شربه
اوس:- لاااا جذب
قيس:- وعيونك ياحبيبي
ضحكت ماكدرت ومنظر قيس ضحكني اكثر
اوس هم جان ديضحك
هاجر:- ولك دسكت لحد يسمعك هسه يحسبوك انت التفلت
قيس:- لو قريب منا غير
ندارت عليه عمة نعمة:- شتسوي يعني
قيس:- ماقصر والله
طكيتها بضحكه ماتحملت
اباوع اوس ديباوعلي ومنتجي ايده عالميز
ومبتسم طرف ابتسامه
خجلت واحس الدنيا حمت يمي
همزين بلحظتها مادري طلبت مني خاله هاجر اجيب شغلة من المخزن
رحت اجيبه
رجعت للمطبخ واكفه خاله هاجر وياهم يم الباب
هاجر:- اصعد انت واوس جيبو الفراشات من فوك عمامكم ثنينهم شكلهم راح يبقون
دخلت عمه نعمة وبيدها جهالها
نعمة:- يلا احنا نترخص
هاجر:-ها وين ؟...تروحين؟
نعمة:- اي مو مال ابقى هو البيت خبصه
كلت بگلبي رحمة الله والديج هما كلهم بكفه وانتي بكفه يمي وماجاي تنبلعين
والحمدلله طلعو وراحوا
وقيس واوس صعدو يجيبون فراشات
صعدت وياهم حتى اساعدهم
جانو بغرفة الفوك مخلييهم
مسفطيهم فوك الكنتور
جان اوس صاعد ينزل وقيس وبنان ينزلون بيهم لجوا
اخر شي سحب قطعه ثكيله اوس ونزل هو ينزلها لجوا
انا هم مادري شخطر ببالي
وشفت كرسي سحبته وكلت اصعد انا هم انزل
مادري ليش اتدخل بس جان عاجبني
شو فززني صوت اوس يصيح
اوس:- شداتسويييين
بيلسان:- يمة بسم الله خرعتني
اوس:- دنزلي بله انزلي
بيلسان:- اوكف بس اجيب هاي
اوس:- انزلي داكول
بيلسان:- اي اييي
ماسمعت منا بقيت داسحب بالقطعه ماحس غير يلزمني من خصري قوي وينزلني
جسمي تكهرب ..
احس لزمتني صاعقه من فوك لجوا
صار وجهي بوجها وبعدها ايديه على خصري
حجا وهو عيونه حدّت علية وبصوت خافض
اوس:- اسمعي الكلام من احجي
بيلسان:-شـ شـ ...بـيـ...
كمت امتمت كوه يطلع الحرف
الحرارة كامت تطلع من وجهي ..
سمعنا صوت قيس جاي
فز وبسرعه عافني وخر مني
ركض طلعت من الغرفه ورحت لغرفتي
دخلت وسديت الباب بقوة من التوتر
خليت ايدي على گلبي
سرعته عبرت
يا امييييي هاي شديصير
خليت ايدي على وجهي احمررر صخنت
ربي شنو هالشعور
رجعت خليت ايدي على گلبي
كافي كافي كافييييي ابوس ايدك كافييي
شديصيررر ..
مادري شكد بقيت بالغرفه اروح واجي من التوتر
ومستحيه اطلع واتقابل وياه
لحد ما اخذت نفس طويل ..غمضت عيوني طردت كل الافكار
وطلعت ...