ليلة من العمر

البارت الثامن والعشرون

هاجر:-ولك احجييي شصاار
نباوع عليه وننتظره بس يحجي گلبنا راح
قيس:- ضاربتها جلطه بالدماغ
لطمت على وجها وانا كعدت عالكرسي مابعد يحملني طولي
هاجر:- جذاب..قيس لاتلعب علينا هاللعبه
قيس:-والله شبيج
بيلسان:- و وينها يعني شديسوون هسه وشصارلها
قيس:- مادري مادري
هاجر:- شنو ماتدري غير تفهمنا شصار
سكت ماحجا شي
وجهه ابد ماجان مالشقة وهو هذا اللي اكدلنا اكو شي مو زين
تقربت عليه خاله هاجر وكلتله هي وتضرب على صدره
هاحر:-ولك احجي لاتلعب بگلوبنا
دفعها وكال بصياح
قيس:-شحجييييلج ..خطررةةةة خطرة بالعنايه المشدده هي
كللنا الدكتور منا ليومين اذا ماعدت الخطر توقعوا كلشي
صفنت بي ودموعي وحده ورا الخ
هاجر:- شنو يعني توقعوا كلشي
قيس:- يعني شنو بربج
يعني توقعوا كلشي
كعدت خاله هاجر وكامت تبجي
قيس وجها يخوف
جنت داصبر نفسي اكول ديجذب ويشاقه نفس اطباعه
بس وجها ماطمني ابد
سحب كرسي وكعد لزم تلفونه
هاجر:-ابوك واخوك هناك
قيس:-اي
هاجر:-جدك وين؟
قيس:-هم هناك
باوعتلي تبجي وانا كوه لازمه نفسي ما اشهك وابجي
بسرعه عفتهم وصعدت للغرفه
اختنكت فد مره
اكره احساس الفقد ..هيج احساس لزمني
مكرووووووه واحس بخنكه
كمت ابجيييييي واتخيلها اول ماجيت لهنا
هي اول وحده حبيتها واول وحده دارتني واهتمت بيه على الرغم جنت جبيره مو طفله
ابجي بحركةةةة واناشغ
بحيث راسي كام ياذيني واذاني تون
شوي وسمعت صوت حجي جوا
نزلت لكيت عمه رحمة جايه وتبجي هي هم وكاعدة يم بيبي
لحظات واوقات جانت مكروها وتنغز الگلب
حسيت فعلا بحلم ..حلم اتمنى يخلص
مهما جان الشخص حتى لو مو مقرب من عدنا
بس احساس فكرة الفقد انك مابعد راح اشوفه تعصر گلبك
فما بالك بشخص مقرب عليك؟!
هيج لو بيدي اريد امشي الوقت عالسريع واريد اشوف شراح يصير بالاخير ..

مرت ست أيام
ست أيام مُرييين كلش
عبرت اليومين الخطرين وكال الدكتور ننتظر يومين الخ وكأنو ديلعب ويانه واحنا روحنا مفرفحه على أي خبر منا
قيس يجي يجيبلنا الاخبار او زوج عمتي رحمه مرات يجي
اوس وعمي محمد وجدو ولا شفناهم من يوم الحادثة
عمه نعمة جتي هي وجهالها والخبصة والهوسة اللي صايرة زايده الطين بله بوضعنا
وخاله هاجر وبنان هم باقيين يمنا
وانا من ثاني يوم لزمني صداع وصوتي كوه يطلع
كلتلي خاله هاجر تمرضتي من يوم البقيتي برا
حتى ماما ماكدرت احجي وياها صوتي كوه يطلع وراسي كوه اشيله يوجعني حيل احجي وياها على كد ما انطيها الاخبار وهذوا
وتفكير وصوت الجهال موتني
هيجي توترت توتر ماصاير ابد
بحيث صاعده بغرفتي بس هم احس هيج مثل المسامير ادك براسي
احاول انام ماكدر من اليوم كله لو انام ثلاث ساعات لو ماكو
انا بعادتي من انقهر من اضوج من اكو شي ببالي ماكدر انام لو على ذبح ركبتي
ماكدر عيوني تبقى مفتوحه حتى لو جنت مريضه ماكدر حتى اغفي
كوه جنت اناملي ساعتين ثلاثه واكعد افز ويه الصداع ..