ليلة من العمر

البارت الواحد والأربعون والأخير

فتحتها وانا ايدي ترجف وكل حواسي متوقفه
حتى عيوني مغووشه
اوس:- مرحبا ... شي غريب انو ابدي كلامي وياج بمرحبا مو صح بس تصدكين برغم شهادتي الاولى عالقسم وعلى دفعتي ورغم الكل يحلف بيه باسلوبي
بس صارلي ساعتين ونص بالضبط صافن بالاحرف ماعرف شكتب او شنو لازم اكتبلج
او تدرين خليني اعتذرلج
اعتذرلج على كل لحظه جنت بعيد عنج بيها
عن كل لحظه عصبتج وقهرتج ولو شوي وخليت مجال للكره بقلبج اتجاهي
اعتذر عن اللحظه اللي انزرعت نبضه بقلبي اول مره الج وماصارحتج بيها ، عن كل لحظه حبيتج وماجنت اكولها وعن كل الكلام اللي جان لازم اكوله وماكلته
عن اللحظات اللي تمنيت احضنج بيها وماكدرت وعن اللحظه اللي جنتي مقهوره وماكدرت اخفف عنج
اعتذر عن كل لحظه ماكتلج بيها شكد وجودج مهم وهواااي مهم وشكد سعادتج تعنيلي وضحكتج تخصني
كلشي بيج يخصني بس ضحكتج الها مكانه مميزه ،
اني ادري بيج شكد صعبه هالايام عليج بس ادري بيج قوية وراح تتجاوزيها
ادري بيج مريتي باصعب وحسيتي باصعب
وفقدتي الاصعب واغلى ..اكيد ماراح تكون صعبة عليج نسياني وتجاوزي
اريد توعديني بشي واحد انو تهتمين لدراستج ومستقبلج صنعي بنفسج شفتي شكد البشر مايفيد ؟
حتى الشخص اللي يحبج ويموت عليج ويدفع عمره علمودج ...
هم مايفيد !!
والله حاولت لاتظنين تركتج بسهولة بس هالدنيا ضدنا حاولت بكل مابيه وماريد ابرر لان تبريري هسه ماراح يفيد بشي بس تأكدي
تأكدي مليون بالمية انو احبج وحبيتج بس كلشي جان ضدي اولهم انتي! ،
اريد توعديني وعد بيلساني لأوسها وعدنا اللي مايجي بقوته انو ماتاخذين المهدئات ولا توصلين روحج للمستشفيات ماتأذيلي روحج خوش؟ ،
رحتي من يمي وروحتي روحي وياج
شكرا لان مريتي بحياتي وراح تبقين رغم عن روحتج
احبك يا صاحب احلى ضحكة
يا ادفئ روح سكنت بيه ..
دزها واخر شي دز اغنية ياناس

كلشي ماحجيت اباوعلهم ملتهيين
اخذت التلفون وصعدت فوك ..شغلت الاغنية ..نهديت
لاول مره من بعد موتت نورهان اصعد للغرفة الفوك
الغرفة اللي جانت مفتوحه بس بعمرنا ماطخيناها انا وماما من بعد ذاك اليوم ماجان يجي من گلبنا
بابا الوحيد اللي دخلها وصبغها بوقتها ..
دخلتها وانا جسمي كله ينتفض
عتمه ومابيها كهرب
وكفت بالنص وقفلت الباب
جانت كلها خشب وغراض قديمة
لزمتهم وماخليت شي على حاله خاف جانت مرتبه كله خربطه وكسرته
اريد ابجي اريد اصرخ اريد اكتلني ماكو اي فايده
بقيت اكسر واكسر بالغراض
اطلع حرگتي بكلشي كدامي
محد حس علية لان الغرفة بعيده ونفس السبب اللي خلانا مانحس على نورهان لمن اختنكت
جنت منفعله واتصرف بحرگة اريد روحي تبرد
اريد اي شي يبردني ماكو روحي جاي تحترگ لاول مره احس بهالشعور
كمت اضرب بالغراض بكل قوتي وانهديت بيهم ماخليت شي عدل كبالي لحد ما دخلت خشبه بيدي جرحتني ..
هي دخلت وانا صرخت صرخه
لا حسيت روحي طلعت مو صرخه عاديه
حسيت انفاسي الاخيرة وروحي وقوتي وطاقتي وكل ايامي الفاتت طلعت بالصرخة ..
وكعت من طولي وبجيت
وجع سنين طلع مني بهالبجية ..
بجيت وانا مهدود حيلي مابعد بيه اتحرك
كلشي وكع من ايدي
كل حرف بالرساله يدك بگلبي
والاغنية تضرب بيه باقوى ماعدها
حسيت انو اي هاي جانت النهاية
وانو هذوا كلشي انتهى لدرجة رجعت للتلفون حضرته ولغيته ومسحته من كل مكان ومن كل حياتي على امل اكدر امحيه منها بشكل كامل!!
من لوبة روحي جنت كارهه كلشي
حتى هو اي كرهته!
كرهته كره بحيث تمنيت گلبي يوكف بهاللحظه هاي واموت حتى لا ابقى اكرهه
لا ابقى احمله شي بگلبي انا ماريده
كرهته لدرجة دعيت عليه ..دعيت ورجعت دعيت على روحي
دعيت الله ياخذني ولا ابقى بهالنقطة اللي وكعت بيها ...
بقى بيه مستشفى لو مهدئات؟ ..يريدني اوعده ما أذي روحي؟
كلشي مر بفاتحة ابوية
عشت اقاسهم ..عشت شهر كامل بلياليه بالمستشفى من ثاني يوم استلامي لرسالته الاخيرة!
الدكاترة احتاروا ..اسمعهم يگولون لخالتي والله ماندري شبيها
اريد اگللهم انا ادري!
انا ادري شبيه والله بس مايفيد لان مابيه علاج
هسه لو يگلولي نرجعلج اوس؟ ..ارفض واگول ماريد
وجعي مو لأن هو عافني ...الموضوع اكبر واعقد من هيج
الموضوع موضوع خذلان ..موضوع جذبة جنت عايشة بيها لاايام وانا مادري
موضوع غلطة وكسرة دمرت كلشي وشوهت حياتي بعد ماحاولت ابنيها
تفصيلة صغيرة ومهمة خلتني احس وكأن حياتي مرت كلها
بليلة وحده!! ..ليلة من العمر وحده
دائما لمن ابقى لوحدي بالليل بين حيطان غرفة المستشفى أسال نفسي هو شنو جان لازم اسوي وماسويته حتى لا اوصل لهالمكان؟
المؤذي ان السبب مو سببي ..ولا اكدر ابقى لايما ابوي اللي حتى هو تركني وراح!!