ليلة من العمر

البارت الواحد والعشرون

اوس:- شصار
اسيا:- اسكت وخليها
صعدنا عالسريع ..باوعلنا صافن:- دحجوا شصار
كمت اضحك مابعد اتحمل
يباوعلي مستغرب ..باوعتله عمتي:- تمنيتك هناك وتشوف اللي شفناه
اوس:- شنو شفتو
اسيا:- شنو لسان شنو اسلوب
شنو مكياج وترتيب يمةةةة واكع وكعه قيسان
اوس:- هسه شعلية اني من مكياجها لو ترتيبها ..المهم تفاهمتوا وياها
بيلسان:- هو نحنا حجينا وحاولنا نوصللها الموضوع
اسيا:- اي وانتي جيتي طكيتي بوجهه وبعرتيها
اوس:- هاا مو كلتلكم راح تبعروها
بيلسان:- لالا شنو ..شوفي انا ماحب نبقى نلف عليها
وبالاخص هي ابد مو هينة مبينه عليها ومفتهمه علينا ليش جايين وشنو نريد
ف ماكو داعي نسوي هيج ..حجيتلها السالفة وهذوا
باوعلي:- شنو كلتيلها
اسيا:- كلتلها الولد مايريدج
باوعلي:- عاشت ايدج ..هيج راسا
باوعتله وفتحت عيوني:- ماتحملت ماتحملت
حك بلحيته وهز براسه:- الله يستر
اسيا:- لا البنية تفهمت كلتلها مانريد نوصل الموضوع للكبار لان ماراح يصير خير لا الج ولا لقيس
بيلسان:- صدك ماحجيتوا شي ويه قيس
اوس:- مادري وينه من يوم الجمعة هو ماكو اجا للبيت خمس دقايق وطلع متعارك ويه امي
اسيا:- امك كلش ضايجة منا تره
اوس:- اوووف اوف
حجاها وندار شغل السيارة ومشى
من وصلنا البيت اللتيهنا بس احس السالفة بعدها براسنا دادك
وبس يصير مجال راسا نحجي بيها انا وعمتي
التهيت لليل من جيت انام
فتحت تلفوني حتى ادز رسالة لاوس اكله باجر مامداومه ماعندي شي لكيت جايتني رسالة من هذا الولد
من العصر دازها لمن جنت دابدل!
فتحتها كاتب:- اي شونج بالجامعة تاقلمتي لا
كتبتله:- الحمدلله يعني مو هواي
ماجنت اعرف انا شنو داتصرف او هالشي صح لو غلط
جنت على عماية ومو متقصده او ببالي شي
عشت طول عمري ماجان عندي تلفون وماعرف بهالسوالف
لهذا هيج اشياء مافتهمتها بالبداية!! ..
راسا شافها ..شنو كاعد عالتلفون هذا؟
كتبلي:- هي بس بالبداية ميخالف شوي شوي تتعلمين
بيلسان:- اي صحيح
يوسف:- موادكم شونها صعبة سهله
بيلسان:- يعني اكو مواد صعبة كلش واكو لا
يوسف:- المحاسبة اغلبها رياضيات تحتاجين شي تره اني موجود ابد لاتستحين مني
بيلسان:- شكرا ربي يحفظك ماتقصر
يوسف:- والله تره احجي جد ..بس تعالي تعرفين قسمي واني اشرحلج شنو ماتريدين
بيلسان:- شكرا
اويد انهي الحجي بعد ماعرف شون ..حسيته لزك بيه
بحيث كتبت شكرا وراسا طفيت النت والتلفون وخليت راسي عالمخدة ..
ثاني يوم ..ماداومت
ماجان عندي شي مهم ف مارحت
الصبح جنا كاعدين نحضر الغده ..قبل مايجي جدي
واكفين بالمطبخ وبيبي بالصالة ..مانشوف الا يدخل واحد بهجمة للبيت
باوعت من الشباك لكيت قيس جايينا ركض
بيلسان:- عمة قيس اجا
اسيا:- شنو هالجية
دخل للمطبخ راسا هجم:- انتو باي حق تتصرفون من كيفكم ..اني مو كلت محد يدخل
اسيا:- شبيك وشنو هالدخلة هاي فتت على زريبه
قيس:- دااااسالج داكلج باي حق رحتو تتصرفون من كيفكم بشغلة تخصني
اسيا:- غير تفهمني شبيك شكو
قيس:- رايحين لسهير وحاجيين وياها وكايليلها ماريدها وماعرف شنو
انتو منو حتى تتصرفون من كيفكم ها
تره شغلة تخصني ومحد اله علاقة بيه ولا بيها
اسيا:- اسمع لك ..انت ابنا وغصب عنا وعنك ندخل باي شي يخصك افتهمت لو لا
عاط:- لاااا محد اله علاقة بيه ولا يدخل بحياتي
عوفوني شون ماريد اعيش اعيش مالكم دخل انتو لاتحشرون نفسكم
اسيا:- انجب اتبسزز شنو هالاسلوب لاتعيط وحق الله ادججك
ضرب ايده عالميز بقوة:- ماااااريد احد يدخل بحياتيييي افهموها عاد يعني ليش توصلوني لحاله اشرد منكم وماشوفكم وجهي
خفت كلش منا جان نار
وخفت احجي شي او ادخل لان مو بحالة اترزل ابد
بس ماكدر اعوف عمتي لوحدها تصد هجماته
ادخلت وكتله:- نحنا ماسوينا شي مجرد رحنا تفاهمنا ويه البنية
باوعلي:- وانتو شعليكم؟
احد مشتكيلكم
اسيا:- اييي البنية جاي تروح لامك ورادت تروح لابوك
راااح تفضحك زماااال هاي اذا وصلت لجدك محد يخلصك منا تره
اجا اوس ديركض
جنت متنيته يجي عاد ومن شفته ارتاحيت
دخل ركض:- اصواتكم واصله لراس الشارع
اسيا:- تعال شوف اخوك قليل الحية
ضرب مرة الخ ايده عالميز بقوة:- دااااكلكم لاتدخلوووون بحياتي تره مو صعبةةةة هاااي
اوس:- قيس شبيك تصيح ..غير خايفين عليك لاتتورط بشي
قيس:- لحد يخاف علية عوفوني بحالي
اسيا:- وقزرقط مو وجه نعمة والقران فوك مانهتم بيك
قيس:- اهتمي بابنج المستهتر بالاول انتي
هو كال هيج عمتي راسا خنست وضعفو ريشاتها
انتبهت عيونها راسا دمعت
كلش ضجت منا بعد هالكلام هذا بااوعتله راسا وماخليت مجال لاحد يحجي وكتله:- وشتفرق عنه مو انت هم مستهتر
قيس:- انتي لاتدخلين
اشرلي باصبعه ..راسا اوس عوج ايده وضربه على صدره:- قيييس لاتلوص لا وقسم بالله تصير ماطيبة
خلي لسانك بحلكك واعرف شداتحجي
قيس:- مووو انت اللي تعلمني شنو احجي
اوس:- لا اني واكسر راسك همين
قيس:- ديلا حتى اعرف شون اربيك من جديد
تعالت اصواتهم ..دخلت بيبي للمطبخ وعاطت:- هيييييييي شنو هاااااي ..شبيكم مجلوبين وعما وقزرقط
حجتها وبسرعة تقربت منهم وفاككتهم ..دفعت قيس:- شبببيك شبيك جاي مدرعم اريد اخلص بس صلاتي بعد ماعرف
مد ايده اوس بوجهه:- اعلمك هاااا ..اني اللي تربيني من جديد مو
ندارت عليه:- وانت الااااخ ..اسكت ماسمع اصواتكم لا وكلام الله العظيم اكول لجدكم يربيكم ثنينكم مثل البشر
ندارت عمتي وراحت عالطباخ
اباوعلها عرفت ضاجت من بعد كلام قيس
ماعرف شسوي ..اباوعلهم واحد مخنزر بوجه الثاني وبيبي بنصهم
جليلة:- اذا ماتعقلون ياولاد محمد والله والله
والله احطكم واكتلكم ثنينكم مثل الجهال
كام يفوك بوجهه قيس:- بيبي من رخصتج
حجاها وطلع ..كامت تصيح:- اوووكف
ولا فاد سمعها بس طلع وماهتم
سحب كرسي اوس وكعد وديهز برجله
باوعتله:- شبيكم مجلوبين شصااار بينكم
اوس:- هيج سالفة بيناتنا
جليلة:- سالفة بيناتكم وجايين تتراعدون هنا
ماتحلوها بيناتكم نحنا شعلينا بيكم
اصواتكم واصله لاخر الدنيا وجيت عليكم واحد فايت بمعدة الاخ
جهال انتو جهاااال
اندارت عمتي ..انتبهت باجيه
باوعت على بيبي وگلتلها:- يمة كافي
خلص سدي الموضوع
عافتنا ودخلت ..رجعت باوعت لعمتي
ماتحملت رحت حضنتها كامت تبجي
بسرعة كام اوس واجا تقرب عليها ..باسها من جتفها:- امسحيها بوجهي عمة اعتبريني اني اللي كلتها وجيت اعتذر منج
اعذريه متعصب ومايعرف شديحجي هو هيج قيس
مسحت وجهه وباوعتله:- مازعل منكم انتو ولدي
انتو اللي طالعه بيهم من هالدنيا والله
سحبها لحضنه وخله راسها على صدرة
كمت ابجي على بجيتها
اوس:- وتدرين بينا نحنا هم شكد نعزج ومانتعبرج عمتنا كد مانعتبرج صديقتنا وامنا الثانية
اسيا:- اني غير خايفة عليه لايتورط بسالفة مو كدها
الا ليش راح اسوي كل هذا
اوس:- ادري وهو هم راح يدري بهالشي ..بس تدريه طايح الحظ
اسيا:- مصيره يرجعله عقله
واكفه كبالهم واباوعلهم وابجي
رفع راسه باوعلي ..ابتسم
قرب ايده من خدي ومسح دموعي
خجلت ونزلت راسي وبسرعة وخرت وكمت امسح بوجهي
باوعتلي عمتي:- وانتي ليش ماداومتي اليوم
بيلسان:- ماعندي شي
رجعت باوعت لاوس:- وانت الثاني ..روح ورا اخوك وراضيه يلا لايروح يسوي شي بنفسه
اوس:- منو قيس؟؟
قيس يسوي شي بنفسه؟ ..يحب روحه اكثر من اي شي بهالدنيا
اسيا:- ميخالف روح وراه يلا وراضيه
اوس:- تأمرين أمر
حجاها وسحب راسها باسها ..باوعلي وابتسم وطلع
جان اليوم بي توترات
ومو على طبيعتنا وخايفين لا بيبي تحجي شي لجدي
لان ماردنا يوصل الموضوع اصلا لبيبي وماحجينالها شي
كلنالها متعاركين بالبيت عركة بسيطة بس كبرت بينهم واجو هنا ..
بالليل ساعة تسعه وشويه هيج شي
كاعدين بالصالة بس جدو جان طالع مو بالبيت
دانتفرج عالتلفزيون وبيدي انا التلفون
فجأة ودخل اوس واكف بالباب المطبخ ويباوعلنا ومادري ويامن يدير وجهه من المطبخ ويحجي
انتبهت عليه عمتي:- شبييك تعال ..شكو
دخل وباوعلنا ..اشو وراه اجا قيس
جليلة:- هاه اجا ابو الفواين
قيس:- خليك محضر خير بيبي
حجاها ودزلها بوسه
بسرعة دارت وجهه عمتي عالتلفزيون وسوت روحهه مانتتبها
اجا كعد يمها وخله ايده على جتفها
قرب راسه:- جوعان
بدون ماتنتبلهه ردت:- وشسويلك يعني
قيس:- دلكي معدتي ..غير اريد اكل
اسيا:- روح مابعد اليه دخل بيك ..مو انت هيج تريد
اجا قيس كعد يمي وثنينا دنباوعلهم
باوعلنا قيس:- ها خير انتو شبيكم
اسيا:- قيس كوم من يمي
قرب وجهه من يمها وهمسلها حتى لاتسمع بيبي
قيس:- عمة
يعني بشرفج صارلي شكد عايش وياكم
وماتعلمتوا لحد هسه ماحب احد يدخل بحياتي
ندارت عليه بسرعة:- ولك مصيبة جانت واكعه فوك راسك ودكلي ادخلتوا ..احمد ربك واشكره خلصناك كبل ماوصل الموضوع لجدك والله جان غصبك تتزوجها راسا
دار وجهه للتلفزيون وتنهدت بضوجة وهز براسه
اسيا:- وجع اي والله مو وجه نعمة
اوس:- قيس افندي ..جبناك تصالحها مو تعنطز علينا
قيس:- بصراحة ماكدر اقرر شي او احجي شي واني جوعان
اسيا:- اييي افتهمنا
سحب ايدها وباسها:- اعتذر وحقج فوك راسي
جليلة:- هسه مافهمتونا شصاير شبيكم
ندار على بيبي:- انتي ليش مانايمة لحد هسه شعندج
جليلة:- انجب وانت شعليك
قيس:- مو زين بيبي
شمرت الريمونت عليه اجا براسه
كمنا نضحك كلنا راد يكوم راسا تعدلت ولزمته من ضهر بلوزه:- اووكف تعال احجيلي شبيكم اليوم
باوع على عمة:- عمة خلصينيي
اسيا:- ماااعلية اني كايمة اسويلكم عشة
حجتها وراسا اشرتلي اكوم وياها بضحكة
كمنا ثنينا وركض طبينا عالمطبخ
ياربي شكد ضحكت ..صح هواي طوخ بالحجي اليوم
بس حسيت صدك عمة مثل امهم
لاتكدر تقسى عليهم ولا هما يكدرون يبقون مزاعليها
حبيت قوة العلاقة بينهم وتمنيت من انا وصغيرة يمهم واعيش كل اللحظات اللي عاشوها سوا وياها ..
واكفة ويه عمتي بالمطبخ ماشوف الا يدخل اوس علينا
باوعلي وراسا گال:- الحكيني بالحديقة
حجاها وراسا طلع
باوعت لعمتي وهي تباوعلي ..جان وجهه ضايج محتقن
اسيا:- شبي ..شمسويه؟
بيلسان:- شمدريني
اسيا:- دروحي اطلعي شوفي شكو
ذبيت اللي بيدي وعدلت الحجاب وطلعت
لكيته واكف بالحديقة ومنتظرني مخلي ايديه ورا ضهره ويباوعلي نظرات مافتهمتها
اول ماوصلت يما:- شكو
خله تلفوني بوجهه ..جان فاتحه على رقم متصل بيه:- منو هذا
باوعت ..رقم غريب ومامسجل اصلا يمي
باوعتله:- شمدريني حتى مامسجل بجهازي
اوس:- راح انطيج فرصة تحجيلي
منو هذا؟
بيلسان:- شبيك اوس گلتلك ماعرف
اصلا تلفوني مابي بس رقم اهلي وصديقتي وانت
تنفس بعصبية ..رجع مادري شسوه بالتلفون
ردت اسحبه منا:- شداتسوي شنو هالتصرف
وخره من يمي:- هااا يعني ضامة شي
باوعتله وفتحت عيوني بعصبية:- شنو هالحجي احترم نفسك
وجيب التلفون منو سمحلك تلزمه وتفتش بي
ولا سمع مني بقى مادري شديسوي ووين ديفوت
عطت بي:- جييييب التلفون شداتسوووووي اوووس
صاح بوجهي:- اصبرررري
حجاها وراها طلع محادثتي ويه هذا يوسف
ودازلي رسايل جديدة لمحت بس اخر شي كاتب ضل بالي عليج
داره عليه وباوعلي:- هاا ..هذا منو وشنو هاي
ماعرفت شحجي
اول مره احد يسوي هالتصرف وياي واوكع بهالموقف
سكوتي راح يجيب الشكوك اكثر
بس ماكدرت وماعرفت شحجي ..بلعت ريكي واباوع للرسايل
بيلسان:- زميل وياي
اوس:- لا
باوعتله ديباوعلي بعصبية بس جان ديحجي بهدوء
بيلسان:- جيب التلفون اوس ماسمحلك تفتش بي
اوس:- منو هذاااا داسالج جوابي مثل البشر ولا قسم بالله اغثج مغثه هسه ماحاستها من قبل
بيلسان:- لا بله وانت شنو شايف روحك تره داعديلك هواي
اوس:- داكووول منو هذا لاتغيرين الموضوع
منو هذا القندرة الطاكه سوالف وياه وتتشاقين
وبكل وقاحة ديخابرج بالليل ويرجع يگلج ضل بالي عليج
باوعتله عيوني دمعت
اريد احجي اريد. انطق اثبت برائتي ماداعرف شسوي
حجيت:- والله ماعرف منو
اوس:- شنو ماتعرفين منو لعد شنو هالسوالف هااااي وهالضحك والميانة
ماتحملت كمت ابجي ..خليت ايديه على وجهي وابجي
اوس:- داحجي وياج باللسان لاتخليني اتصرف غير تصرف
وجاوبيني بس منو هذا وشعنده وياج ماداذبحج تره
بقيت ابجي وانا ايديه على وجهي
ماحس غير يسحب ايديه بقوة من على وجهي بحيث حسيت مفصل ايدي راح يروح بيده من القوة
فزيت اباوعله هذا من كل عقلة هيج دايتصرف وياي؟
صحت بي:- ااااااااااي اذيتنييييييي
اوس:- جاوبيني مو زماااال تبقيني احجي وانتي ساكته
باوعتله:- واحد
اوس:- اي منو هذاااااا
حجيت وانا ابجي واشهك:- هذا اللي تعرفت عليه اول يوم
واجاني ديكلي اخاف تحتاجين شي ومن هالحجي
خوما كفرررر لو كفرت
اوس:- لا حول ولا قوة الا بالله
صبرك ياربي صبررررك ..اني شكم مره گلتلج لاتنطين مجاااال لاحد
يعني راقبج واجا سولف وياج وگلتلج هالعالم هذوله مو مثل نيتج ومو مثل ما انتي مفكررررة ليش تجيبين المصايب لروحج
ليش تنطين مجال لحيوانات مثله
ليش رديتي من الاول علييه لييييش ..
اوس:- واااحد طايح حظ يريد يستغلج وديزحفلج عيني عينك وانتي كاعده تطرنين وياه سوالف وصحب
شنو هالجرئة اللي عنده خلته يتصل بيج ومنيييين جاب رقمج لو حسابج منيييين
بيلسان:- دكااافي
اوس:- شنوووو كافي ..والله لو احجي منا لبعد سنه ماراح تفهميني وارجع الكيج واكفتلي ويه واحد ثاني وتسولفين ويااااه
شنو هالتصرفااااات مو طفلة انتي لخاطر ربج
اباوعله وبس ابجي ماعرف شحجي وشرد
كرهت نفسي ..كرهت كلشي بهاللحظة هاي بعد كلامه
كمت اشهك يصيح بوجهي بدون توقف وكلامة احسه صار سيوف بقلبي
اريده بس يسكت عاد لو انا اسكت
كامت دموعي وحده وره الخ تنزل ولساني انعقد
عرفت شكد على نياتي وماحس بالتصرف اللي اسويه
انا غلطت ادري بس ماجنت اعرف بهالشي
موقف اول مره اواجهه بحياتي ..نزلت راسي وابجي
سكت بس اسمعه جاي يتنفس بقوة
فزيت سمعت صوت سيارة جدو برا وكفت
عالسريع باوعتله ..بدون مايكمل حجيه عفته ودخلت ركض للبيت
تلكتني عمة:- شكو ولج
ماباوعتلها ولا حجيت ركض عبرت وصعدت للغرفة
بس دخلت وسديت الباب نهديت بالبجي
انا ثوله انااااا ..ليش سويييت هيج ليييش
هسه شكد بينت وحده رخيصة وشكد بينت وحده حقيرة
طول عمري احجي على البنات اللي يسولفون ويه الولد
وهسه صرت انا منهم
كمت اشعف بشعري ..الله ياخذنييييي شسوييييت
هسه شنو يكللهم
لكفتها تحجي ويه واحد؟
هسه شراح ياخذون عني نظره!!!
ياربيييييي
كعدت عالسرير وابجي
ماشوف الا دخلت عمتي ركض علية:- ولج شبيييج شصاااير
كمت ابجي بعد اكثر
شحجيلها؟ ..متفشلة من روحي
رغم مامسوية ذيج الجريمة
بس بوقتها جان قلبي دينزف من كثر ما الموضوع اذاني وحسيته حساس
حضنتني:- ديلا امي ديلااا كافي
اني سمعت صوت اوس ديصايح بس مافتهمت شبيكم
عرفت عصب عليج من سالفة ..يلا حبيبة يلا سمي بالرحمن
حضنتني وبقيت ابجي واناشغ
سمعنا صوت بيبي من جوا تصيح عمتي
وخرتني:- كافي بجي اهدي يلا شنو ماصار مايستاهل
ماتنزلين تتعشين ؟
هزيت براسي:- اريد انام
مسحت وجهي بيديها:- ديلا حبيبة بس كافي لاتبجين هدي وانسي
عافتني وطلعت ..دخلت بفراشي وبس اريد انسى الموضوع وانسى كلامة
كام يرن باذاني مادري شكد بقيت بس ابجي اريد انام ماكدر ..
.
.
.
للحكاية بقيـــة

مبدئياً لحد يلوم بيلسان حتى على ردات فعلها
طبيعي وحده وحيدة من بعد تعلق وفقدان اختها وداتعيش اشياء اول مره تعيشها ومواقف اول مره تصادفها
لذلك اي تصرف جاي تتصرفة مالومها بي
بس دگولون اوس هاي غيرة لو شنو؟ ؛)
اعتذر عالسحكات ولاتنسون التصويت .

#منة الله_الأيوبي