ليلة من العمر

البارت التاسع والثلاثون

هزيت براسي وگلتله:- اي راح اكمل ...

وصدك بعد يومين جابلي ملازم الكورس وكلي اتحضر للامتحانات النهائيه ومادري شون دبرها بس گال انو صديقه العميد وكدر يسويها
هو بحكم شغله متعرف على هواي ناس وبالاخص الناس اللي من هالطراز الثكيله بس المشكلة ماراح يساعدوني بالامتحان
لازم الجهد اللي باقي مني
وجان وياي ايد بأيد
يخابرني كاميره حتى لو جان بنص الليل ويكعد يقريني
ماجان يكدر يجي للبيت فيخابرني حتى وهو بالشركة يتصل ويخلي التلفون كدامه ويشتغل
وانا جنت ايد عالبيت وايد بالقرايه واعترف التهيت عن امي صرت بالاسبوع مره لو مرتين اخابرها وهالموضوع جان يقهرني ..
مرات تجي بنان تساعدني شوي وادري بي هو يدزها
عمة نعمة تجي مرات العصر هيج وتروح بيتها مو كلش قريب ولهذا ..
جانت أيام كلش متعبه بكل معنى الكلمة
اتعب وانهار نهاية اليوم وعيوني تقفل اريد افتحها بعد ماكدر من التعب لحد ماجتي الامتحانات ليلتها مانمت من الخوف
مادري خفت بعد كل هالتعب وماحصل شي وبعد كل هذا اخذل اوس اللي جان ساندني بكل قوته رغم شغلة والخبصة اللي فوك راسه

جنت كاعده بغرفتي بالليل
دزلي رساله:- نزلي اني جوا
فزيت وبسرعة عدلت روحي نزلت لكيته واكف بوجه الدرج وبيده التلفون منتجي على الحايط
شافني ابتسم وحط تلفونه بجيبه ..نزلت ووكفت كباله
اوس:- ليش مانايمة لحد هسه مو باجر امتحانج ؟
بيلسان:- اوس واللله ماداكدر انام
باوعلي بنظرة ورجع گال:- انيمج أني؟
وخررت ضربته على صدره
بيلسان:- اكعد راحه
لزم ايدي الضربته بيها وسحبني عليه جرني لحضنه
شكد وجوده دافي واحس بالامان مو طبيعي من يكون يمي ...

اول يوم امتحان جان كلش صعب بحيث الليل كله اوس وياي عالخط بعد مارجع
كل شوي افز ويسمعني يكلي:- اني يمج
تعبت وبجيت ونهاريت وتذمرت ..وكل ليلة امتحان جنت اكعد اصيح واكول ماريد اكمل عوفني عاد
ويجبرني ابقى اكمل ويكلي باقيلج بس هالشوي ..
والحمدلله انكضت الامتحانات على كد ماجنت خايفه منها وبقت بس النتيجة
يوم اللي خلصت كعدت من نومة العصر سمعت صوت يمنا
نزلت لكيت بيت عمو محمد
ياخي جني شفت اهلي من الراحة
نزلت ركض اسلم عليهم وبوست خاله هاجر
جانو كاعدين كلهم بالصالة ومطلعين عمة اسيا اللي بدت شوي شوي تحجي وتتحرك ..رحت للمطبخ اسوي جاي
ماحس الا شخص يحضني من خلف بهدوء
انداريت لكيته اوس خله وجهه بركبتي وباسني
اوس:- ريحتج ريحتج شمسويه بيه
بيلسان:- ها حبيبي ..وخر لاحد يجي
انتچا عالكاونتر ورحت اطلع حلويات
شفته يباوعلي وصافنربيه ..ابتسمت وكتله:- شبيك
اوس:- اريد افتح وياج موضوع
بيلسان:- ياستااار مواضيعك تخوف انت
ارس:- بس تفيدج
حجاها وغمزلي ..خزرته:- شنو هي
تقرب من يمي ووكف كبالي يباوعلي
اوس:- اريدج ..اريد نتزوج كافي صارلنا شكد تعبت وانتي هيج بعيده اريدج يمي بعد
صفنت بي ماعرفت شنو ارد
واحس گلبي كام يرجف رجف مو طبيعي
اوس:-ها حبيبي شو صفنت شنو السالفه
بيلسان:- مادري
وخر علبة الحلويات من كبالي وسحبني لزم ايدية ويباوعلي
اوس:- شنو منتظرين بعد
بيلسان:- ومنو يبقى ويه بيبي وجدو وعمة اسيا منو يداريهم
اوس:- نفصل الطابق الثاني نسويه النا ونسكن بي وهيج هم لوحدنا وهم وياهم بنفس الوقت ..اساسا هالفكرة مو فكرتي هما جانو مقررين هيج
باوعتله عيونه تلمع وبيهم نظرة حلوة
خلاني افقد وروحي تروح ويه كلشي يگوله
للحظات سكتت ونزلت راسي
بيلسان:- ماكدرهسه
اوس:- ليش؟
بيلسان:- بابا ماصارله سنه بعد
رفع راسي بيديه وكال:- مانسوي عرس لحد ماتطلع سنويته ..باعي
سحب كرسي وكعد وقربني عليه
اوس:- عندي سفره لمدة شهر ونص بعد جم يوم وماراح اكدر ابعد كل هالمده عنج ..خلينا نسوي حفلة عالبسيط ونسافر سوا وهم سفرة شغلي وهم شهر النا واوعدج بس تطلع سنوية الوالد اسويلج عرس بحياتج ماتخيلتيه
سحبت كرسي وكعدت ..سكتت ماجاوبته
اوس:- لاتنسين نحنا عاقدين محكمة وشيخ هسه
يعني ماباقي بس الكلمة الاخيرة تتم وذيج السالفة
ضربته قوي على صدرة:- شبيك صاير مستهتر
اوس:- مو شليتي حالي والله العظيم
يباوعلي وعيونه على شفايفي ينتظر جواب
احتاريت واحس عقلي فرغ من اي جواب واي فكرة وقرار
وخر شعري النازل على عيوني
اوس:- ماراح اضغط عليج القرار الج وشنو دكولين اني وياج ويمج ..بس والله ماجاي اتحمل بعد بعدج
دنحجي دخلت خاله هاجر
بسرعة فزيت وكمت كامت تضحك
هاجر:- امي خطيبج ليش هالفزه
بيلسان:- لا كمت علمود الجاي
كمت عالجاي وانطيتهم ضهري وانا راسي مشوش من كلامه وافكر وحسبه تجيبني وحسبه توديني
مادري شنو تهامسو سمعتهم بس مافتهمت وماركزت وياهم
تنهد اوس وكام طلع برا
جتي يمي خاله هاجر وتباوعلي
هاجر:- انتي مثل بنتي ..واني ماعندي هالتعقدات بالعكس بوقت النصيحه انصح
الشي اللي ديكوله اوس اني وياه وانسب قرار راح تتخذوه
باوعتله وسكتت
هاجر:- فكري بنتي ..ماراح ابقى اللح واحجي بالعكس القرار يعود الج واي شي راح دگوليه اكيد انتي اللي شايفته صح
بس اكلج فكري ..فكري بالموضوع من كل الجوانب
شالت صحونة الحلويات ودخلت ..
عشت بحيرة هالليلة هاي ماعايشتها بحياتي كله
فكره تجيبني وتوديني
خابرت امي بس ماردت لان جان الوقت متأخر ..
مرة اكول اي ..والف مرة داخلي يصرخ لا
انا احبه وواثقه من حبه اليه ..بس شي بداخلي ديرفض ويمنع
صوت بسيييط وصغير ديگلي مو هسه ....شي نغزه مو طبيعية صارت بگلبي!!