ليلة من العمر

البارت الرابع والعشرون

طلبنا تكسي ووصفلة المكان جان يحجي شوية تركي شوية انكليزي
لحد مايفتهم عليه
وصلنا المكان ماجان كلش بعيد ..بس من بعيد يبين اضويته وزينة واصوات الموسيقى
گلبي تحمس وكام يدك سريع
شكد جنت احلم بهالاشياء ..جان اكو مسلسلة اسمها سنوات الضياع تركية لمن شفتها اول مره جنت اتمنى بس اروح للبحر مثلهم بالليل لو اصعد بالباخرة
اباوع للمكان واحس عيوني ديطلع منها قلوب من الفرحة
صدفة باوعت لاوس واكف يمي ومبتسملي شبه ابتسامة
استحيت وراسا نزلت راسي ..
صعد قبلي جيت حتى انا اصعد ماكدرت
هم لان جعب لابسه وهم لان صايرة خشبه بين الرصيف اليابسه وبين الباخرة اللي بالمي
ماكدرت اعبر الحارس او مادري شنو هناك جان واحد تركي
انتبه علية مدلي ايدية يساعدني شافني صافنة
هي لحظات وندار اوس باوعلنا
تقرب ومد ايده اقرب من الرجال ..باوعتله ولزمتها
رفعني صعدني ..اول ماصعدت انطخيت بي لان عالسريع رفعني
عطره سطرني ..لدرجة دخت!!
بسرعة تركت ايده ووخرت اعدل بروحي وبالفستان
اوس:- تريدين نبقى هنا او نطب لجوا؟
باوعت عالشباك شفت مثل الكفترية وعالم ودك وغنة
حبيت الاجواء بالداخل ..باوعتله وگلت:- لا خلي نطب
مشاني كدامة ودخلنا
جان مضبب من الحرارة وبوخة النراكيل وخصبة ١٨٠ درجة مختلف عن البرا
وجانت خنكة خنكة حراره وعالم
ماحبيت الجوا وردت اطلع بس استحيت اگله لاوس
رحنا كعدنا على طاولة ..اباوع الناس اللي تركص
واللي تغني واللي كاعدة تاكل
حسيت كلهم جانوا عرب حتى النوادل سوريين
صافنة بواحد واحد ..فصلني من صفنتي اوس
اوس:- شبيها عمتي اليوم
باوعتله:- مابيها شي ..ليش؟
اوس:- من رجعت اليوم العصر ماجانت طبيعية
بيلسان:- هااا بس جانت تسولفلي عن ايسر
وجانت دادگول مشتاقتله وهالسوالف
داحجي واحسه صافن بيه ..حك بلحيته وتقرب سحب كلينكس وانطاني:- خففي حمرتج
باوعتله ووخرت:- تره هي لازم هيج
اوس:- ميخالف خففيها
بيلسان:- خليني طالعة متونسة ليش تعكر مزاجي
اوس:- هاي شنو
راح يتعكر مزاجج اذا خففتي حمرتج يعني!
رجعت ضهري للكرسي:- انا نفسيتي ترتاح وتستعدل لمن اطلع لمكان واكون متاكدة طالعة حلوة
ماريد اسوي شي يخرب جمالي لان بالتالي راح يخرب نفسيتي
اوس:- بلا كلاوات
بيلسان:- اوووس دعوفنييي
راد يحجي اجا النادل ..طلبنا اكل وحلويات
كاعدين ونباوع للعالم ..عم الصمت فجأة
اضوج من هاللحظات اللي نطلع بيها لان يعم الصمت فجأة
وثنينا مانعرف شنو نحجي ..بس اذا حجينا اكيد راح نتعارك
ف الطلعه وياه كلتها ماحبها ...
جان اكو بصفحة شلة بنات كاعدين ..باوعلي ورجع باوعلهم وگال:- شايفة ذولاك المجموعة من البنات عالطاوله اللي باليسار
بيلسان:- اي شفتهم ..شبيهم
اوس:- اول بنتين اعرفهم ..ويانا بالشغل
ووحده المنهم هي وقيس واحد يزحف للثاني
بيلسان:- والله شون يعني ..هما عرب
اوس:- لا تركيات بينهم ميانة هي وقيس
باوعتلهم انتبهت عليهم ديباوعولنا
او ديباوعون لاوس اكثر گلتله:- وليش مادگوم تسلم عليهم
اوس:- منو ..اني؟
نداريت عليه:- اي مو دگول يعرفوك وتعرفهم
اوس:- اي واذا
بيلسان:- يعني ليش مادگوم تسلم عليهم عيب
رفع تك حاجبة وگال:- لا
بيلسان:- ليش لا
رجع انتجا ضهره عالكرسي وجتف ايديه ويباوعلي گال
اوس:- احتراما للانثى الطالع وياها
ما اعوفها واكوم اسلم على بنات لو اروح بين بنات واعوفها حتى لو للحظات
صفنت بي ..اباوع بعيونه
خجلت وحسيت كبر بعيني هواي ومتأكدة لو جان كايم ومسلم عليهم وعايفني جنت راح اضوج واحقد عليه
مو غيرة ..بس مثل ماگال احتراما اليه ..
احنا ودناكل جتي ببالي سالفة باوعتله وگلت:- صدك اوس
علاقتك ويه عمة شعجب هيج قوية
يعني دون عالكل وذيج المرة دگول هي اللي ربتك
اوس:- طبيعي لان من جنا صغار جنا عايشين كلنا سوا ببيت جدي واني اول حفيد ف جنت قريب الهم كلهم
وبمرة وكعت بفترة مو زينة عمتي رغم جنت مو هواي جبير بس اني الوحيد اللي وكفت وياها
بيلسان:- وليش يعني وكفت وياها دون الكل؟
سكت شوية ..ذب الخاشوكة ومسح حلكة بالكلينكس وعدل لحيته
باوعلي:- لان امشي تحت مبدأ كل الناس صح واللي داتسويه صح مادام انت ماتعرف شنو واجهوا او شنو ديعيشون وشافوا بحياتهم ..عمة الكل ظلمها من غير مايعرف هي شنو جانت تحس وشنو شافت
بيلسان:- بس مرات اللي اكبر من عدنا هو افهم منا
لمن ينصحنا بشي يكون شايف الشي اللي نحنا ماشايفيه
اوس:- صح وخطأ هالكلام
باوعتله وتعدلت بكعدتي ..رجع گال:- لمن يكون الموضوع مايخصج وبعيد عنج راح تحجين بمنطق وعقل وبدون انفعال لان مالامسج الموضوع ..
بينما من توكعين بالموقف وتتأذين كلش طبيعي تتصرفين عكس ماحجيتي وراح تتصرفين بعواطفج وگلبج ..يعني بيبي واي شخص مارضى بسواية عمتي يمكن لو صارلهم نفس الموقف اللي شافته واجاهم نفس الخذلان والوجع اللي تعرضتله عمة
احتمال جبير يسوون مثل ماسوت هي
بيلسان:- صحيح بس هما يكونون شايفين شي نحنا مانكون شايفين ..
عامي علينا حزنا مثل مايگولون
اوس:- بالعكس ..نحنا اصحاب الوجع والموقف نكون شايفين شي هما اللي شايفية
سكتت شوية ورجعت باوعت عليه:- منو گلك عمة حاجيتلي الموضوع
لان احسك داتحجي عنه عادي مو سر
ضحك وسكت لحظات ورجع گال:- عيونج
بيلسلن:- شبيها؟
اوس:- هي اللي گلتلي عمتي مسولفتلج الموضوع
ابتسمت ورفعت حاجبي گتله:- هاي شون
اوس:- والله مادري
اذا انتي جنتي هيج بسيطة وواضحة كلشي يبين عليج ..
لو اني اللي جاي اشوفج اوضح من كلشي !
جنت مخلية ايدي سانده خدي واباوعله ..من گال هيج
احس جمدت بمكاني ..كلشي بيه انجمد من الخجل
تعدلت ووخرت عيوني من عليه نزلت راسي كمت اللعب بالصحن:- لا امي هم جانت دگلي هيج
انو يعني مفضوحة
حجيتها وضحكت ..باوعتله ديباوعلي ومبتسم
اوس:- احجيلي عن طفولتج
رفعت راسي عليه:- شون بالضبط؟
اوس:- يعني حياتج من جنتي طفلة
وكحة عاقلة ويامن جنتي تلعبين وهالشغلات
رجعت بالكرسي وضحكت ..محد سالني هيج سؤال من قبل ولا حتى انا خاطر ببالي فد يوم رغم انو دائما اتذكر طفولتي بس ماحاجيه عنها ابد
بيلسان:- عادية مثل اي بنية طفلة
صح جنت وكحة شوي يمكن لان جنت اريد ابرز شخصيتي بالبيت
لان جانو اهلي مهتمين باختي المرحومة اكثر وانا مو عايفيني
بس مو مثلها ..ف جنت اتواكح واسوي شغلات حتى ينتبهولي
جنت عكسها بالضبط ..هي هادية وماتطلع لباب البيت على كد المدرسة وانا بالعكس جنت اطلع اللعب ويه جهال المنطقة طفولتي كلها
حجيتها وضحكت ماجنت منتبهه عليه
صدفة باوعتله نفس نظرته منتجي عالكرسي ويباوعلي مبتسم
اوس:- جان عندي شخص معين يعني بالمنطقة تحبي
صفنت شوية ..داحاول اتذكر الكائنات الغريبة اللي جانت هناك بذاك الوقت
باوعتله وگلت:- اي جان اكو بنية ماتذكر شسمها هي الوحيدة اللي احبها وولد بس ذاك جبير يعني ماجان يلعب ويانه
اوس:- شكد جبير يعني
بيلسان:- ماتذكر بالضبط بس اكبر من عدنا وشفته ببيت جيرانه ولزكتله لزكة بحيث كلما اشوفة اروح ركض عليه
اوس:- شسمة
صفنت ..هسه حسيت انو اسمة راحي من بالي
داتذكره بس مثل الخيال شكله وملامحه ..بس اسمه ماعرف
باوعتله وگلت:- ماتذكر والله بس جان كلش ينحب وجنت متعلقة بي بحيث من شال من المنطقة كمت ابجي
حجيتها وخليت ايديه على وجهي ضحكت
اوس:- متعلقة بي وماتتذكرين شسمة
وخرت ايديه:- شمدريني نسيت ..من حادثة اختي كلشي تبخر من عقلي عداها
اوس:- الله يرحمها
تنهدت ونزلت راسي:- اييييه والله ويرحم الجميع
باوعت صدفة للطاولة اللي يمنا جان بيها خمس شباب ورياجيل كبار مبينين عرب -ماراح اذكر شنو جانت الجنسيات-
واحد المنهم طول ماجنا كاعدين جان ديباوعلي بس ماهتميتله كل ظني صدفة
لمن باوعتله هسه ..لعب بشواربه وابتسملي
راسا درت وجهي ..بطني احسها كامت تلويني
خفت وتوترت ..كام يتقصد يطلع صوت حتى يثير انتباهي
مثلا يضرب الخاشوكة بالكلاس لو بالصحن
لو يضحك بصوت عالي شوي حتى اباوعلة
نظراته وتصرفاته بدرت تزيد توتري اكثر
باوعلي اوس:- بيج شي
بيلسان:- لا بس احس اختنكت خل نطلع لبرا
اوس:- بكيفج
باوعنا للجامة برا مطر
هسه شون راح نطلع وماكدر ابقى هنا نظراته كلش وترتني
مابعد اتحمل باوعت على اوس:- اوس خلي نطلع
اوس:- وين دباعي المطر
بيلسان:- ميخالف
تقرب مني:- بس فهميني اكو شي بيج شي
بيلسان:- لا بس اختنكت شبيك
اوس:- كومي
حط الفلوس عالطاولة وشال تلفونة وانا شلت جنطتي وكمنا
انا جنت دامشي كدامه ولان الباخرة داتتحرك مانكدر نمشي سريع وخبصة العالم
دامشي وعبرت من يم ذوله الشباب
سمعته بصوت جان واضح ومسموع گال:- ريت الله يكتبلي اضوك الاحمر
جمدت بكاعي بعد رجلي مابيها تتحرك
وگلبي يرجف ادعي محد سمع واهمهم اوس
بس اوس وراي بالضبط ..اباوعله وكف بمكانه
ياربي نلاصت نلاصت
وكف بهدوء ..گلبي وكع بين رجلية من الخوف
باوعلي عاقج حواجبة .. ندار عليهم:- يازبالة طلع منا هالكلام
ردت اقفل الموضوع قبل مايصير شي بسرعة رحت عليه تقربت واحجي وياه:- ماعلينا ماعلينا امشي حباب
لزمته من عكسه اريد اسحبه ..دفس ايدي بعصبية وباوعلهم
بيلسان:- اوس حبااااب لا تعااال
راح يمهم انا رجلية مابعد تحملني من الخوف
سمعهم وسمع منو اللي حجاها ..اباوعله وانا ايدي على گلبي اتخيل السيناريو اللي نلاصينا بي وراح ننفضح
اباوعله ديكور بيديه ..يمة انفضحنا يمة
يمة نلاصتتتت
وكف كبال هذا الرجال:- تريد تضوك الاحمر؟ ..بعيني
كول هيج وكفخة بوكس على حلكة
العالم اللي كامت تعيط واللتمت السنوان بصفحة تصيح
وانا بس اريد اسحب اوس ماكدر صارت خبصة بحيث ماكو دوسة رجل
اريد اطلعه نلاصت اكثر بالخبصة
ذاك مثل الثور هاج واوس اول مره اشوفه هيج متعصب
اعيط اصيح اريده بس يوخر عنه اريد اطلعه كبر ماتكبر اكثر
اجو اربعه من النوادل عالسريع سحبوهم ثنينهم ودخلوهم مادري وين
اريد بس اشوف وين راح ماكدرت العالم كلهم كبالي واكفين وتعيط
صخام بوجهي وين اخذوا الرجاااال
سحبت كوسي وكعدت جسمي كله يرجف من الخوفة
منو اخبر هسه ماعندي احد ولا حتى خط تركي
ياربي شسوي هسه ياربييي
عبر واحد شباب من النوادل من يمي ..لزمته بسرعة وكفته:- اكلك وين اخذوا ذوله اللي تعاركوا هسه
- لغرفة المدير منشان يحلو السالفة بيناتن
حجاها وعافني راح ..بقيت كاعدة واهز برجلي
اريد بس يطلع عاد توترت بالاكثر وتاخر
يمكن نص ساعة او اكثر بقيت انتظر وماطلع
رفعت راسي شفته طلع لوحده ..وكفت على حيلي
اجا بدون مايباوعلي لزم ايدي وجرني سحبني بعصبية طلعنا برا
وكفته:- بس فهمني شصار جوا سوولكم شي
باوعلي بنطرة خزرة:- الله شورطني واخذتج وياي
مو گتلج خففي الصخاااام
بيبسان:- انا شعلية هو اللي ادبسزز ووقح
اوس:- طول الكعدة جان ديتحارش بيج وتوترتي سألتج گلتي كلشي ماكو ليييش ماحجيتي
بيلسان:- شنو ليش ماحجيتي ماردت اسوي مشاكل واحنا اصلا مو ببلدنا
اوس:- انتي لو من البداية تسمعين الحجي ومامسويتني زارع كرون بكصتي ماجان راح تصير مشاكل
بيلسان:- هسه صارت براسي
باوعلي:- خففيها ولا قسم بالله ..قسم بالله تشوفين مني تصرف ابد مايعجبج
جتي الدمعة بطرف عيني ..طلعت كلينكس من الجنطة ودامسحها باوعلي وگال:- كله كله المكياج امسحي
صحت:- لاا تره مصختها
اوس:- عليمن مصختها لج
باوعتله وانا كوة لازمة نفسي ما ابجي:- دكافي من عين الدنيا طالعة ومتونسك تريد تطلعها من خشمي
اوس:- امشي كدامي خل نرجع يلا امشي بسرعة
بيلسان:- اي اصلا رايحة على هالطلعة الصارت سم
حجيتها وعبرت كباله
اوس:- امشي وبلا لغوة زااايده
وكفت نداريت عليه:- لاتصيح علية انا مو طفلة افتهمت
اوس:- امشي كبالي مااااريد اسمع منج حرف
مشيت وهو وراي
طلعنا من الباخرة كمنا نمشي بالشارع حتى نوكف تكسي
صار هو ديمشي كبالي ..ويه المطر ماتحملت وكمت ابجي
انا شنو ذنبي يصيح علية ويطلع عصبيته
انا شعليه اذا هو ذاك حقير ..سمعني وكف ندار علية:- ممكن اعرف البجي ليش
وكفت وكمت اصيح:- ماااعليك ماعليك مني عسى ما احرك روحي عسه هنا
اوس:- امشي نرجع للفندق وهناك حركيها شتسوين سوي
حجاها وندار كمل يمشي
امشي وراه وابجي وبگلبي اغلط واسبه
هو انا صوجي اللي طلعت ويه واحد متخلف مثلك
انا اللي شورطني وطلعت وياااك ساعة السودة
وكفنا تكسي ومشا بينا الطريق كله انا دايره وجهي وابجي بصمت
المفتاح جان وياي بس وصلنا رحت ركض قبله ولا اريد اتقابل بعد وياه ودخلت عمتي جانت نايمة والفندق ظلمة كله
بوجهي بسرعة للحمام غسلت وبدلت ..مو ونسة نقمة صارت علية
طلعت جان كاعد بالصالة
باوعلي ماهتميتله ورحت للغرفة تمددت
اويد انام شخير عمة يدك براسي والمشكلة ثلاثتنا مخليينا بغرفة وحدة
قحط من قلة الغرف
شوي وسمعته اجا دخل
انا بقيت اتحرك بمكاني هيج وهيج حايصة حتى نومة طارت
هما جانو ثلاث سراير مخلييهم بالطول واحد يم الثاني
انا يم الشباك وعمتي بالنص واوس عالحايط ..
انا وداحوص سمعت تلفوني جته رساله عالنت
استغربت منو راح يدزلي هيج وقت ..سحبته من جوا المخده وفتحته
طلعت من اوس:- ضهري ديوجعني من العركة
تعالي فركيلي ..
كأنو ديأمرني!!! هذا صاحي على روحة يعني
رفعت راسي اباوع على مكانه ..انتبهت رفع ايده اشرلي بمعنى تعالي
دفست الفراش وكمت رحت يما
تمدد بهدوء على بطنة ..كعدت يما استحيت بالبداية
بس امر ووكع علية بعد وماعندي واهس اناقشة واحجي وياه
مديت ايديا وبديت امرغلة بهدوء حتى لاتحس عمتي
لحظات واتذكرت اسلوبه مالقبل شوية ..تعصبت وصرت جني داكرصه من ضهره
صاح بس بصوت خافض:- ااااااخ
بيلسان:- خيير
اوس:- على كيييف
بيلسان:- انا هيج امرغ
اوس:- لا على كيف شوي شوي
بيلسان:- ماعرف
وكمت بقوى اسوي عالقصد
اوس:- اااااخ اااخ ..ماتعرفين تمرغين بس تعرفين تدلسين مكياج
بيلسان:- مثل ما انت ماتعرف تحجي بس باسلوب همجي
ندار بسرعة وصاح:- منو الهمجي لج
بيلسان:- انت والله
اوس:- اني الهمجي لو انتي الثولة
بيلسان:- لاااتغلط انا مو ثولة انت اللي ماتعرف شتسوي بس تخلي غلطك عالكبالك
راد يحجي سمعنا عمتي كامت تون بمكانها وتتحرك
فزينا ثنينا سكتنا راسا ..باوعنالها
اريدها ترجع لشخيرها حتى اطمئن نامت وارجع لمكاني
انا وداباوعلها واراقبها
ما احس غير انشال وانسحب ..صرت فوك السرير متمدده
واوس فوكاي وجهه بوجهي
نفسنا كام يتضارب ..قريب
قريب لدرجة شفت عندة شامة بجفن عينه اليمين!!
جسمي خدر وگلبي تسارعت نبضاته
اريد انطق ماعرف بعد شون ..احس نشليت عن الحركة وعن كلشي
صافنه بي وهو صافن بيه ..كوه حجيت وانا گلبي يرجف
بيلسان:- وخر
اوس:- لاتحس عليج عمتي اصبري
يحجي وعيونه بعيوني ..ىو بس هيج
احس حتى رموشنا تطاخخت ..اختنكت من الحرارة والخجل
النفس كوة جاي يصعدلي
محاوطني بيديه الثنين بحيث عضلة زنده لازكة لزك بجسمي
راح ادوخ ..راح افقد لا هو انا فقدت اكيد وهسه بالحلم
باوعتله:- وخر خل ارجع لمكاني
ابتسم ابتسامة خفيفة:- مكانج مو هناك
صفنت بي
روحي راحت مابعد الها رده ..خدر جسمي كله ونحليت حسيت فقدت السيطرة عن كل اعضاء جسمي
بيلسان:- وخر ..راح
تكعد عمة
صافن بيه ..رفع جسمة عني شوي
وتقرب حط راسه على شعري المنثور عالمخدة
حسيت بي تنهد سحب نفس طويل
احسه سحبه من روحه من كثر ما حسيت بي
وراها وخر بهدوء ..بسرعة كمت وركض ركضت لفراشي اريد بس اوصله عاد
اطيت نفسي لحد راسي
الحرارة جاي تطلع من وجهي وجسمي كله احترك
اخاف جنت داكدر ولو شوي انام ..هسه نهائيا طارت النومة
اخاف اتحرك بعد بقيت جامدة بمكاني لان ادري بي بعده كاعد
خليت ايدي على گلبي ..استقر عاد دخيل ربك ...
.
.
.
للحكاية بقيـــة

#منة الله_الأيوبي