ليلة من العمر

البارت السابع والثلاثون

باوعتلها مستغربة ومستحية بنفس الوقت
سعاد:- تعاي تعاي ولو مو زين
قربت منها كعدتني كبالها وگالت
سعاد:- اول شي كذب المنجمون ولو صدقوا
بنان:- اي بيبي احنا بس دنتسلى والله
اوس:- شون ديتسلى بيكم ربكم بعدين بجهنم
قيس:- هو وين اكو هيج خرافات
بنان:-هسه اهووو دعوفونا
هاجر:- شو عوفوها خلي تقرا عيون روفان
قيس:- سمعينا شيخه سعاد
قربتني بعد منها وسحبت وجهي قريب ولازمتني من حنجي وتباوع بنص عيوني ..توترت واحس كصتي عركت
سعاد:- فتحي عيونج واسترخي ابد لا تتوترين وترمشين هواي
سمعت قيس همس
قيس:- خاب شني سونار هو
كمخته خاله هاجر:- سمعنا سكوتك
سعاد:- صفي كل ذهنج وخليج وياي
حاولت اسمع كلامها واطبقة
بقيت اباوع بعيونها وانسى وماركز باي شي ثاني غير وياها
كامت تباوعلي وتحرك براسي يمين ويسار وهي تباوع بنص عيوني
وجان سكوت تام
هالسكوت هو اللي وترني شوي
ونظراتها وهي تصفن بداخل عيوني ..
حجت وبعد صمت مادري شكد
بس كامت تحجي بهدوء
سعاد:- عيونج بيهم زعلة ..ومو اي زعلة عادية لا
فد شي مفقود بيهم او مكسور ..وجايلهم حزن بعد جاييهم حزن بعيد شوي بس مؤذي واكثر من الحزن الاول ..
وطريقج طوييييل ومتعب بي هواي عثرات وتغييرات ويه كل شي انتي واكفه وصامده ..راح تعبرين بفتره بيها شي ثلاثه رقم او اشخاص او يمكن فلوس لو ايام المهم شي بي ثلاثه وبعدها راح تنفرج عليج وتنفتحلج كل العقد
كزبر جسمي من كلامها هي وتحجي انا عيوني دمعت وكامت تصب دموع بهدوء ..كل كلمة حجتها احسها خدرت جسمي كله وخدرت عقلي ولمست جروح گلبي
سكتت شويه ورجعت گالت وهي تأشر بأصابيعها:- عندج نقطتين منطفيين بداخل عينج ...عندج اشخاص فاقدتهم؟
صفنت بيها گلت
بيلسان:- بابا ونورهان
هزت براسها وگالت
سعاد:- مبينين هالنقطتين حيل
سكتت ورجعت تباوع
ماتحملت واحس گلبي كام يوجعني واختنكت كلش بعد ماتحمل
لا ارادياً درت وجهي عنها وغمضت عيوني
صاحوا كلهم :- لااااا ليش
كمت افرك بعيوني جاوبتهم بيبي سعاد
سعاد:- اتركوها على راحتها
ضربت على جتفي خفيف وگالت
سعاد:- كومي غسليهم امي ..واتذكري كذب المنجمون ولو صدقوا
هزيت براسي وكمت وانا افرك بيهم والدموع احس جاي تحركني
سمعتهم كامو يتعاركون تقرالهم
دخلت للحمام غسلت عيوني وانا اذاني ترن بكل كلمة كالتها
بالاخص النقطتين المنطفيين
لهالدرجة هما قراب علية بحيث صايرين بنص عيوني؟
والله انتو بروحي مو بس بعيوني ..
كمت ابجي ..فتحت المي وابجي واغسل بوجهي
بقيت اغسلهم بماي بارد لحد ماعديت شوي وبطلوا يحركوني
طلعت سمعتها دگللهم
سعاد:- قريتلها لان عيونها كبار وواضحين انتو كلكم جكم وعيونكم خرزات شقرالكم
انتبهت اوس ديباوعلي من باوعتله اشرلي اجي يما
رحت كعدت يما جان منتجي عالمخده
باوعلي وتقرب همسلي:- بيج شي؟
بيلسان:- لا شبيه
اوس:- عيونج توجعج؟
بيلسان:- شوي
اوس:- لاتهتمين لكلشي حجته تره هاي كلها خرافات
باوعتله وانا عيوني حمره
ابتسم وگلي:- بعدها عيونج احلى عيون بعيوني
فززني صوت بنان عاطت داتتعارك ويا قيس
كامت خاله هاجر وكالت
هاجر:- ابوكم نايم شبيكم ..جهال انتو يلا كلكم عالنوم اشو كافي يلا مو وجه سهره
بنان:- ماما هو ضربني
هاجر:- كومي يلا داكول
كمت وياهم اللم الحلويات وانظف
وراها كلمن دخل لغرفتة
احنا فرشنا بغرفة بنان انا وغفران بالكاع نمنا ..
اباوع للسقف واصفن
مادري بقى بالي بكل كلمة كالتها
جايج حزن؟ ..واكبر من الاول
شقصدها وشنو راح اشوف بعد
وحزن الاول هو بابا مو؟
ماعتقد يجيني حزن اقوى واكبر منا ..