ليلة من العمر

البارت السادس

بيلسان:- صباح الخير
اندارت علية:- هلا يبعد الخير
سدت التلفون دخلت بيبي داتتمشى
جليلة:- هاي ويامن صوتج عالي جان
اسيا:- جنت احاجي قيس
جليلة:- هاا ويمتى يجون
كامت عالطباخ:- هسه يگول طيارتهم ب١٢
حجت بيبي هي وداتسحب الكرسي تكعد
-اي خوش لعد اتحضروا ترا اليوم الكل جايينا
باوعتلي ورجعت گالت:- يشوفون هالحسن
خجلت ونزلت راسي مبتسمة
تريكنا بس انا وهما
جدي جان طالع وحسب ماعرفت ايسر اصلا مايكعد من وقت
قضيت الوقت وياهم بالمطبخ
سوالفهم حلوة بس ما اخذت عالوضع بعدني احس نفسي كاعدة على اعصابي وياهم ..
بالوحدة وشوي اجا جدي واول مادخل من المطبخ
شافني جنت كاعدة عالكرسي اجا وباسني من راسي ،
كزبر جسمي مو متعوده
جدي جان ضخم شوي مو هواي وعنده سمن ابيضاني
شعره ابيض ماعنده لحية بس شوارب خفيفة
على عكس بيبيتي جانت سمينة حيل وسمره هي وعمتي اسيا ينطون شبه لبعض
اما عمي محمد هذا استثنائي ماحسيته يشبه احد بيهم! ..
حضرنا الغده ولتمينا كلنا عالاكل
بعدنا مامخلصين سمعنا صوت الباب يندك قبل مانكوم نفتح انتبهت من الشباك دخلت حرمة اللي عرفته هاي عمتي الثانية اصغر الكل
دخلت ووياها رتل جهال ..اول ماشافتني بقت صافنه مستغربة
جتي بوستني وگالت
نعمة:- شونج عمة والله كبرانا واحنا ماجنا دارين عدنا هيج بنت اخ حلوة
ابتسمتلها صار بوجهي خلفها زوجها ديباوعلي ومعكر وجهه
سلم علية من طارف خشمه ..ماستلطفته نهائيًا !
كمنا راسا من الاكل وانا اصلا جنت على شعره واكوم من المستحه
وصارت خبصة الجهال روحي طلعت
كمنا ودانلم بالسفرة مانشوف الا يندك مره الخ الباب
ويدخل الهيبة ..اقصد عمي محمد
ويه زوجته وبنت شابه ناعمة وحلوة
كلهم اول مايشوفوني يبقون صافنين بيه وحتى سلامهم بارد بس مرت عمي محمد من شافتني جرتني لحضنها تبجي ودگول
هاجر:- صدقة للرحمن يمة ريحة الغالية بيج اروح فدوة ونذر لليوم الرجعتيلنا بي
بوستني ووخرت من يمي وگالت:- اني مرت عمج محمد ..وجنت ويه امج اكثر من سلفة طلبت روحها الرحمة
قربت بنتها وگالت
-هايه بنتي بنان ..جنا متفقين اني والمرحومة نخلي اسماء بناتنا على نفس الوزن
راحت وسميتها لوحدي ..
حجتها وخلت ايديها على عيونها كامت تبجي
على بجيتها بجيت ماتحملت ..صاحت بينا عمتي
اسيا:- ايييييه سليمة عليج ام اوس كلبتيها مناحة
سحبت كلينكس عالميز جان وكعدت
هاجر:- يولي والله من البارحة داكول ماراح ابجي وماراح احجي شي زايد بس والقران ماتحملت من شفتها
باوعتلي ولزمت ايدي
هاجر:- اعتذر والله
بيلسان:- لا خاله شداتحجين
حجت عمتي الثانية من مكانها:- تعودي على مرت عمج هاجر تره تحجي هواي
اسيا:- يااا خيه واكو احلى من حجاياتها
هاجر:- فدوه لعمرج حبيبة
رجعت باوعتلي وعيونها مدمعة
استحيت هواي
ماعرف شنو احجي وشنو اسوي
جنت مثل الصنم بس اصفن بالوجوه
احس حتى كلامهم ماجاي افتهم عليه
هما عائله بينهم انا زايده بينهم
عقلي مشوش كل اللي اريده انو ارجع لامي وابويه
ارجع ابدي دوامي واعيش حياتي
بدون هالتغيير الصار فجأة ..
دخلوا كلهم كعدوا بالاستقبال
انا بقيت ويه عمة اسيا دانحضر استكانات للجاي وكلاصات مي لضيافتهم
انتبهت عمة اسيا جاي تباوعلي ..باوعت عليها جتي يمي وگالت
اسيا:- باعي عمة ..اكلج الكل جاي يشوفج
بيلسان:- اي؟
اسيا:- يعني اريدج تصعدين لغرفتج تترتبين شوي وتعدلين روحج
باوعت على روحي جنت لابسه دشداشه ماروني ولافه على راسي حجاب اسود
اسيا:- تخبلين عمة بس سمعي مني وصعدي اني احب الشخص اشوفه على اخر حبه
ابتسمت وهزيت براسي بمعنى اي
اسيا:- فدوة لهالوجه حبيبة
عفتها وصعدت للغرفة
اول مادخلت اخذت نفس قوي
احس طول ماجنت جوا جنت مختنكه وماداخذ نفس
يالله يالله
شون اتحمل اكمل انا شون ؟!!
اول يوم وهيج احس روحي طلعت وطاقتي مابعد تتحمل
فتحت الجنطه بعد مارتبت الغراض
ماعرف شنو اللبس بالبيت دائما لبسي جان تراكات او دشاديش مابعمري لبست هدوم مالبرا بالبيت
طلعت بلوز صوف سمائي ويه بنطرون كابوي
لفيت حجابي بطريقة ارتب شوي وخليت مكياج خفيف بناتي
خليت العطر ونزلت للمطبخ استحي ادخل عليهم
هسه العيون كلها تستقر علية وانا مو ناقصه ..
انا وواكفه افكر ويه نفسي ما احس الا شخص يدخل دخله فززتني من مكاني
شاب طويل نوعاً ما شعره شوي طويل سرح واكع على عينه
مو ابيض ولا اسمر ملامحة بسيطة ما عنده لحية ولا شوارب بس خفيييفة
مبتسم مدري هي ملامح وجهه وعيونه مبتسمة
بس هو اول ماشفته حسيتني اريد ابتسم واضحك قبل لا يحجي أي شي
مادري ليش !!
نطزت من الخوفة اباوعله شافني رفع حواجبه وگال
قيس:- انتي بنت عمو علي؟
بيلسان:- ا... اي
راد يحجي دخلت عمة اسيا من شافته ركض عليها حضنها
قيس:- هلا بعمتي الحلوة
اسيا:- الحمدلله هالسلامة ولك
قيس:- تمنيناج والله
اسيا:- شكد جذاب ماتعرف ابوك انت من تسافر
قيس:- على راسي ..بعدين غير رحنا نجيب بضاعه للمحل قابل طلعت اديح
اشرت بيدها وگالت:- ماكو احد يعرفك مثلي ..وين اخوك؟
قيس:- رجع للبيت
يحجي وعيونه كل شويه تصد علية
اسيا:- جدك مو كال ترجعون هنا!
قيس:- گال نعسان باجر الصبح يمرلكم
اسيا:- لا هسه يجي
قيس:- عمتي بعد بيتي ..لزمي تلفونج ودكي عليه من اروح فدوه لهالعيون
حجاها ورجع باوعلي مبتسم ..سألني:- بعدج اصغر مني بسنة؟
بيلسان:- مفتهمت؟
قيس:- مو اني اكبر منج بسنة حسب ماجانو يگولون ..بعد نفس الشي لو من غبتي عننا تغير الوضع
ضربته عمتي على صدرة وگالت:- تموت بالسخافة ماتعرف شون تبدي الحجي
باوعلها ويهز براسه:- والله حرام عليج تفشلينا كدا...
قبل لايكمل گلتله:- اللزم لسانك بنت عمك هايه
حجا بصوت خافض بس كدرت اسمعه
قيس:- هنيالي والله
عاطت عمتي:- يمةةةة قيس وصل ..روح ادخل جوا يلا لاتشوفني وجهك
كامت تدفع بي حتى يدخل وهو ديضحك
دخل وجتي يمي
اسيا:- صدقة لهالوجه هسه بينتي بنت امج
اخذتني وطبينا عليهم
ومثل ماگلت العيون كلها استقرت علية
كعدت بينهم ..عمتي نعمة وزوجها ابد ماشكلهم جانو حابيني وحابين وجودي
نظراتهم جانت خزرة مدري مصدومين
جهالها اربعة صغار اكبر واحد بيهم يطلع عمره ب١٣ والباقي زعاطيط وتارسين البيت خبصه من اول ما وصلوا ...
جنت كاعدة بنص هالمجلس يم عمتي اسيا وبيبي
بس شنو لو بيدي اطلع اركض
اباوع بوجوهم واسال بنفسي
هما هذوله اهلي؟ ..يعني هسه انا بالمكان الصحيح مفروض؟
ليش جاي احس بصعوبة وانو هالحياة كلها هنا
ماتناسبني ولا تشبهني!!
راسي صدع وكام يون علية من خبصة الجهال
واصوات الزلم العالية والنسوان تسولف
عيوني كامت تصورب ..
كامت عمة اسيا صار مجال بيني وبين بنان بنت عمي
ابتسمتلي واجت شوي تقربت من يمي
بيلسان:- بيا صف
بنان:- ثالث متوسط ..وانتي
بيلسان:- انا توني خلصت اعدادية
بنان:- يعني دخلتي جامعة
بيلسان:- اي بس بعد ماداومت
باوعتلها ..ركزت بملامحها ووجهه احس شايفتها قبل
وجهه مألوف علية مو غريب
حلوة ونازكة بس حسيت بشي غريب من شفتها زين وعن قرب..
شوي شوي بدا كل واحد يلتهي بشغلة
النسوان راحو للمطبخ والزم دخلو للصاله دايتفرجون عالاخبار
وانا بقيت لوحدي بالاستقبال ويه الجهال
واحد من الجهال جان كاعد بالكاع وبيده لعبة جانت مالبازي طير
وفلشها ماديعرف يرجعها
ادنيت من يما وكعدت سحبت اللعبة منا حتى اصلحها
انا وبهالوضعية سمعت صوت ضخم
صوت مو من ضمن الاصوات اللي سمعتها ..يگول
-السلام عليكم
باب الاستقبال جان يصير خلف ظهري
انداريت بهدوء ..صارت عيني بعينه
صفنت بي وصفن هو هم .. ماگلت بگلبي غير
هذا الشبل من ذاك الاسد!!!
طويل ..ضعيف وجتافة عريضة شوي
اسمراني ملامح وجهه مو حادة
بالعكس حتى عيونة نعسانة
لحيته خفيفة الشوارب ومن هاي النازله عالحنج مادري شسمها
بس خفيفة ومتناسقه ويه وجهه
جان لابس تراك قهوائي طوخ ..شعره مخربط ومبين عليه تعبان
فززنا ثنينا جدو وهو يحجي من الصالة
خالد:- هلا باوس هلا وليدي ..عرفتها هايه بنت عمك علي
رجع اندار عليه هو وواكف بالباب مالاستقبال
حجا هو ويباوعلي بنظرات مارضيتها
اوس:- اهلا
خالد:- هذا ابن عمج محمد
باوعنا لبعض ثنينا بين المستغربين ومسطورين مادري شسالفة
ابتسمت وگلت:- اهلا بيك
حجيتها وبسرعة انداريت عالجاهل سويت نفسي ملتهيها وياه
وانا كيفت كلت ماعندي هواي كرايب
طلع عندي شباب هم ولد عم
اللعب وينك حسنسن تجي تشوف بنت عمك! ..

حضروا العشا كمت وياهم اساعدهم
ولو جانو مامحتاجين شي بقيت واكفه مثل الشمعه بنصهم واصفن
حجو وياي حجي عادي مالشنو خلصتي وشونهم جانو اهلج وياج وجم اخ واخت عندج
هما گالوا هيج انا غصيت بالكلام
بس ماحبيت ابجي لو احجي شي خاص بيه كبالهم
گتلهم حان عندي وتوفت وهما هم حسوا من ردة فعلي انو ماريد اطول بهالموضوع ..
اللتمينا كلنا ...اول مره انجمع هيج جمعات
لمن جنت ببيتنا بيت اهل ابويه مايجونا هواي فقط بيت عمي منتصر
واهل امي مو قريبين علينه كل واحد بجهه بالمناسبات الخاصه كلش جنا ننجمع ..
لمتهم جانت حلوة بس لو جنت ماخذه عالوضع جان تونست
بحكم انو مامختلطه هواي وحتى اخوة ماجان عندي بالبيت
صح جنت طفلة هواي اطلع اللعب برا بس مجرد مابلغت ابويه منعني من انو اطلع بعد
ف تعودت اكون وجهي لوحدي واستحي من الخبصه والناس الكومة ..
بيت عمتي نعمة من خلصوا راحو راسا
ويكون احسن لان جهالها لعبوا نفسي
الوحيدة اللي حابتها من بين هالجمعات هي مرت عمي هاجر
حلوة جانت ناعمة ومرتبة
ابد ماحسستني غريبة جنها تعرفني من زمان ..
خلصنا وكمنا نلم بالسفرة
ترخصت اروح للحمام ..من المستحة الحمام يصير بصف الاستقبال اللي كاعدين بي الزلم
مارحت عليه صعدت على اللي فوك يم غرفتي
صعدت وهمزين سمعت صوت تلفوني يدك رحت ركض عليه
شفت المتصل ماما
جني شفت الجنة والله!!
من الفرحة واللهفه اريد ارد عاد ماعرف
جان اكو ممر جبير بطابق الثاني مثل الهول الداخلي
مخليله جم قنفة وسجاد بالنص
اخذت التلفون وكعدت هناك بس جانت عتمة
رديت بنفس الوقت بجيت:- الو ماما
-شلونج نور عيني ..مشتاقتلج ولج ماما اخذتي البيت ورحتي
بيلسان:- وانا هم مشتاقتلكم هواية والله احس صارلي كومة ماشايفتكم
سمعتها صورها مالوحده داتبجي
گالت:- هسه احجيلي شلونهم بيت جدج وياج وشداتسوين
بيلسان:- حبابين والله وعندي عمتين الوسطانيه كلش تنحب ومرت عمي هم تنحب ..يعني كلهم اول ماشافوني رحبو بيه هواي ويبوسون براسي
-الحمدلله الحمدلله ..اكسبيهم امي حببيهم بيج وهيشي حياتج
سكتت ودموعي تجري ..گتلها:- ماما يعني ..صدك انا مو بنتكم؟
سكتت سمعتها هي هم داتبجي ..غيرت الموضوع بسرعة
-تعشيتي لا؟
سحبت نفس:- اي كبل ساعة تقريبا ..اجتمعنا كلنا
-بيلا
بيلسان:- ها ماما
-ديري بالج على روحج زين بنتي ..وامانة عليج
امانة تسامحينا على اي شي سويناه مو عالقصد بحقج ادري من جنتي صغيرة تضوجين وتغارين لان ندلل اختج اكثر منج ..بس والله نحبج ولج انتي قطعة من روحنا ماتدرين من رحتي شصار بحالنا
غصيت بالبجيه بحيث كوة كام يطلع مني الحجي
بيلسان:- ماما ليش هيج تحجين ..تره شما صار والله والله ابقى اعتبرج امي ولو بعد الف سنة ..انتو اللي ربيتوني وتعبتوا عليه وعلى كلشي يخصني
تنهدت واحس تنهيدتها طلعت من روحي
-يلا امي ..روحي ما عطلج ومثا ماكتلج
حببيهم بيج واشتغلي واتحركي وسولفي
لاتبقين مثل العروس الجديدة
بيلسان:- حاضر
ختمت الحجي وياها ..شمرت المبايل يمي وسحبت رجليه لفوك وكمت ابجي بسكوت
شكد جنت صابره طول هاليوم هذا
مجرد ماسمعت صوتها رجعلي كلشي وانفجرت بحزني ..
فزيت من سمعت صوت حركة يمي
باوعت عيوني مغوشه بالدموع
ماحس الا ضربت عيني بصفحة
ولكيت اكو واحد متمدد عالقنفة اللي شوي بعيده عني ...
.
.
.
للحكاية بقيـــة

بدون مراجعة سويته ف اعتذز عن السحكات

#منة الله_الأيوبي