ليلة من العمر

البارت الرابع والثلاثون

نداريت عليها وگلتلها
بيلسان:- ابوية وغصباً عن اكبر واحد افتهمتي
باوعتلي وفتحت عيونها:- شهل اسلوب لج احترمي الجبير
بيلسان:- الجبير اذا احترم روحه احترمه بس ما اسمح لا الج ولا لغيرج يحجي هالحجايه لو يجيب طاري ابوي ..ايييي ابوي والحقيقي هم عجبج او ماعجبج ..ودقيقه هو وينه ابويه الاول؟ شو ماشايفته بس بالصور
نعمة:- ها متبرايه منا
بيلسان:-مامتبرايه ولا صخام بس الاب مو اللي يخلف ..الاب اللي يربي واللي يتعب ويسند .. متاكده لو ابويه الحقيقي جان عايش والله فلا جان راح يسويلي بكد ماسواللي ابويه اللي داتحجين عنه حضرت جنابج
كامت على حيلها وعاطت:- لزمي لسانج وعرفي شجاي تحجييين ماسمحلج تحجين على اخويه المرحوم ولا تمسيه باي كلمه
بيلسان:- انتي لزمي لسانج بالاول ولاتحجين جمل اكبر منج ..ارجع واكلج واكول للكل ابويه وغصب عنج رضيتي لو مارضيتي وراح ابقى طول عمري اعتبره ابويه وسندي وكل شي بهالدنيا هاي وحتى الحرمه اللي ماقبلتو ابقى يمها وخليتوني اتركها بحالتها الضعيفه هااااية امي وماعندي بس هي ام وماعندي بس اب واحد اللي راح قبل جم يوم جوا التراب واذا ماعجبج كلامي طززز وسمعي زوجج هالكلام هذا اعرفه يكيف عليه
انفعلت هواي وعلى صوتي الكل اللتم ويريد بس يسكت بينا
الكل طلع من الاستقبال واللي طلع من المطبخ واللي يعيط ويحجي ويسال شصاير
اخر جملة حجيتها بكل ماعندي من طاقه وانا دمي محروك ومتنرفزة صوتي كله طلعته
ماحسيت غير افترت الدنيا بيه واضوية السقف كامت تغوش شوي شوي لحد ما صارت سوده وماحسيت بشي ثاني ....
حسيت مثل الحلم عياطات يمي وصياح بقوة
بقوة بس احسه بعييييد عني دوخة ولزمتني رجفة بجسمي للحظات
وعلى غفلا انرفعت من الكاع ونركض بيه
وصعدوني بسيارة وراها انطفيت فعلاً ...

فتحت عيوني ..غووش نظري لحد ماتوضح شوي شوي
لكيت روحي بمكان كله ابيض
متمدده على سرير
ركزت طلعت مستشفى رفعت ايدي شاديلي كانونه
راسي احسه مثل الواحد الضاربني بكل قوته عليه
اريد احجي مابيه حيل حتى اتحرك
انفتح الباب وطب رجال شوي جبير
الدكتور:- ها عمو شون صرتي
ماكدر احجي بس غمضت عيوني
الدكتور:- ميخالف ميخالف تلتزمين على الادويه وكلشي يصير زين
اندك الباب
ندار للباب:- تفضل
دخل اوس بسرعه اجا ركض يمي وعيونه مبين الخوف والتوتر بيها
اوس:- شون صرتي
كوه حجيت:- شبيه شصار
اوس:- اغمى عليج
الدكتور:- بس هيج بنتي انتي صارلج شكد مماكله
اجا يمي ويباوعلي
بيلسان:- مادري
الدكتور:- سكريج نازل ..ضغطج منخفض ..صاير عندج جفاف حاد وفقر بالدم
باوعلي اوس بخزره
الدكتور:- كتبتلج ادويه ومشهيات تلتزمين عليهم احسن ماتتضاعف الحاله ونكون بشي ونصير بغير شي
دمعت عيوني هزيتله براسي
الدكتور:- بعد من شنو تعانين
باوعت لاوس صافنه همسلي
اوس:- احجي اي شي تريديه
رجعت باوعت للدكتور وگلتله
بيلسان:- دكتور صارلي مادري شكد ماداكدر انام
وراسي راسي ديموتني
صفن شوي وباوع لاوس گال
الدكتور:- اني ردت انطيج مهدئات ومنوم ..بس گلت خاف انتو متتقبلوه
باوعلي اوس وعيونه بيهن نظره ممفهومه وسألني
اوس:- تاخذين مهدئات؟
بيلسان:- اريد انام
تنهد ورجع باوع للدكتور وهز براسه
الدكتور:- راح اكتبلها تستمر عليه لمدة اسبوعين فقط لا اكثر
حجاها وتحمدلي عالسلامة وطلع ..
لزم ايدي وباسها خفيف
رفع راسه علية وعيونه دبلانه:- ليش هيج
بيلسان:- شنو
اوس:-ليش انتي والدنيا علية؟
دمعت ودرت وجهي
رجع دارني عليه وقرب وجها من وجهي
اوس:- اني شگلت؟ ..مو گلت صيري قوية
وهسه الكيج مماكله صارلج خمس ايام ليش بيلساني ليش دتسوين بروحج هيج
سكتت وبس دموعي تنزل
اوس:- تدرين كلش زين لو والدج موجود ماجان راح يقبل اللي داتسويه ..ومتاكد هسه هو ضايج بسبب هالحركات هاي
رفعت عيوني عليه وحجيت:- ضايج مني؟
اوس:- ضايج عليج
تعدل وسحب راسي على صدره
كمت ابجي بصمت
مسح على راسي وكام يحجي
اوس:-بس انتي عندي بهالدنيا كلها ..انتي قوتي وسندي وكلشي اللي ..إذا تأذيتي وضعفتي معناها اني راح اصير ولا شي
كمت اناشغ ولازمته من ياخته وابجي
اوس:- اشششش كافي ياروحه لاوس كافي ياعمره ..ول يابه يروحولج فدوه كلهم
وخرني مسح دموعي ويعدل بشعري
رفعت عيوني عليه:- غثتني
اوس:- انسي الموضوع ..من شوكت نهتم لكلام الناس؟
بيلسان:- ماتحمل احد يحجي هالكلام
ماتحمل احد يگلي هذا مو ابوج وهذولا مو اهلج
قرب ايده ومسح وجهي:- ماعليج من احد حبيبي
ولاتخلين كلام الناس يأثر عليج ويأذيج
نزلت راسي وسكتت ..رجع هو گال
اوس:- ماتدرين شصار بيه واني شايفج واكعة بالكاع لاحس ولا نفس
روحي راحت وراج والله
باوعتله ..عيوني صارت بعيونه ..
فجأة تقرب باسني من خدي بهدووووء
احس حرارة كامت تطلع من وجهي
وخر ووجها بس بقى قريب من وجهي
حجيت وانا خجلانه:- اوس يمعود
همسلي:- شسوي حلاوتها بوقتها
وخرته عني ونزلت راسي مستحيه
اوس:- يگلج لازم تستغل الفرص ..واني بالاستغلال هيج فرص ماكو مني
باوعتله عيوني تعبانة وابتسمت خجلانة
وخر وكام مبتسم ويعدل بقميصه وگال:- رايح اشوف الدكتور حتى نطلع
هزيت براسي
طلع ..تعدلت واعدل بنفسي بتك ايد لان الايد الثانيه بيها الكانونه
ربع ساعه هيج ودخل اوس ضايج
اوس:- كعدي ماراح نطلع
بيلسان:- شكو ليش
سحب كرسي كبالي وكعد وباوعلي عدل وجهه
اوس:- ماكو شي بس للاحسن باجر نطلع
كعدت مابيه حيل اوكف
وعيوني عليه
بيلسان:- اوس احجي امانة شكو لاتخوفني
اوس:- شبيج بس تخافين ماكو شي
بيلسان:- لعد ليش مانطلع
حك بلحيته وگال:- راح تاخذين مهدء اليوم وگال الدكتور للاحسن تبقين الليله هنا خاف جسمج مايتقبله او يصير بيج شي لاسمح الله
دمعت عيوني وگتله
بيلسان:- شيصير بيه يعني
اوس:-لا حول الله ول يابه شبيج انتي ماكو شي وداعت عيونج بس كال للافضل تبقى
بيلسان:- جم يوم
اوس:-بس اليوم ان شاء الله
وراها طلع ..خليت ايديه على وجهي وبجيت
يارب شوكت راح ابقى بهالحاله؟
يارب روحي داتروح شوي شوي ..خليت ايدي على گلبي
ماداحس بشي
رفعت راسي للسقف ..يارب يطلع كل هااشي حلم! ...