ليلة من العمر

البارت السادس عشر

ومقرب جسمة كله مني ..ووجهه ماينفصل عن وجهي الا بشوي
گلبي رجف ..
روحي انتهت ..
وعيوني جمدت ...
لحظات وبسرعة صحيت على روحي ووخرت وجهي وابتعدت
حس على روحة عدل نفسه وجسمة
وشغل السيارة ومشى
كلشي ماحجينا بعدها ..واحس حتى ماكدر اباوعله بقى وجهي عالجامة
وصلنا بيت جدي وجانت بالثمانية وشويه
تاخرنا هواي والكل جان واكف بالباب منتظرنا
بي نزلنا استغلت الهلاهل والخبصة والجكليت ينذب فوك راسنا
طبعا من طلعت من الصالون لبست على جتافي شي مثل الشال او البشا يعني ماجنت مفرعة بطرك القستان افرفر ..
هلو هلو كل هالحركات بالاستوديو ونحنا ماعاقدين!!
اعتقد ماجانو يدرون باللقطات اللي اخذناها
افكار قيس ..وقيس ههه اعتقد كلكم عرفتوه شونه
لبسوني الشال عدل وخلوه على راسي هم ..وطلب السيد ادخل
دخلت وانا منزله راسي ..جانت عمة اسيا لازمتني وتمشيني
لحظات احس انكطع النفس بيه
كعدتني عمتي بمكان لوحدي والزلم كلهم كبالي
مارفعت راسي ولا باوعت لاي واحد ..جان عقلي مشوش
وروحي احس بداخلها فوضى فوضى ماتنوصف
كعد يمي اوس والسيد
بقيت منزله راسي واعصر بيديه وعمة وعمي محمد يمي داحس بيهم
لحظات جانت داتعبر على گلبي
المراسيم كلها ماستوعبت شصار من كثر الدوخه والخبصه الصارت وصوت لغلغة الزلم والسيد يمي يحجي ويردله اوس وعمي محمد
لحظات احس عيوني صارت مضببه بيها ..
تمت واخيرا مواسيم العقد ..وسمعت صوت الهلاهل والصياح
واوس كام يسلم عالزلم ويباركوله واسمعهم يباركولي وانا بس اهز براسي ومبتسمه من جوا
بقيت كاعده بمكاني ماعرف شسوي ..جتي عمتي علية
اسي:- كومي يمعوده شنو عجبتج الكعده هنا
ماكدر ارفع راسي البشت فوكاي وثكيل واخاف تتخربط التسريحة
مديتلها ايدي كومتني وكامت تمشيني ..طلعتني من الاستقبال دخلتني بالصالة جانو النسوان كلهم هناك
سحبت البشت من راسي ..بس رفعته وكعت عيني بعين امي
ماتصدكون كمية الامان اللي حسيته من شفتها بين العالم!
احس كلشي جان مظلم الا هي ومكانها جان مثل النور طالع منا
رحت ركض عليها حضنتها ..هي تبجي وانا گلبي ينعصر على وضعي
سحبتها كعدتها يمي ولازمه ايديها بقوة مثل الطفل
- اروحلج فدوة يا ماما ..عشت وشفتج عروسة ولج مامصدكة
بيلسان:- جنت خايفة ماتجون
- معقوله يعني؟
بيلسان:- بابا هم اجا؟
- اي اصلا من سمع الخبر من اتصل علينا عمج محمد واخذ رأيه وهو فرحان حتى يجي ويشوفج
بيلسان:- أخذ رأيه
تقربت وهمستلي:- اي يعني مثل انو شرأيك بما انو انت بمقام ابوها ومادري شنو ..وكعد يمدح بابنه ويگول مو لانه ابني بس صدكني ماتلكون مثله نأمن على البنيه عنده
عوجت بحلكي ..ضحكت وضربتي على ايدي خفيف
- ولج لايشوفوج شبيج ماراضيه
تنهدت وگتلها:- وشگال بابا
- گللهم البنت بنتكم وانتو اكيد ماراح ترضولها الا الشي الزين ..بس هاا قبلها سألهم گللهم هي شنو رأيها
گله عمج موافقه ..رجع ابوج گله لعد بيها الخير اهمشي هي
هزيت براسي:- وهسه وينه بابا
- ويه الزلم كاعد ..ليش ماشفتي من دخلتي
بيلسان:- ماكدرت جنت منزله راسي ..اريد اشوفة
حجيتها ونداريت ادور على عمتي اسيا
شفتها واكفه بين النسوان ..كمت وسحبتها وهمستلها
بيلسان:- اريد اشوف ابويه
اسيا:- اي حبيبة هسه من تلبسون الحلقات والخطار يخف راح ندخل للاستقبال
هزيت براسي ورجعت لمكاني
بقيت كاعده يم امي ولازمه ايديها ..واباوع عليهم العالم كلها بغير دنيا
اللي فرحان واللي ديركص واللي كاعد يحجي مبين عليه وعلى بيت جدي
جانو جايبين عالم كومة وكلهم ماعرف ولا احد بيهم
بس اشوف خاله هاجر كل شويه توكف ويه وحده وتسولف وتاشرلها علية ويحجون اعرف داتعرفها علية وداتحجيلهم القصة كلها ..
شوية وگالوا راح يدخل العريس
فزيت وگلبي كام يرجف ..هسه هذا شيدخله
مو ارتاحيت شوي ..همزين امي كاعدة يمي حتى على الاقل احس بالامان يمها ..
دخل اوس منزل راسه ويمشي ..اجا وكف يمي
ويحك بلحيته كل شويه ..جابت عمتي الحلقات وخلتهم كبالنا
يالله استحيييت شون راح يلزم ايدي شون راح اللزم ايده
شغلات اول مره اعيشها صعبة وماداعرف شنو اسوي
اخذ الحلقة وباوعلي ..رفعت ايدي وهي ترجف
بس لزمها ..جسمي كله انتفض ومثل الصاعقة الكهربائيه ضربتني كلني من فوك لجوا
حتى هو احسه حس علية
لبسني الحلقة ..صار دوري
كمت ارجف بعد بالاكثر ..لزمت ايده جان مبين عليه متوتر مثلي
واباوع من كد ما متوتر وايده طالعه دماراتها حسيتهم راح يطكن علية
بالكوة دخلت الحلقة باصبعة
واخيراً ...
وانزرفت اذانا بالهلاهل واللي يطش جكليت واللي يعيط مو يهلهل
انداريت اباوع امي تبجي
ويه بجيتها كمت ادمع وكوة لازمه روحي ما ابجي
اوس واكف يمي وهي وراي ما احس الا تقرب من امي وسحبها باسها من راسها
ومادري شكام يهمسلها ويحجي وياها
صراحة؟ ..حبيت حركتة هاي
حسيته كبر بعيني ..رجع لمكانه يمي
باوعتله وهمست:- شگلتلها؟
نزل عيونه علية وباوعلي بنظرة "ماعليج" واندار
خزرته ونداريت ..عما وانا اللي گلت استعدلت شوي
بس مايفيد ..
كعدونا واحد يم الاخ وواضح جان كاعد على اعصابة
وانا كاعدة ولازمه ايد امي وكأنو راح تطير
كلش جان واضح علينا نحنا الثنين ماراضيين وكاعدين على اعصابنه
كل شويه وحده كبل ماتروح من المعازيم تجي تاخذ ويانه صورة وتروح
استحي كلما نكوم نوكف انا واوس جسمي يطخ بجسمة
وانا نزعت البشت بقيت بس بالفستان صح جان مستور نوعا ما
بس مادري احس تلزمني صاعقة كهربائية ..
شوية واشر اوس لعمتي اسيا ..جتي علينا وتقربت عليه
تقربت اسمع شيحجون
اوس:- گوليلهم كافي صور
اسيا:- يااا ..عمة خير الكل فرحان على فرحتنا
اوس:- اي ويعني يفرحون لازم ياخذون صور ويطشر العرض بين العالم كلها
اسيا:- شبيك عمة ..حتى اللبس مستور بس الشعر مفتوح شكو بيها
هز براسه:- لا ماريد كافي
باوعتله واشرت بيدها:- اوي منك
راحت من يمنا ..جنت داباوعله ضايج
ندار صارت عيني بعينة ..اشرلي بمعنى "شكو"
نداريت من عنه ...
خفوا المعازيم والحمدلله
وخدودي راحت من كد ماباسوني
وانا كاعدة على نار انتظر ابوية اريد اشوفه
بقينا بس العائلة
جتي عمتي تركض وخلت الشال على جتفي لان راح يدخلون الزلم
اول مادخلوا وعيني تدور على ابوي
اجا جدي وباسني من راسي انا واوس
وانطا كلاده ذهب لخاله هاجر جتي لبستني هي
خالد:- الف مبروك بنتي اشوف جهالهم ان شاء الله
اوس:- الله يبارك بعمرك جدي
اجا بعده عمي وهم بوسني وقبل لا يوخر باوعلي وياشر باصبعه
محمد:- ديري بالج على حفيدنا الاول ..وانت خليها بعيونك لك
ابتسمنا ثنينا ونزلت راسي
حسيته ديباوعلي اوس مانداريت عليه ولا هتميتله ..
رفعت راسي وما اشوف الا ابوي يصير كبالي وعيونة مدمعه
ماهتميت لاحد اصلا حسيت العالم كله فرغ
راسا حضنته وابوس بي من جتفه وهو يشم بشعري ويبوس بيه
وخرت امي واجا كعد يمي
كعدت وانداريت عليه ولازمه ايديه ثنيهم
عيوني بعيونه وانا مليانه عيوني دموع
- الف مبروك ..الف مبروك ياروح ابوج انتي
بيلسان:- شلونك بابا
تقرب وهمسلي:- اشوف بعيونج نظره غريبة ..شبيج بنتي
بيلسان:- مشتاقتلكم
- مرتاحة؟
الغصة طلعت اريد اجاوبة بعد ماكدر
بسرعة غيرت الموضوع:- ماما گالت مريض شبيك سلامات
تنهد وگال:- اي هاي سوالف صعود وهبوط الضغط ..كبرنا بعد
بيلسان:- لا بعدك شباب حتى شعرك بعده اسود ..وين الكبر وينه
امي جانت كاعدة يمنا ..مدت راسها بينا وگالت:- تره كله صبغ
ضحك ابويه:- باعي باعي هاي كلها لان كلتي بعدني صغير
بيلسان:- اي وشكو بيها
- مو تخاف لا اتزوج
ضحكت:- هااااا ..اذا انت صغير لعد امي شونها
دزتلي بوسه بالهوى وگالت:- فدوه اروح لحلكج
كمت اضحك عليهم ..نداريت اوس وراي ديباوعلنا ومبتسم ..
كاموا امي وابوي راسا كمت وياهم
بيلسان:- وين
طبطب على ايدي ابوي وگال:- كافي راح نرجع
بيلسان:- الوقت تأخر وين تروحون
كام اوس هم وتقرب من يمنا
اوس: عمي شو وكفت
- كافي نريد نرجع يا ابني
اوس:- وين يمعود حتى الوقت مابقى
- هسه نمشي شوي شوي حتى نلحك
بيلسان:- بابا الطريق طويل وانت تعبان ومريض
- ولج صدكتي امج تره كلشي مابيه
بيلسان:- ميخالف الله عليك نامو هالليلة هنا
اوس:- عمي صدك تحجي
راسا باوع لجدي وگال:- جدي الجماعة رايدين يرجعون هسه
خالد:- لالا ماكو رجعة ماكو
وخرت لان جنت واكفه بالنص
حط ايده على صدره ابوي وگال وهو يباوع على جدي:- تسلم ابو محمد والله ماتقصر وجعل بيتك عامر ..بس كافي
خالد:- ماكو كافي يمعود ماكو طلعة
- يا ابو محمد والله
حجا جدي قبل لا يكمل:- انت منا وبينا ماكو هالحجي ..ماتطلع والله
- ماكدر ابقى هواي والله باجر عندي دوام تعذرني
محمد:- لعد على الاقل ابقى عالعشة ..حتى مو حلوة تطلع هيج وقت
خالد:- يلا يا حرمات هالبيت جهزولنا العشة
باوعت لابوي رجع كعد ..وانا مبتسمة عيوني كبل شفايفي
جانت يمي بيبي دغمتني من رجلي باوعت عليها
اشرتلي اتقرب ..نزلت نفسي يمها:- كومي بدلي عالسريع هدومج حتى تساعدين عمتج بالعشة
هزيت براسي باي وشلت الفستان وصعدت ركض لغرفتي
فرحة مو طبيعية صارت بقلبي
فرحت يعني راح يباتون هنا!!!
جيت ابدل دانزل بردان الفستان وكعت عيني عالحلقة
ماريد اعكر مزاجي ماريد ..خلي على الاقل هاللحظات فرحانه
عالسريع لبست مثل الجلابية مامسحت المكياج ولا فتحت التسريحة
بس خليت حجاب هيج شمرته على راسي ونزلت ويه عمتي بالمطبخ
احسني طايرة وانا اعبر من يم الصالة واسمع صوت ابوي واشوفهم كاعدين هو وامي هناك
ياربي شعور ماينوصف بس من اتذكر اليوم جانت خطوبتي گلبي ينعصر واحس نفسي اختنك ..
احنا وبالمطبخ كلنا النسوان
دخل قيس بس شافني كام يفر بالسويج مالسيارة
قيس:- هيل وطش بالولايةةة ..اعذريني لو اعرف اهلهل جا هلهلت
باوعت عليه خاله هاجر:- تكفي تغريداتك
قيس:- كافي وجودي والله ..الله يديمني
باوعتله عمتي:- قيسان ماتعرف وينه ايسر
هاجر:- ليش مو هنا
اسيا:- دخلت لغرفته مالكيته ..مانتبهت شوكت طلع
هاجر:- اني هم والله ماشفته من طلع
قيس:- لايضل بالج اكيد طالع ويه جماعته
تنهدت عمتي ودارت وجهه بضوجة ...