حجا بصوت مبحوح
اوس:- ماكو الا هنا تحجين بي؟
كمت على حيلي فزيت
امسح بعيوني وانا احاول استوعب الفشلة
بيلسان:- اعتذر والله ماشفتك هنا نايم ..اسفة
يباوعلي ورافع حاجبه بضوجة
دار نظره عني على غفلا
فد استحيييييت تمنيت الكاع تنشك وتبلعني
واذكرت حتى حجاب مالابسه نزعته من دخلت جبت التلفون
وشعري مفتوح بس زين جنت لامته
ياربي ياربي شهل فشله
سحبت المبايل وطبيت ركض عالغرفة
وبقيت انتظره يا ينزل او يغفى حتى اكدر انزل لان غرفتي تصير كبال الهول ..
بيت عمي محمد بقو يمنا
بقينا لليل كاعدين انا وعمتي ومرت عمي وبنت عمي
نسولف عن كل شي مابقوا احد ماحجو عليه وعرفوني على عالم كومة
وانا بس اضحك وهز براسي بمعنى اي
نمنا ليلتها كلنا بغرفة عمتي فرشنا بالكاع والغرفة بيها سريرين واحد لعمتي واحد نامت عليه خاله هاجر ..
ثاني يوم كعدنا من الصبح وكمت وياهم نحضر الريوك
جدي وبيبي جانو كاعدين ويانه بالمطبخ
لان جدي حسب ماعرفت اول مايكعد لازم يشرب قهوه
دخل قيس يفرك بعيونه
قيس:- ها يابه ..بيت خالد شمسين شارقة عليه اليوم
باوعتلي عمتي ورجعت باوعتله وگالت:- صباح النور بعد توك كعدت
قيس:- ايييييه
انا جنت منطيتهم صفحتي وداحضر بالاكل
اسيا:- ام اوس شوفي ابنج
هاجر:- قيس روح اكعد عاد يم جدك لا بينا احنا ودانشتغل
قيس:- ماروح ..كبل جنت اتقشمر بهالحجاية لان جان ينطيني ربع هسه الربع وين اخليها
سيا:- ياجذاااب صدك ينطيك ربع
انتجا عالثلاجة وگال:- الحقيقة تقال لا والله ..كلشي مينطيني اصلا
ضحكت ماتحملت اسكت
وعمة راحت عليه ضربته على صدرة
انا وداضحك دخل اوس يحك بشعرة ولحيته
ومبين عليه روحة بخشمه
شكد بعكس اخوه يالله
اوس:- صباح الخير
جليلة:- هلا يبعد روحي ..شبعت نوم يمة
سحب الكرسي وكعد گال:- يعني
اسيا:- خااااي من البارحة الساعه عشره انت نايم يمعود
من گالت هيج سند راسه خله ايده على ركبته وباوعلي بنظره سريعة
وگال:- اي شون ..من العشرة نايم
فد استحيييييت
تمنيت الماع تنشك وتبلعني فوكاها بجيتي ونوحي كلها ماصارت الا فوك راسه
راسا انداريت وسويت نفسي مشغوله بتحضير الاكل ..
صارت خبصة والكل اللتم
اجواء حلوة
واللمة دافيه
اصفن بوجوهم واحد واحد
كلمن متأقلم وعايش لحظاته بهالبيت
اللتمينا كلنا عالريوك بس عمو محمد ماجان موجود
اوس:- ايسر وينه؟
جليلة:- وينه غير متفوس نايم ..هالدايح احسن لايكعد ويشوفنه طلته البهيه
حجتها بحرگة گلب
استغربت بسرعة باوعت لعمة اسيا
نزلت راسها وكامت تلعب بالاستكان حسيتها متعوده عالوضع
الظاهر هالايسر سالفته سالفه
صار دقيقة صمت بعد هالحوار
بس بسرعة كطع الصمت قيس وهو شايل شيف طمامة ويگول
-هو هذا هم حز؟
اخليه باللفه لو اروح احارب بي على ثخنه
هاجر:- ليش ابني شبي
حجا بصوت ناصي وهو منزل راسه:- شكبره ..تنطوه لحيوان ماياكله
باوعله اوس وردله بصوت ناصي كوة ينسمع
اوس:- من هيج ماكلته
كتمت ضحكتي بس بنان كامت تضحك غصت بالضحكة
ماتحملت باوعتلها وكمنا نضحك
باوعلي قيس وگله لأوس:-راح اعديها لخاطر ...
اوس:- قيس
زكح بيه حتى قيس باوعله ورجع گال:- شبيك جنت اقصد بنان
سحب سبحته جدي اللي عالكاع وگال:- خلصوا بسرعة ورانا شغل
بنفس الوقت دخل عمي محمد من برا باوعلنا ووجهه ضايج
محمد:- ماخلصتوا؟
قيس:- يابه بعد وقت
محمد:- صارت شغلة ضروريه
ندار عليه اوس وگله:- شنو ..البضاعة؟
محمد:- لا
باوعلي عمي ورجع باوع لجدي وگال:- خلصوا منتظركم
طلع وراسا كاموا يغسلون اوس وقيس
وراها جدي هم طلع وياهم ..
كمنا نحنا هم نلم الاكل شوي شوي ..
جنت بالطابق الثاني طلعت من غرفتي مريت بالصدفة من يم الممر
سمعت صوت عمتي من غرفة جانت اصواتهم طالعه
اسيا:- تعبتني والعظيم تعبتني ..راح تموتني ناقصة عمر تدري لو لا
ايسر:- ليش شصاار شسويت
اسيا:- شوكت تصير ادمي ..داحجي وياااك ماتدير وجهك دبسزز
ايسر:- مادكليلي شبيج مدرعمة من الصباحيات ..تارسه براسج وجايه علية
اسيا:- انجب ولاتقلل احترامك على بيبيتك لا اكسر راسك
ايسر:- من هما يحترموني عود احترمهم
اسيا:- احترم روحك بالاول حتى يحترموك ..اني لشوكت ابقى احجي وانصح لشوكت يعني تره كبرت صرت بكد المطي وبعدك متعبني
تقربت ردت اسمع بعد
سمعت صوت خبصة وضرب بواب من جوا
نزلت لنص الدرج لكيت مرت عمي وبنان واكفين ووجهم اصفر مادري شيتهامسن
ياستار ياربي هذولا حلت عليهم لعنه لو شسالفه
نزلت يمهم وگلت:- شكو خاله
هاجر:- مادري رجعوا وجدج نااار
بيلسان:- ليش
هاجر:- والله مادري
تقربت بنان وهمست:- راوي جان وياهم
هاجر:- مادام هذا بالسالفة معناها اكو مصيبه
بيلسان:- ليش منو هذا
باوعتلي بضوجة وعوجت حلكها:- زوج عمتج نعمة ..راس المصايب
ردت اكللها مبين عليه وجهه وجه مصايب
من اول ماشفته مارتاحيتله ولا دخل قلبي ...
واكفين قريب على باب الاستقبال ونتهامس
سمعنا صوت جدي عاط عيطة وگال
خالد:- اعرف شداتحجي مو جاهل بعمرك اني
محمد:- يابه هدي ماقصده شي اكيد
خالد:- لا شنو يعني يجذبنا كلنا وهو الوحيد الصادق
تقربنا نسمع بعد
فززنا طلع قيس من الباب وباوعلي گال:- تعالي
حجت خاله هاجر:- شكو قيس شصاير
قيس:- بعدين هسه بس تعالي دخلي
گلبي كام يرجف
دخلت ووكعت عيني بعين هذا راوي
اباوع على جدي صاير نار بحيث رجله ماوكفت من الهز
محمد:- كعدي روفان
باوعتله والف سؤال بقلبي:- شكو عمو
محمد:- كعدي واحجيلنا
لساني انعكد كعدت بهدوء وانا كوة تطلع مني الكلمة:- على شنو
تعدل اوس بعصبية وگال:- احجيلنا شحجولج اهلج لمن عرفتي عندج بيت جد وانو مو هما اهلج
باوعت بين جدي وعمي محمد وحجيت:-حجالي ..انو والدي لكاني بالطريق جانو يعني شافو الحادث مالاهلي ومتوفيين فـ ...
كبل لا اكمل اشر بيده هذا اوس قاطعني
معنى دولي وگال:- شهل فلم يمعودييين
باوعتله مصدومة:- نعم؟
راوي:- ربكم بس يعلم شنو مصلحتهم من هالسالفة
يحجي بطريقة وحركات مستفزة ..ماتحملت
باوعتله وگلت:- عمو على الاقل احترم ابوية
تعدل وباوع لجدي گال:- هااا بلسانج بعدج دگولين ابوية
قيس:- ادري يعني وين تريد توصل ..مافتهمناك
راوي:- اللي رايد افهمكمياه ..مافتهمتوا الموضوع ولا دققتو بي جيتو بكل غشامة رحتوا جبتولي وحده مدري منين عالعرف ودكولون بنتنا وخليتوها بيننا
يباوعله جدي بهدوء وگله:- راوي حجينا ويه الرجال وسولفلنا السالفة كلها مو مصلحته يجذب ..كافي تسوي نفسك الفهيم الوحيد بهالموضوع قبلك حجينا وافتهمنا السالفة
رجع انتچا ضهره:- ايييه عمي بربك تصدكة
مبين عليه ميت على الدنيا ومابيها وراح باعلك بنته ..
هو گال هيج
احس مابعد اكو قطرة دم بجسمي
باوعتله وگلت:- ماسمحلك تحجي عنه نص كلمة حتى ولو جان مو والدي
محمد:- السالفة ماتنحل هيج ..هدو وخلونا نحجي بهدوء
راوي:- من باجر نسوي تحليل DNA ونشوف
محمد:- دقيقة ابو شاكر ..شو انت تقرر من كيفك ومامخليلنا أي رأي
كام على حيله وگال:- والله لانكم غشم ومتعرفون شداتتصرفون باجر عود من تستلملك ورث اخوك وتخليه بيد ابوها تنتهي اللعبة
عاط عمي:- عيب هالحجي راوي
بيلسان:- نحنا مو بحاجة الفلوس وشبعانين الحمدلله
باوعلي وضحك ضحكة مستفزه
خالد:- كلنالك افتهمنا السالفة كلها وعرفنا الحقيقة ..مو انت هسه جاي تعلمنا شنو نسوي وشنو مانسوي
راوي:- انت لو ماخذني وياك ماجان صارت هاللعبة كلها
جليلة:- دكافي عاد مصختها
اشر بيده وهالحركات المستفزه:- يمعوده زين طلع صوتج
باوعتلها خزرت بوجهه
تعصبت وگتله:- ماسوي تحليل وشتسوي سوي ديلا
راوي:- اي طبعا ماتسوين ..طبعا
محمد:- الامور ماتنحل هشكل ..نحنا مو جهال
اوس:- تره كلامه صح ..راح تنحسب باسمنا
باوعتله يحجي بدون مايباوعلي
قيس:- اوس شهل حجي ..يعني تشگگ بجدك معقوله يعني دتعبر عليه سالفة مفبركة
راوي:- تعبر تعبر ماتعرف الدنيا شون صايره مفبركة كل ناسها علمود جم فلس
ردت احجي قاطعني اوس وهو يباوع لجدي گال:- جدي خلي نسوي التحليل
راوي:- لا هي مو بكيفهم نسوي نسوي
جليلة:- شقصدك مو بكيفهم ..مو بكيف منو يعني
راوي:- عمة فكري بيها ..هايه سالفة نسب وباجر بعد باجر الله يطول بعمرك تجيكم سالفة الورث
محمد:- يعني انت ماهمك بس الورث ..شلحيت بي يمعود منو يعيش يموت محد يعرف
راوي:- افتهمني ابو اوس ..انت جبير وفاهم
قيس:- تره جدي اكبر مننا ويفهم اكثر مننا كلنا ..وعوفوا سالفة الورث هسه بشرفكم
رجع كعد وگال:- اسمعو مني وخلي نسوي التحليل ..وتتوضحلنا السالفة شنو خسرانين يعني؟
اصفن بيهم والغصه وصلت لبلعوني
اول مره اتخلى بهيج موقف صعب
موقف احسه شلني عن كلشي
شنو اسوي وشنو احجي ماعرف
اصفن بيهم وجه وجه واحس روحي دخت من المغثه
مرات تنغث لدرجة تحس روحك جاي تطلع من قوتها ..
اباوع لجدي رافع راسه ويباوعلهم واحد واحد
وهذا ياشر بيديه ويحجي بانفعال
انفعال مستفز ..وكأنو راح اخذ الورث منا
حجا جدي بعد صمته القاتل
-خلصتوا كلامكم؟ ..كلمن انطا رأيه بالموضوع؟
باوع لراوي وأشر بيديه:- بعد كلامك هذا وطريقتك واسلوبك
والله والله ..ماسوي التحليل وروفان بنت علي ابني وراح تبقى يمنا
اللي عجبه الحجي اهلا وسهلا ..واللي ماعجبه براحته
كلمتي ماتنزل عن الكاع لو منو يجي يحجي بعد ..صاااار؟
اباوع لوجهه انصدم وبقى صافن بجدي
راوي:- ابو محمد انت صدك تحجي؟
هزلة براسه وگال:- اي والله صدك احجي
يباوع على واحد واحد سكت شويه
نظراته يالله مستفزة مستفزة
وانا كوة كاتمه الغصة اخاف احجي لان اعرف راح ابجي
وماريد ابجي
الكلام واكف ببلعومي مثل السجينة
مصدومة مصدومة من الموقف كله
هز براسه گال:- ابقو ساكتين انتو ..عود من تنباگون ذاك الوقت تعالو كولوا جان كلامك صح
صحت بي:- كافيييي عاد مطلعنا حرامية
عيب انت ماتعرف شي عن ابوية تحجي عنه هيج بيا صفة ..
باوعلي وضحك بوجهي
محمد:- سدو السالفة كلما جاي تحجون بيها داتعقدوها اكثر ..ابوي انطه كلمته وغصب علينا كلنا نمشي بيها
قبل لايحجي شي عاطت بيبي:- راوي
الجهال ونعمة منتظريك ..البنية يتيمة وماريد بعد اي كلمة اتجاهه
هز براسه بعصبية
واحس دخان جاي يطلع منا
طلع وسد الباب بقوة ..
خالد:- احجي محمد ..بداخلك كلام طلعه يلا
جليلة:- لاحولة ولا قوة الا بالله لحيتو لحيتو
باوع عمي محمد لجدي وحجا بهدوء:- يابه ..اني سكتت ماردت اناقشه لان اسلوبه جان مو حلو وماردت اطولها
بس تره كلامه صحيح
خالد:- الناس اللي وصلولي الموضوع اني واثق بيهم ..مايجيني هسه هذا ويكعد يتفلسف براسي
باوعتله وگلت:- عمي شنو تقصد يعني ..احنا نصابين وداخلين نبوكم؟
ردلي اوس:- احنا ماگلنا هيج ..بعدين انتي ليش احترك دمج من گال نسوي التحليل
صفنت بوجهه شنو ارد عليه هسه؟؟!
-احترك دمي؟ ..شنو يعني هاي حجايتك
جليلة:- اوس دورك يعني دورك هسه
اوس:- والله شلون ماتفهمها خلي تفهمها
بيلسان:- راح اسكتلك بس لان ابن عمي الجبير
باوعلي:- هو وين اليثبت انتي بنت عمي؟
باوعت لجدي والدمعه بعيني
المشكلة ماعرف شنو احجي
وهالمشكلة مخليتني ابين انا صدك جذابه وماعندي شي احجيه
قيس:- هسه انتو شجلبتو بسالفة التحليل ماعدكم طريقة تأكيد غير هاي والله حتى عيب
محمد:- نحنا مو الا التحليل ..بس لازم نتأكد من السالفة احسن
باوعلي وگال:- بنتي مو قصة مشككين بيكم ولا قصدي احجي على والدج ..بس حتى نتأكد خاف صاير سوء تفاهم
خاف يعني نفس السالفة صايره بس مو بنفس عائلتنا واحتمال والدج بنفسه يعني غلطان وفاهم غلط
جليلة:- لا انتو رايدين بس تشككون مو سالفة تأكيد
محمد:- يمة داگلكم انا وياكم ..طريقة واسلوب راوي غلط ونعرف غايته عليش وعليمن خايف
بس الموضوع صح ..ضروري نتأكد ومو خسرانين شي
مانبقى على عرفتة هذا وكلام ذاك
رجع اوس عدل كعدته وگال:- والله ماتنحل الا بسالفة تحليل
باوعتله:- والله اتمنى اسوي التحليل ..واتمنى اطلع مو بنت عمك على الاقل ارجع لأهلي ولا ابقى بهالموقف الخزي وعند ناس مشككين بيه بعدني باول يومين
كلهم باوعولي
حجيتها بحرگة گلب ..الدمعه بطرف عيني وگلبي يرجف رجف
عيونهم احسها اكلتني اكل
واحس لصتها من گلت هيج
ولو ساكته احسن ...
.
.
.
للحكاية بقيـــة
#منة الله_الأيوبي
أنت تقرأ
ليلة من العمر
Chick-Litكل شي يتحول فجأة ، كل شي تغير فجأة وكأنُ كل أيامك الحلوة عشتها بليلة وحدة .. . . يـ رب العين هاي العين ماترضى بوجه غيره يـ رب عينه وحگ عينه حسرتي لشوفته چبيرة يـ رب العين مشتاگتله ماجتها مراسيله يـ رب العين إذا تبچي أراضيها بتفاصيله باوعلي ...
