ليلة من العمر

البارت السادس والعشرون

فزيت على صوت خبصة وهوسة
وصوت اوس ديصيح ..
فتحت عيوني اريد اصحصح ..دخلت عمة ركض للغرفة وبيدها الجنطة تلم بالهدوم
شافتني:- كومي يلا بسرعة
تعدلت:- شكو
اسيا:- راح نرجع
باوعتلها بصدمة:- ليش
اسيا:- شمدريني اوس گال طلعله شي ضروري
بيلسان:- بس هيج فجأة يعني
اسيا:- يگول نلحك اول طيارة ..دكومي يابنتي هسه بلا اسئلة
كمت ولميت بالفراش
طلعت جان مخبوص ويخابر بهالتلفونات مادري ويامن ماكدرنا نسمعة
بس مبين عليه العصبية والخبصة
حضرنا غراضنا حتى نرجع ونتراكض منا ومنا
وجنا مخبوصين نريد نلحك قبل مايوصل الاوفر باص يلمنا يودينا للمطار
لمينا كل غراضنا واوس يخبص بينا فلان شي وفلان شي لاتنسون ويعصب جان شكله هواي متوتر واحنا على ترترا توترنا
لمينا كلشي وطلعنا من الشقه ننتظره جوا
جانت الدنيا بارده ثلج بحيث اني ماللبست حجاب لبست كبعين من البرد
واطك سن بسن من البرد
مع العلم جنت لابسه هواي بس هم بارده
وواكفين يم مكان اللي يوكف بي الاوفر باص نحنا وغراضنا وهوستنا
شافني اوس خاتله ويه روحي
ماشوف الا نزع لفاحته واجا يريد ينطيني هي
كتله:- ماريد مو بارده
اوس:- اي واضح من رجفتج باعي خشمج احمر
بيلسان:- مو بـ...
قبل ماكمل سحبني انا جنت مخليه ايديه بجيوبي ماكدرت اصده
سحبني وتقرب لف اللفاحه علية وغطا خشمي بيها
كفخني العطر اللي بيها
كزبر جسمي ومدري شون شعور تملكني
أوكي عطره حلو للمرة المليون !..

بقينا هواي مادري شكد
واوس يروح ويرجع ويباوع عالساعه
شويه وصاح
اوس:- تاخر ابن الاوادم تاااخر
وسحب تلفونه مادري منو كعد يخابر
شوية ومانشوفه الا نخبص يسد تلفون ويخبر ويسد
اسيا:- عمه شصاير شبيك
اوس:- نسانه
حجينا ثنينا سوا اني وعمتي:- شنو؟؟
اوس:- حيواان اكو احد يسوي سوايته
اسيا:- وهسه شراح تسوي
اوس:- طلبت تكسي بس ادعو مايتاخر ويفوتنا موعد الطياره
توترنا كلش واني من هيج مواقف احس الدمعه تجي بطرف عيني
مادري يعني جان قلبي مقبوض هواي وهاي النغزه ماجاي تروح من گلبي اريد بس نرجع عاد
وطكيت من توتر اوس دمرني ..
شوية ومانشوف وصل التكسي وكف كبالنا
راسا صاح اوس
اوس:- يلا بسرعة صعدو
كومت عمتي وركض صعدنا بالتكسي وانطلق بينا للمطار
اوس كل شويه يباوع عالساعه الي بيده ويضرب برجله ويزفر
اعتقد تاخرنا هواي وانا وعمتي وحده لازمه الخ وندعي مايروح علينا الوقت
شوية وهمستلي عمه
اسيا:- اكلج
بيلسان:-ها عمه
اسيا:-انحصرت
بيلسان:-هسه وكتها
اسيا:-اي والله اني من اتوتر هيج
بيلسان:-تحملي عمه تحملي
اسيا:- شتحمل احد كلج جيابه يولي مو حامل محصوره اني
بيلسان:- اي عمةةة شنسوي بربج
اسيا:- الطياره مابيها حمام شي صخام
بيلسان:-هي خل نصل احنا والله كريم
اندار علينا اوس
اوس:-شكو
اسيا:-ماكو شي
اوس:-لا احجو نسيتو شي مو ادري بهاي طلعاتكم انتو النساوين الا تنسولي شي
باوعتله:- هسه شبيك كبيت علينا منو كلك نسينا شي
ارس:- لعد شبيكم تتهامسون
بيلسان:-سالفة بيناتنا ويه ميصير يعني الا تحشر نفسك
اوس:-لسانج لا ومحمد اكصه
بيلسان:-شبيك مطلع عصبيتك علينا شنو احنا الي ااخرناك
اوس:-اللصمي لا صدك اطلع عصبيتي بيج
اسيا:- يمةةةةة هي هذا وكتها هسه تتناكرون
بيلسان:- مداتشوفين شون كاب علينا
همستلي :- متوتر قصري السالفة انتي
اندار وشفته يهز برجله
واني انهضمت اكره اللي يطلع ضوجته بيه
انا شنو ذنبي شعلينا متوتر فوك راسنا
عندك مشكلة بالشغل حلها ويه اللي وياك وتعصب عليهم
مو علينا!!
الطريق صار شطوله علينا بس واخيرا وصلنا المطار
بسرعه حاسب ابو التكسي ونزلنا ركض
سحب الجوازات حتى يفوت للاجراءات
جينا نخلي الجنط طلع وزنها اكثر من المطلوب
بقينا واحد يباوع للثاني مانعرف شنسوي والطياره باقيلها ١٥ دقيقه وتقلع واحنا بعدنا بالمطار مارحنا للطياره ومكانها بعيد شوي
عالسريع تقرب اوس وفتح وحده من الجنط
بيلسان:-شسوي
اوس:-اطلع من الغراض ماعدنا غير حل
عالسريع طلع جاكيت والبلوزات مالته ولبسهم مادري شكم قطعه لبس
بسرعه سحبت جنطة الخ وكمت اطلع انا هم من الغراض قسم لبسته وقسم خليته بيدي شسوي المهم تخف شوي
صار الوزن المطلوب بسرعة سديناها ونطيناها
نبارع باقي اقل من عشر دقايق وتقلع الطياره
انخبصنا كمنا نتراكض عالسريع بس نريد نوصل
وحده من المضيفات كامت تصيح :- hadi hadi
يعني يلا يلا وتاشرلنا بيدها
المسافه من المطار للصعود الطياره احسها صارت علية شطولها هو صح الممر طويل
بس هسه صار جنا شارع عام
اوس كدامي يركض وراي عمتي كوه جاي تشحط روحها
اندار علية وصاح:- بساااااع اعبري اعبري
خلاني اعبره وهو راح ركض على عمتي
اركض اركض اريد بس اوصل وتنحط رجلي بالطياره
انكطع النفس واحسني جاي اركض مثل الركض اللي بالاحلام
مداحس باي شي بس اريد اوصل
واخاف اوصل واوس وعمه بعد
بهاللحظات مادري شكم سيناريو صنعت
مره تخيل اطير لوحدي وهما مو وياي
ومره اني مالحك وهما يروحون
ومره كلنا مانلحك
المهم جانت لحظات كلش مزعجه
بس حطيت رجلي بالطياره ونداريت اباوع لعمه واوس جاي يجر بيها وهي هلكانه خطيه
وعيني عالباب خايفه لاينسد
وادعي يارب يارب لساني نعكد ماعرف بعد شحجي وشكول
ودالهث من الركض والهدوم اللابستهم مثكلتني مادري شكم كيلو هسه صايره بسببهم
جسمي بس يرجف
لحد ما وصلو للطياره وصعدو
احس مثل مي بارد نزل علية وانحلييييت
بحيث ردت اوكع من طولي راسا عاطت عمة واوس جاني ركض اوس لزمني
بسرعه سحبني لمكانه وكعدني
جابولي مي
سحب اللفاحه مني ونزعني القمصله جنت ماجاي احس باي شي من الهلكان
نزعني واحد من الكبع
وقرب البطل يشربني
احس روحي متت طلعت بعد
عيوني صوربت وغووشت
اوس:-اشربي اشربي
بس اشرتله براسي بمعنى لا
من اكون داللهث وتعبانه احس اذا شربت مي كله انزله
لحد ما هديت وسترخت روحي
وتوضحت الالوان يمي شوي شوي
بديت احس الدم رجع لجسمي ..
انتبهت لازمه ايد اوس
استحيت وراسا وخرتها
تعدل بس بقى يباوعلي بتعب
عمة كاعده بالكرسي الي كدامنا
همسلي :- ها هديتي ؟
اشرت براسي بأي بس عيوني بعدها اغمض وافتح
اوس:-بعدج دايخه
بيلسان:- لا
تقرب مني وتعدل كال
اوس:-حطي راسج على جتفي فقراتج لاتاذيج تبقين هيج
مارديت وماخليت راسي هم بقيت كاعده
عافني وتعدل بس بقى كاعد يمي وقريب
ماحس الا شوي وسندت راسي على جتفه
جنت ميته تعب مادري احس تعب هذا الاسبوع الفات كله هسه طلع بيه
شوية انام وشويه اصحى
شوية اتعدل
وبقيت على هالوضع
واوس يمي كاعد وكلما اتحرك يباوعلي
بس حسيته مو طبيعي بي شي
رجله ماوكفت عن الحركه
مو كانو هواي جاي اراقبه واباوع لتفاصيله؟؟؟
هسه اني شعليه وشيكون خلي يكون بي
ماعلية انا ..
والحمدلله وصلنا العراق بخير وسلامة
ودخلنا مطار بغداد
ولازم هاي النزله التخوف بحيث احس راح ننكلب على وجهنا
من خوفتي راسا لزمت اوس من عكسه
وكمت اتشاهد كلت مستحيل تعبر هالسفريه على خير لان ادري بروحي فگر
نزلت
ذبيت حسره لابو حسره
اوكي هي سفره حلوة
لا والله كلش حلوة وتونست بيها
اي نعم تعبت بس ميخالف
وكفت نزلت عمتي ونزلنا واوس ورانا
وكفنا ننتظره واجا جايب الجنط
راسا نزعنا الشغلات الثكيله
وجو بغداد مو مثل تركيا بارد ثلج
بالعكس جنا صيف
نزعت القمصله والبلوزات هاي الي فوك فوك لبستها
لزمت ردت انزع الكبع باوعلي اوس وكال
اوس:- ها ها
بيلسان:-ها
اوس:-شداتسوين
بيلسان:-انزع الكبع باوع الحر
اوس:-وتبقين مفرعه
بيلسان:-ها
باوعتله وصفنت وهو ديباوعلي
اوس:-امشي عيني امشي تريد تنزعه
بيلسان:-اوس تره حاره
اوس:-تحملي وصلنا
بيلسان:-راح اختنك باع شثخنه
اوس:-ماتختنكين وصلنا هي نص ساعه بس اتحملي
بيلسان:-ماااا
اوس:-امشي كدامي وبلا عناد
بيلسان:-حااااره يابشر راح اموووت
اوس:-ماتموتين بهالجم دقيقه
بيلسان:-الله اكبر عليك
اسيا:-يداده هاي شجاكم
اوس:-امشي كدامي وبلا سخافه زايده
بيلسان:-سخافه مو
تعصبت وكلمته كلش جرحتني گلت لو مدري شيصير ما امشي كلمته هسه ..كول هيج وسحبت الكبع من راسي وشمرته بالكاع وباوعتله بعصبيه
وراسا نزل شعري
باوعلي انصدم بالبداية اخذ نفس وزفره ويباوعلي بنظره حاده
تقربت عمة من يمي:- يمة روفان شجاج عمة
بيلسان:- داكلكم حاره ماتحمل ابقى بعد لحظه بي
اجا تقرب وهو عيونه تريد تاكلني
حجا بهدوء
اوس:- نزلي اخذيه وخلي على صماخج لا وقسم بربج اسويلج زفه هسه بنص المطار
بيلسان:- لا حول الله
قبل ماكمل حجي راسا نزلت سحبته عمتي وجتي انطتني ياه
اسيا:- عمة لخاطري كسري الشر وامشي فدوه لوجهج
وخرت ايد عمة بهدوء وكتلها
بيلسان:-حاره
اسيا:-هسه شلحيتي بهالكلمه داكلج كسري الشر
مثل ما هو يعاند اني هم ركبت راسي وقفلت
اباوعله واكف ويباوعلي بعصبيه واكفين بنص المطار ونتعارك وعمة ماتعرف شتسوي وجايه بس علية
جتف ايديه وضرب الجنطه بالكاع وكال
اوس:- نبقى هنا ماعندي مشكله لحد ماتلبسيه
بيلسان:- اي تمام انت ابقى
ردت اعبر وامشي ماحس الا يسحبني سحبه قوية من عكسي ويعكسني عليه
جتي عمه بسرعه بيناتنا تريد تفاككنا
اسيا:-يمة فدوه اروحلك عوفها مو هنا بالبيت تفاهمو اروحلك فدوه عمة
قرب وجها وصك على سنونه
اوس:-شجاج نجلبتي تره ومحمد ماعندي خلكج
بيلسان:-وخر وعوف ايدي لا والقران اصيح هسه بنص المطار
اوس:-سويها حتى ادفنج بنص الكاع ولاتتحدين اوس لا اشوفج شي ماشفتيه بعد لحد هسه اني صابر عليج وداحاجيج باللسان
حجاها واخر شي خضني خض بيديه
وعمه تحاول تفاككنا
وايدي جاي تموتني ديعصر عليها بكل قوته
تجمعت الدموع بعيوني
بسرعه كعدت عمة بالكاع وسحبت جنطتها وعالسريع فتحتها وطلعت حجاب وجتي ركض علينا
اسيا:-هاااج عمة هذا حجاب
اندار عليها واخذه من ايدها وشمره علية
وكال
اوس:- حسابج بعدين
وسحب الجنط وطلع كدامنا
جتي عمتي يمي
اسيا:-راحت روحهم لليهود شجاج انجلبتي هااا
بيلسان:- عمة عوفيني والي يسلمج
اسيا:- ماداتشوفيه شكد متوتر وعصبي
بيلسان:-اني ممجبوره يطلعها بيه
اسيا:- ممجبوره لعد لاتندكين بيه
بيلسان:- والله لعد هذا
اسيا:-انجبي وامشي كدامي يلا عابتلج هالعطوب
خليت الحجاب على راسي ومشيت
جان منتظرنا وموكف تكسي
باوعلي يريد يتاكد لبست الحجاب
ماهتميتله رحت صعدت خلف بعصبيه
الطريق كله جان هدوء
بس اريد اوصل عاد
اريد اسبح اريد اكل اريد انام
اريد ارجع لمكاني تعبت هواي
وهسه اخر شي من العصبية والمغثه احس روحي راحت
ياريتني ماطالعه ولا رايحة وياك ..
وصلنا البيت نزلت وجيت اخذ جنطتي
راد يسحبها هو كال
اوس:- اني انزلهم عوفيها
ماسمعتله سحبتها ومشيت دكيت الباب
فتحت بنان
وصفنت
بيلسان:-هلووو
بنان:-هلا روفان
جتي حضنتني وبوستني
بنان:-حمدلله عالسلامه
بيلسان:-الله يسلمج
وجها جان غريب وعين على اوس وعين على عمة
كتلها:- شكو
بنان:-فوتي وتعرفين
طبيت جان بيت عمي محمد جايين
كلت احتمال ديستقبلونه حتى
فتت الوجوه كلها تصفن
رحت بوست جدي وبيبي واجا عمي محمد هم بوسني وتحمدو بالسلامه
طلع قيس من غرفة الاستقبال وبيده مبايله الظاهر جان ديخابر
قيس:- ها جيتو
بيلسان:- اي
قيس:- اوس وينه؟
بيلسان:- هسه جاي دينزل بالغراض
دخلت عمة وجتي تبوسهم وتسلم عليهم
وراها فات اوس تقرب من يما قيس وسمعته يكله
قيس:-داتصل عليك وينك ماترد
اوس:- مانتبهتله والله
وراحو للمطبخ
كلبي لعب حسيت صدك اكو شي
وجوهم كلها بيها شي ..حتى قيس لاول مره هيج من يشوفنا مايسخف وهذا اللي أكدلي انو اكو شي
كامت عمتي تريد تطب لغرفة ايسر صاحت بيبي
جليله:- يمه تعاي كعدي هسه
اسيا:- بس اشوفه
صاح جدو
خالد:- تعاي هسه
رجعت كعدت وتباوعلهم
اسيا:- شكو
دخلوا قيس واوس من المطبخ واجو كعدوا
اجا اوس يم عمة
وكح وكام يحك بلحيته ورجلة ماوكفت من الهز
اوس:-عمة
اسيا:-احجو شصاير وجهكم مايطمن
اوس:- ايسر ماكو
صفنا بي:- شنو ماكو
قيس:- شرد
باوعتله بصدمه ورجعت باوعت على جدو
وكالت برجفة
اسيا:-مافتهمت
خالد:- ورا مارحتو بيومين كعدنا الصبح مالكيناه
اسيا:-يعني يعني شنو وين راح
قيس:- هاي من يوم الراح لحد هسه اني ادور عليه وبلغت الشرطه بس كلي شخص بالغ يعني مانكدر نسوي شي وطالع بارادته
اسيا:-يعني فهموني وينه ابني
لزمها اوس رادت دكوم
اوس:-بس اهدي عمه ولاتنفعلين الكيلجياه لو راح للمريخ
اسيا:-اوس ابني ويييين
وكفت وكامت تصيح
محمد:-ابويه انتي بس اهدي هسه
اسيا:-شهدا هو اسبوع بس غفلت عنه وتركته يمكم رجعت ماكووووو
جليله:-احنا شعلينه تره مو جاهل
اسيا:- لا جااااهل ..جاااهل ونص
اندارت على اوس وكامت دموعها شلال ينزلون
اسيا:-عمة اريد ابني جيبلياه الله يخليك
اوس:-عمة والله ادورلج ياه واطلعه لو جوا الكاع بس ابوس ايدج اهدي
اسيا:-ماعلية اريد ابني وييييينه يانااااس وين رااااح هذا مخبللل يروح يسوي بروحه شييي
حجتها وكامت تضرب على روحها
كمت ركض عليها واهدي بيها
بيلسان:-عمة لاسوين هيج
اسيا:-ابنييييييي جيبولي ابنييييي هذا مريييييض شون عايفيه لوحده
تحجي وتضرب على نفسها
اني واوس يمها بس نريد نهديها
اجا قيس ويانه
نزل اوس يم رجليها ويلزم بيديها حتى لاتضرب روحها
اوس:-عمة وعيونج اجيبلجياه بس لاسوين هيج
اسيا:-يمة اريد ابنييييي ويننننننه
تحجي وتملخ بروحها
بيلسان:-عمة الله يخليج كافي
على دموعها كمت ابجي
جدو عافها وكام طلع هو وعمو محمد
حجت بيبي من مكانها
جليلة:-هاي اخرت تربيتج
اندار عليها قيس وكللها
قيس:-هي هسه وكتها تفتحين دفاتر عتيكه يابيبي دسكتي
باوعلي اوس وكال
اوس:-جيبي ماي بسرعه
رحت ركض للمطبخ جبت مي وجيت اشربها ماتقبل تدفع بيدي وبس تبجي
كمت ابجي انا هم
باوعلي قيس وكال
قيس:-هي عالواهس لو شنو
ماتحملت ابجي على بجيتها وحالتها تقهر
وبيبي ولا هتمتلها منداره وتصفن بالكاع وتستغفر باصابيعها
واحنا نهدي بيها ..تملخ بهدومه وبنفسها وتبجيييي
اخر شي انهدت من التعب مدري من البجي سكتت وبس تون بمكانها
كومها اوس وقيس وطببوها بالغرفة الجوا
طلعوا ثنينهم سوا
رحت يم قيس كتله
بيلسان:-يعني شون اختفا
قيس:-شنو اختفا تره زلمه بكد الثور حمل رجليه وراح
حجت بيبي بمكانها
جليلة:-عساه بالموت هالمستهتر
باوع اوس لبيبي واخذ نفس وگللها:- بيبي هسه وكتها لخاطر الله
رجعت انداريت على قيس
بيلسان:-دورت زين عليه خاف ببيت واحد من اصدقائه شي
قيس:-طالع
بيلسان:- وين !
باوعلي اوس وكال
اوس:- طالع عالشمال
بيلسان:-يعني انت تعرف بالموضوع
اوس:- من اول يوم
بيلسان:-وليش ماحجيت؟
اوس:-شحجي؟؟ ..حتى تصير هالحاله وهي هناك بربج؟!
سكتت ماعرف شحجي
بيلسان:-شون عرفتو طلع للشمال
اوس:-عندي صديقي وجبت اخبار منا
باوع لقيس:- بس اريد افتهم شون طلع تره هذا مريض وديمشي عالعكازات شووون صااارت
قيس:- شمدريني اني اصلا ماجنت بالبيت بوقتها وامك وبنان فوك نايمين محد حاس عليه شايل روحه وطالع
راح كعد قيس ويتنهد
قيس:-هسه شون بربك تره هذا ماينلكف بعد لو الحمزه يجيك بحصانه
اوس:- والله مادري ياقيس .. منين ماجاي افكر مادالكي
قيس:-بس ربك يستر لا يروح انوب يسافر
باوعتلهم بسرعة وحجيت:- يمة وين يسافر
قيس:-شمدريني ايران تركيا كلها قريبه
جليله:- هو عنده جواز؟
اوس:- ميهمه جواز لو يدري يطلع قچر
جليله:- يابربوك يسويها ويطلع يولي يهاجر
قيس:- بعد عليي صوتج ماسمعت
رحت كعدت عالقنفه واحس راسي جاي يفر
طلعت الفرحه كلها من خشمنا
سندت راسي بيدي
باوعلي اوس وكال
اوس:- صعدي بدلي ارتاحي شكو باقيه
بيلسان:- رجليه نحلت مابيه حيل والله
قيس:-كوم اوس شيلها
باوعله اوس بخزره
قيس:-اهوو سكتنا
استحيت دوما يجفص هذا
حتى بالوضع والمكان الغلط لازم يسمعنا جفصاته
كمت واستند بالحايط وامشي
حجت بيبي
جليلة:- من سفره هيج لعد باجر تحبلين شيصير بحالج
ضربت على وجهي وقيس ضحك بس كتمها عالسريع
مانداريت ولا باوعتلهم راسا بوجهي صعدت فوك وسمعت قيس كله
قيس:- قبل ماتسكتني انتبه على حجيي بيبيتك الغنبله

طبيت لغرفتي
يمةةةة يمكة احسني شفت الجنه
بسرعه ماردت اطول بالكعده
طلعتلي هدوم وفتت سبحت واول ماطلعت انهديت عالفراش
احس صارلي كومه مانايمه
وراسي يضرب ضرب علية
نمت مادري متت مادري فتت غيبوبه
المهم كعدت الدنيا ظلمه
تلمست يمي اذكرت التلفون باقي بالجنطه
كمت تعدلت واطكطك بجسمي
جنت لابسه تراك مو هواي اللبسه لان شوي صغير علية بس هذا اللي اجا بيدي شسوي
ف كلت اطلع اكيد هسه راحو بيت عمي
طلعت من الغرفة جيت دامشي انزل
بعدني بالممر ظلمه جان
سمعت صوت كحة قويه يمي
فزيييت ..جسمي رجف من الفزه
باوعت للقنفه اوس تعدل
بيلسان:- مارحتو
اوس:- اني بقيت
كام تعدل ويمط بجسمه
بيلسان:- ليش تنام هنا اذا ماترتاح
اوس:-منو كلج مارتاح
هزيت بيدي وحجيت بهمس
بيلسان:- وانا شعليه صدك
كام واجا يتقرب
ردت انزل صاح
اوس:-اوكفييي
اجا يمي وباوع على ايدي
جانت ظلمه وبس ضوه خفيف جاي من الممر البعيد الي بين الحمامات ف ديعكس على وجهه وشعره المخربط
جان لابس تراك
باوع لايدي وكال
اوس:- اذيتج؟
سويت نفسي ضحكت بطرف شفتي
ومارديت
تقرب وعلى غفلا لزمها
انتفض جسمي وكزبر ..ردت اسحبها ماخلاني
بيلسان:- شسوي
اوس:-اذيتج؟
بيلسان:-لا بس بس عوفني
لزمها من المكان الجان ضاغط عليه
وكعد يمسح بهدوء
اوس:- جعل ايدي بالكسر
بيلسان:-لا
باوعلي وهمس :-شنو لا
كمت اتلعثم ومادري شحجي وجسمي كله يرجف
بيلسان:- يعني شسمه.. هذا .. اريد انزل
ابتسم وعاف ايدي
تركته ونزلت بسرعه وانا جسمي كله مكزبر
لا منا يعيط ويرزل ولا منا يجي يمسح ويطمن
شهل بشر هذا يالله!
البيت جان هدوء
باوعت للساعه جانت ١١ وربع
ياروحي انا كل هذا جنت نايمة !!
دخلت للمطبخ مثل ماهو جان هوسة وجنطنه بالكاع
نزل ودخل للمطبخ
شافني احوص كال
اوس:- جابت امي اكل بالثلاجه
رحت فتحتها جان شفت صحنين واحد بي عروك واحد كبه
طلعتهم حتى احميهم واكل جنت مايته جوع
شفته واكف ويصفن
حك بلحيته ..نداريت عليه اباوعله ديباوعلي
رفع راسه على عيوني:- هاللبس ماينلبس هنا وينزل بي
نداريتله وكلت
بيلسان:- نعم؟
اوس:-الي سمعتيه
بيلسان:-تره ماكو احد غريب اصلا مادري حتى انت هنا
اوس:-يعني اني غريب؟
بيلسان:-داقصد ماكو احد يعني
اوس:-حتى لو لوحدج .. هاللبس مينلبس بييت انتي كاعده بي ويه ناس
بيلسان:-على فكره هالناس هما جدو وبيبي وعمه يعني تره
قاطعني بحده:- ميخالف افرضي اجا احد على غفلا
بيلسان:-منو يجي
اوس:-زوج عمتج لو حتى قيس
بيلسان:-اي عود وقتها اصعد ابدله
اوس:-داحجي عدل ليش تريديني ارزل
ذبيت الصحن عالكاونتر وانداريتله
بيلسان:- شو انت هواي شايف روحك وجاي تتحكم شنو سالفتك
اوس:- هذا العندي
بيلسان:- وانا هم هذا العندي
اوس:-شحلاته العندج
بيلسان:-شنو؟!
ابتسم سحب السويج جان عالمجمده وكبل ليطلع كال:- المهم هاللبس بعد مينلبس .. وتصبحين على خير
حجاها وطلع
يابةةةة دروووح شكد شايف روحك
دخيل الله بس يغث بيه ويروح
حتى سد نفسي
توني جيت احمي الاكل
سمعت صوت ونه وبجي بنحيب قوي
الصوت جاي من الصالة
تركت اللي بيدي ورحت ركض اشوف شكو ...
.
.
.
للحكاية بقيـــة

#منة الله_الأيوبي