ليلة من العمر

البارت التاسع

باوعت لخاله وگلتلها:- عادي انا ارجع عرفت الطريق
اسلوبة وتصرفاتة وكلامة يخلي الواحد كوه يكرهه
قبل لايطلع گال:- زين
راد يطلع صاحت بي خاله:- اوووس اوكف ..تخلي بنت عمك لوحدها تروح هاي بلا غيرة
بيلسان:- لا والله خاله عادي خليه يصعد ينام
هاجر:- لا لعد لويش عندج ابن عم وبحسبة اخوج
حجا بصوت ناصي بس سمعته گال
اوس:- خلي اكون ابن عمها ..وبعدين تجي سالفة الاخوة
باوعتله وانا العصبية تفور مني
ابد ماحبيت كلامه ولا اسلوبه صدك بلا غيرة
حتى امه استحت وماعرفت شتحجي تريد بس تغير الموضوع
انتچيت وحجيت وانا اباوعله
بيلسان:- خوش لعد ..نام وشوية الخ رجعني
الا اخليه هو يوصلني على هذا كلامة واسلوبه
ويا انا ياهو اشو
كام يلعب بشواربه باصبعه الابهام ويباوعلي بنظرات مافهمتها
بس هي نظرات حقد وكره ماكو غيرها
عافنا وصعد
ندارت علية خاله وگالت:- لاتضوجين منا تره هو هيج طبعة ..شوي مثل مايگولون نفسية
عمت عيني الشغل والمحلات جدج كلها فوك راسه واي غلط يصير يخلوها بسببه ..لا ابوه ولا اخوه وراه ..لوحده
خوب عندج هذا ابن عمتج الطايح الحظ
بيلسان:- ايسر؟
تقربت وگامت تسولف:- اي ..ولد طايح حظه كل شي يسوي حتى يشرب ..وجدج گله لاوس ماراضي عليك بسببه
بيلسان:- واوس شعليه؟
هاجر:- مو مره شغله اوس وياهم ..گال حتى يصير ادمي شويه حتى شهادة ماعنده ..كام هذا يسويله مشاكل بكل شغله يحطه بيها
اوس هم ضاج شفتي شونه عجوزي ومايحب الكلمة الغلط ماتحمل وطرده وگال معليه بي بعد وجدج ضاج ليش ماصابر عليه وليش مادري شنو واوووووه
بيلسان:- زين خاله سؤال ..ابوه وين؟
هاجر:- محد يعرف
بيلسان:- شون يعني !
هاجر:- من تزوج عمتج اربع اشهر وشرد كلشي مانعرف عنه وحتى مانعرف شنو السبب ..بس بيبيتج وعمتج يعرفون ومايحجون لاحد ومايحبون اي واحد يفتح هالسالفة كبالهم ديري بالج
بيلسان:- من هذا ايسر هيج طالع مسربت
هاجر:- والكل يكرهه ويضوج منا ومن تصرفاته
بيلسان:- اي حسيت عليهم هيج
حركت بيدها:- يحترك شعليه بي ..بس اني انغث على ابني يحملوه فوك طاقته ..هسه قيس يطنشهم بس اوس عمت عيني يخلي بگلبه وهو لان اكبر واحد ومستلم كلشي من بعد جدج

بقينا فوك الساعات نحنا نسولف ونحجي
مابقت شي ماسولفتلي عنه لدرجة ماحسينا بالوكت
ومره تمدد كبالي وتسولف ومره تمد رجليها حتى هي من الكعده تعبت بس مو ناويه تتركني ..
عبرت المغرب ونحنا بعدنا كاعدين وماقبلت اطلع الا اتعشى
بنان جانت اغلب وقتها بالغرفة داتدرس ..
صدفة اباوع للساعة صايره ١١ ونص
باوعت على مرت عمي وگتلها
بيلسان:- يبوووو تأخرت هواي
هاجر:- اي شكو بيها انتي ببيت عمج
بيلسان:- لا مو بيبي گالت لازم ارجع مابقى هواي ..ماعندي رقم احد بيهم حتى اخابرهم
بنفس الوقت دخل اوس وشكله توه كاعد من النوم
يباوع بين امه وبيني وگال
اوس:- خبرت بيبي گالت ارجعج
هاجر:- خوما طفلة ..خلي تنام هالليلة هنا تره هو بيت عمج
اوس:- شمدريني اني
بيلسان:- لا خاله ميخالف على غير مره
شفتها ضاجت
عبر من يمنا سحب السويچ مالسياره وقبل لايطلع گال
اوس:- يلا لعد لأن راح اجيب قيس هم منتظرني
سحبت غرضي وعدلت نفسي
ورحت عليها بوستها كوه عافتني
هاجر:- تجين هااا ..هايه مامحسوبه لان اول مره
بيلسان:- ان شاء الله اصلا انا كلش تونست وياج
هاجر:- بعد روحي انتي
طلعت شفته كاعد بالسيارة
سلمت وترخصت منها اخير مره ورحت صعدت خلف
لا باوعلي ولا باوعتله جان ديلعب بردن الجاكيت مالته ..
البيت قريب مابيها خمس دقايق ووصلني لبيت جدي
دخلت البيت هدوء وعتمة
شكله الكل نايم
صعدت لغرفتي غسلت وبدلت
احس راسي راح ينفجر مامتعوده اسولف واحجي واسمع حجي هواي انا بس والله خاله هاجر تونس بحيث الوقت وياها مشى بسرعة ..
توني جيت اكعد سمعت صوت التلفون ديطوط خلص شحنة
هسه وقتك بربك
جيت ادور عالشاحنة ماكو بالغرفة
ياربي وين صارت ..كلبت الغرفة عليها ماكو
تذكرت لمحتها جوا ...اي اي يمكن منزلتها
اي اتذكر نزلتها اخر شي جوا وشحنت التلفون بالصالة
طلعت ونزلت على رووس اصابيعي حتى لاطلع صوت
البيت ظلمة هندس بس ضو المطبخ مشتغل
وين راح الكيها هسه راح ابقى اعمش هيج
طبيت للصالة واتملس بالحيطان ومكان البلگات مالكهرب
جان اكو ريحة ماطيبة وكلش قوية بالصالة
لدرجة ماكدرت اركز بالشي الجاية علمودة
دامشي ببطئ واتلمس ..جنت نازله بالتراك وشعري كفشة على وجهي توني فاتحته
هي لحظات وماحس الا شخص ينلزك بيه !!!
فزيت فزه بحيث جسمي كله انتفض من مكانه
اريد اشوف منو ..ادفع بي لازك
حجيت وانا ارجف:- منو انت شراااايد
ايسر:- اشششش
روحي راحت مابقى قطرة دم بجسمي من الخوفة
بيبسان:- ايسر؟؟؟؟ ..شداتسوي وخرررر عني
ادفع بي ماكدر المشكلة كلشي ماجاي اشوف الدنيا ظلمة
ايسر:- اششش
ريحته مقززه عرفته سكران
ادفع بي مايفيذ دفعني عالحايط
اريد اوخر عنه ماكدر لازمني وانا روحي داتلوب
بيلسان:- ايسر الله يخليك وخرررر
ماكدر اصيح خايفة والكلام اصلا كوه جاي يطلع مني ..جسمي كله يرجف وهذا ديذب ثكلة عليه
دفعته قوي ردت اطلع بسرعة لزمني من شعري ورجع دفعني بقوة عالحايط
انركع راسي بالحايط عطت:- ااااااخ
كمت ابجي حسيت ماعندي اي قوة ولا حيل ادافع
بيلسان:- عيييب الجاي تسويه انا بنت خالك
ايسر:- لا انتي .... وجابوج النا
كمت اكفخه على راسه:- وخر حيواااان
لازمني باحكام وارافس بي مايوخر
مثل الاخطوب احس طلعله اكثر من ايد
بحيث افلت ايد من ايديه اللي علية يرجع يلزمني بوحده الخ
اريد اللزم شعره اسحبه اطلع روحه ماكدر
هو طويل اطول مني لهذا جانت كل حركاتي مقابيله لا شيء ..
جسمي خدر
نفسي ضاك علية كمت اجر النفس كوة
ماعرف شسوي واخاف اصيح يجون يشوفونه يروحون مايصدكوني ويطلعوني انا الغلطانه
الف فكرة جتي ببالي وبنفس الوقت
عقلي احسه وكف بعد مايشتغل ويساعدني بشي
حاولت حاولت بكل ماعندي من قوة ..ادفر بي واضربه وهو مادري شيهلوس بالحجي وحركاته الجريئه بدت تزيد وتقزز روحي
عيوني غرغرت بالدموع
غمضت وصحت بگلبي:- ياااااااارب ...
سمعت صوت طقطقة بالبيت
جمعت كل قوتي وصحت بصوت عالي:- ااااااااخ
من صحت مابعد بيه قوة
وكعت بالكاع وكع عليه هالحيوان
غمضت عيوني وادفر بي برجلية وبگلبي بس اگول يارب
وبعد اسمه ربي
ما احس الا ينرفع من فوكاي ..واجا يمي شخص مانتبهت منو من الخوفة والرجفه بس سمعت صوته من حجا وياي
قيس:- روفااان انتي زينة ..روفااان
فتحت عيوني مغووشه بالدموع
لكيت قيس كبالي ووراه اوس لازم ايسر
عدلني وكومني
صاح اوس:- طلعهااااا منااااا ..والله لانعل سلف سلفاك اليوم
حجاها وكفخه ذيج الكفخه
قيس:- تره شربان مو بوعية
اوس:- گتلها طلعهااااا مناااا ..روحوا للمطبخ
سندني بالكوة امشي
جسمي كله يرجف ..لزمني وكعدني بالمطبخ
لملمت بروحي وارجف
جابلي كلاص مي وانطاني ماكدر اللزمه من الرجفه
كلشي بيه انتفض وعيوني وحركاتي كلها انشلت احس ..
شوي واجا اوس بسرعة
وكفو كبالي ثنينهم ويباوعولي وساكتين
انا عيوني بالكاع اصفن ماعرف شسوي
قيس:- اهدي ..عدت عدت لاتضلين تفكرين بيها
اوس:- شصار احجيلنا من البداية
قيس:- سوالج شي؟
هزيت براسي بمعنى لا
اوس:- احجي شصار
باوعت عليهم ديباوعولي وعيونهم منتظرتني احجي
حجيت وانا ارجف جني كاعده بنص البرد
وكمت اتأتأ بالكلام:- نزلت
ادور على شاحنتي ..طبيت للصالة
وماحس الا
شهكت وانفتحت بالبجي
قيس:- صيحي عيطي سوي اي شي جان
باوعتله:- خفت
اوس:- من شنو خفتي
كمت اشهك وابجي بعد اكثر
سكتوا شويه ورجع گال قيس:- هسه وينه شسويتله
اوس:- كتلته كتله ..وكع بيدي مدري اغمه لو انتفس
لميت نفسي وقلصتها عالكرسي وكمت ابجي بعد ماكدر اسيطر على دموعي ورجفتي
شعور ماعرف شون ممكن اوصفه من بشاعته
لو بيدي اكوم احرك روحي من كد ماكارهتها
كل اللي اريده هسه امي
شكد تمنيتها يمي ..كلما اتذكر اللي صار گلبي يوجعني وتزيد الشهكة
شويه واجاني اوس:- يلا كافي وكومي ويانه للبيت ماتبقين هالليلة هنا
قيس:- هسه بيبي مادكول شصاير
اوس:- لعد تخليها ويه هالجلب مو امان
قيس:- مادري والله بس راح يعرفون بعدين
باوعتلهم بسرعة وگلت:- لالا لحد يعرف الله يخليكم والله يكفيني الفضيحة
باوعولي ساكتين
شوية وگال اوس:- لعد كومي لغرفتج ونحنا ثنينا راح انام هنا ..وانت قيس روح ابقى وياه
وخر بسرعة قيس وگال:- لا يمة خاف يسويلي شي
اوس:- قيس
زحك بي وذاك جاي يتشاقة
كمت وامشي بكوة صعدت شوي شوي
بعد احس نفسي مشلوله
امشي وحسيت اوس وراي
مبل لا ادخل للغرفة گال
اوس:- حضري روحج باجر ناخذج لبيتنا
انداريت عليه وگتله:- ماكو داعي خلص
ردت اروح گال:- ليش ..عاجبج الوضع يعني
انا كوة متحملة روحي وكلامة فد استفزني
احس الدم صعد لراسي
گلت ما اسكتله لو اعرف موتتي هسه
رحت تقربت عليه وگتله:- اللزم حدودك ..مامتقبلني بنت عمك هاي مشكلتك بس ماسمحلك تقلل من ادبك بأي كلمة قذرة تطلع من لسانك علية افتهمت لو لا؟
حجيتها وركض رحت للغرفة
شمرت نفسي عالمخدة وابجي
معرف على شنو ابجي بالتحديد
على حياتي الجديدة ؟
على اهلي اللي هما مو اهلي طلعوا ؟
لو عالموقف !
لو كلام الناس اللي هنا ونظراتهم الحقوده علية؟
تعبت يالله تعبت
كلشي جاي يتعقد بشكل مقرف
كلما اكول كل يوم ينحل الموضوع وتنحل الحياة يمي
تطلعلي فد سالفة تعقد كلشي من جديد
ليش انا يارب؟
ليش انا وشنو الغاية من كل هالخربطة والتغيير؟!

بقيت ابجي الليل كله ماعرفت شوكت اخذت عيني عالنومة
وانا لازال جسمي لازمته الرجفة من العصبية والخوف ..
كعدت الصبح راسي مصدع
وعيوني احس بيها ملح من الوجع
طلعت لكيت اوس نايم عالقنفة اللي بالصالة الفوك
شكد احتقرته مجرد ماتذكرت كلامه البارحة
نزلت لكيت عمتي وبيبي بالمطبخ وداتحضر بالريوك
بيلسان:- صباح الخير
جليلة:- هلا بنتي
باوعتلي عمه:- صباح النور حبيبة
رحت احضر وياها وهم حتى اللتهي ولحد ينتبه على عيوني الوارمة من اللطم ماللبارحة
شوي وطب قيس من برا وبيده علاكة الصمون والبخارات تطلع من اذانه
شمرها عالميز:- هاااج هاي الصمون ..يعني هسه الا تتريكون
جليلة:- والله محد كلك نام هنا
زفر بضوجة ..انتبه علية باوعلي وگال:- صباح الخير
ابتسمت وگتله قبل لا اوخر عيوني:- صباح النور
جليلة:- اي نحنا مو اوادم تصبح علينا بس بيك تبخر
راح يمها وخله ايده على جتفها
قيس:- افااااا جلجل ..غير انتي كعدتيني كعدة كفار قريش الله وكيل نسيتيني شنو خير انتي وصوتج
جليلة:- شبي صوتك لك
قيس:- شبي ..ولا صوت اليسا صدك جذب
باوعتله عمتي وگالت:- گوليله نحنا مو شكول ..هو بس من يشوف بنية يستعدل ويجر عدل
قيس:- مو احسن ما ابقالكم مطنكر ومبخر مثل ذاك النايم فوك
هو وديحجيها دخل اوس ويباوعله مخنزر
اوس:- شبي ذاك النايم فوك
قيس:- بيبي داتسأل عليك گتلها نايم فوك
اندارت عليه بيبي وصفنت بي:- هاي انتي ثنينكم نمتو هنا؟ ..شجابكم ولكم
قيس:- انتي وجدي هالفترة صايرين تخوفون ..ف نحنا كاعدين على گلبكم نراقبكم
كامت تخلي الاكل بالصينية عمة وباوعتله گالت:- يول لايكون امكم وابوكم متعاركين شي
قيس:- واذا تعاركوا نعوفهم ونجي ننام هنا؟
اسيا:- احجي الصدك ولك شصاير
اباوعلهم وگلبي رجع يرجف
وعيوني تترقبهم ومنتظره شيحجون
اوس:- لا عمة ..بس وصلنا روفان بالليل ومعرف صدفة صارت وبقينا
حجاها وباوعلي وجر كرسي وكعد
انا راسا وخرت عيوني من عنه كلش ضايجة منا ..
كعدنا عالريوك
جدي جان طالع مابقى تريك ويانه
صدفة وجان اوس كعد كبالي
همزين مو من النوع اليحجي هواي بس هم احس مامرتاحه وهو ماعد كبالي وماكدر اباوع بوجهم هو وقيس من بعد البارحة
فجأة وبيبي گالت
جليلة:- شمنيم ابنج بالصالة ؟
جنت داكل راسا باوعت على اوس وقيس وهما هم باوعولي
اللكمة وكفت ببلعومي لا بيها تنزل ولا تخليني اكون طبيعية ...
.
.
.
للحكاية بقيـــة

بدون مراجعة ف مليان سحكات

#منة الله_الأيوبي