ليلة من العمر

البارت الخامس

باوعتله وگلت:- شتسوي؟
حسين:- اي شي تطلبيه هسه لو اعرف اخطفج
تنهدت وعبرت من يما
شنو احجي وشنو اگول؟
هو انا بحال مصيبة ثانية
تركته ورحت بهدوء دخلت
ايدي ترجف فتحت الباب كوة
جسمي كله احسنه منحول
دخلت ورفعت راسي عليهم
نفس الرجال الجبير اللي اجا ووياه الزلم الكبار
العيون كلها صارت علية
سوالي مجال يما هذا الرجال الجبير وگال
-تعالي بنيتي يمي
باعوت لأبويه جانت عيونه مدمعه بس مبتسم اشرلي براسه بمعنى أي
رحت كعدت جانت ريحته مسك طبخت بخشمي
احس كاعدة على اعصابي
كاعرف شديصير ولا شنو راح يصير بعد
اندار علية ولزم وجهي يباوعلي ..اباوعله عيونه كامت تدمع
يبجييي وهو صافن بيه
حط راسي على صدرة وكام يشم بشعري ويجر حسرات
خالد:- يابويه يارليدي ويحتها تأذي ..الله يرحمك ياولدي الله يرحمك
رجع رفع راسي وباوعلي
خالد:- اني جدج ابو والدج الله يرحمه
ماتحملت نزلت دمعة مني بهاللحظه هاي ..قرب ايده ومسحها
خالد:- ماصدكت لكيتج يالله شكثر خبصت الدنيا عليج والله
حجيت والغصه محتلتني:- راح تاخذوني وياكم؟
حجا واحد من الزلم هذا الحلو:- بيبيتج صارلها اسبوع مانايمة من عرفت بعدج موجوده ولكيناج
رجعت باوعت لجدي وانا عيوني مليانه دموع محتاجة بس أي حركة حتى تنفجر بشلال
ماعرف شنو اسوي او شنو احجي
ساكته وبس اباوع بوجوهم
هما هذوله اهلي هسه؟
كاعدين اباوع وبنصهم ابوي
ابوي اللي ماطلع ابوي وهما الغرباء الاول مره اشوفهم طلعوا اهلي!
يالله شكد بودي هسه اكوم ركض واروح اتخل بسد بابا واكللهم روحي تروح اذا اخذتوني منا
والمشكلة ان روحتي يعني خلص هذوا
بيت اهلي ولازم ابقى يمهم ماكو خط رجعة بعد مهما حاولت
صافنه بالكاع والف فكرة تاخذني وتجيبني
كطعتوا هالصفنة واحد المنهم گال:- يلا يابويه مانترخص؟
خالد:- اي اي يلا
ديكومون حجا ابويه:- وين وين ماتروحون بدون عشه
خالد:- تسلم عمي واصله وجعله بيت العامر ..الحجيه كاعدة على نار هسه
طلعنا عالباب وانا الخطوات مني تمشي بثقل
مادري شنو متصوره كلت يمكن يشوفوني هيج يعطفون علية يكلولي ابقي ببيت اهليج
شكد جنت اعتبر روحي جبيره
هسه احس روحي طفلة ماكملت السبع سنين وجايين ياخذوها من اهلها
طلعت امي حضنتها وثنينا كمنا نبجي
همستلي:- ديري بالج على روحج ياامي ولاتنقهرين ولاتزعلين نحنا نبقى اهلج والله وانا ابقى امج لو يبعدوج عني الف مكان
بيلسان:- لاتعوفيني ماما
لزمت وجهي وگالت:- افرضي شخصيتج من اول يوم
لاتبينيلهم ضعيفة او خوافه ..اريد بيلسان اللي اعرفها بيلسان القوية هااه
لاتخلين احد يستغلج ..بعيده عني صح بس قلبي راح يضل دومه يمج
كوة وخرت منها اباوع بالوجوه ادور ابوي
لكيته واكف بصفحة بالزاويه وداير وجهه ويبجي
سلمت عالكل بنات عمي وزوجات عمي وخالاتي
وكلهم يضكوها بجيه وانا استلمها وياهم
تركتهم كلهم ورحت على بابا ماتحملت اشوفه هيج
ردت احضنه بس هو استحه لان كلهم ديباوعولنا
يعني الشخص اللي جنت انام واكعد واللعب بحضنه
هسه يستحي يحضني؟!
مايكدر حتى يباوعلي!
تقرب باسني من راسي وانا احس بروحه داترجف
خالد:- يابه قابل رايحين بلا رجعة
تقربت عليه امي وهي شاخطة من البجي
-بداعة كل عزيز عندك لاتبعدها عننا نهائيا
سد عباته وگال:- تأمرين أمر بنتي ..وعد كل فتره اجيبها الكم والله مو قليل اللي سويتوه فضلكم ماعرف شون ارده والله
عشرين سنه وانتو محتويين حفيدتي بدون مقابل
ردت ابقى بعد شوية الخ
حجا ذاك:- يلا يا يابه ورانا طريق طويل
جانو جايين بسيارة وحده والسايق هذا الرجال الحلو وجدي صعد لكدام وانا وزلمة الاخ خلف
انتبهت حسين جاي يخلي غراضي بالصندوك والحواجب مطبوكة من العصبيه
حتى حسين اللي ماجنت ارضاه هسه مستعده اقبل بي ولا اعيش بعيد عن اهلي وعن مكاني !!
قبل لا اصعد رحت وكفت كباله
هو ساكت وانا ساكته ردت يكول اي شي
او يرجع يكلي گولي شتريدين وانا اخلصج
جنت منتظرة كلمته اللي تخلصني منا
اعرف تفكير اناني ممكن يشوفه البعض وانو جايه مصلحة
بس صدكوني مرات من قساوة الموقف واحد مايعرف شنو يسوي ويتصرف وانا حسين ما اكرهه بالعكس عرفت قيمته بهاللحظه هاي
بس عبث!!
ماحجا شي بقى ساكت حتى نزل عيونه من عني
بيلسان:- مع السلامه حسين
حجا بصوت هادي:- مودعه بالله
صعدت بالسيارة واباوع لاهلي
يالله جانت هاللحظه قاسيه ..
اباوع لبيتنا وللمنطقة اللي لعبت وكبرت وتربيت بيها
تشبتت عالشباك مثل الاطفال واباوع على شبر شبر لحد ماطلعنا منها
اندار علية الرجال الجبير اللي هو جدي واشر على اللي دايسوق وگال
خالد:- هذا عمج الجبير محمد ..وهذا ابن اخويه هم يعتبر مثل عمج
وكعت عيني بعين عمي بالمراية
بسرعة نزلتها ...
مادري شكد طولنا بالطريق
بس جان طويل وطول الطريق هما يسولفون ويحجيلي جدي على شغلهم وجانو بمنطقتنا من زمان وبعدين طلعو منها
اللي عرفته عندي عم واحد وهو الجبير وعندي عمتين وابوي الله يرحمه جان الوسطاني بين عمي ووحده من عماتي
وصلنا لمكان يجنن
وكفنا يم بيت جبير اساسا المكان كله والمنطقة اول مره اوصلها واشوفها لهذا راح تبين علية شي واو
خالد:- يلا بنتي وصلنا انزلي
نزلت وانا مسطورة بالبيت وبالناس وبالحياة اللي منتظرتني!!
فتحوا الباب ودخل جدي اول واحد وفتحي الطريق
دخلت بخطوات ثكيلة وبطيئه
دخلت وانت بداخلي الف علامة استفهام وخوف
وانا لو بيدي ارجع الف خطوة لخلف ...
كعدوني بالاستقبال يطلع بكد بيتنا كله
مانشوف الا دخلت حرمة جبيرة بالعمر التجاعيد ماكله وجهه والحيل رايح منها
وجهه شاحب وحواجبها معقوده
انتچت على ايد القنفة وصافنة بيه
باوعت لجدي وحجت بصوت مبحوح بس ضخم:- هايه بنت علي؟
خالد:- ايي هايه حفيدتج الصارلج سنين تونين عليها ..شبعي عيونج بشوفتها
باوعتلي فتحتلي ايديها وهي تبجي
تقدمت بهدوء وحضنتني
حضنها دافي وبي ريحة حلوة
بس انا بوقتها جنت بحالة صدمة واستغراب احس نفسي على تكه وانفجر بيهم كلهم
كعدت عالقنفة وسحبتني كعدتني يمها
تباوعلي انا جنت مستحية
جليلة:- شلونج بنيتي؟
باوعتلها:- زينة الحمدلله
مسحت وجهه بشيلتها وگالت:- هذا بيت جدج ..بيت اهلج اللي انحرمتي منا ومنهم ..لاتستحين ولا اريد اشوفج خجلانه مننا
دخلت بنفس الوقت حرمة شوي جبيرة
سمينه متروسه وخشنه باوعتلي
كمت حتى اسلم عليها ماشوف الا سحبتني حضنتني وتبوس بيه
اسيا:- يابعد عمري هالطول وهالروح هايه ..يالله اشكرك كتبتلي اشوف بنت الغالي كبل ماموت يامن قربان وفدوه لوجهك ياربي
وخرتني شافتني صافنه بدون رد فعل گالت
اسيا:- اني عمتج اسيا
ابتسمتلها:- اهلا عمه
اسيا:- يمة فدوه لهالحلك باع العمة بلسانها
جليلة:- احمدك ياربي واشكرك الف مره يالله
الكل ديباوعلي وفرحان بس انا بحالة صدمة
مو صدمة وانما ماعرف شسوي
ماعرف شحجي او شنو لازم اتصرف هسه بهالموقف
كاعده على اعصابي مامرتاحه وخايفة
وخايفة يبين علية هالشي ماريد ابينلهم ضعيفة او شي
محمد:- كملتوا غرفتها؟
اسيا:- من البارحة مكملتها واليوم بس هويتها ورتبتها
محمد:- يلا لعد خلوها ترتاح جايين من طريق طويل
خالد:- نزلوا غراضها من السيارة
حجاها ورجع باوعلي عمي محمد هز براسه بمعنى أي
جليلة:- يمة اختك اسماء درت
محمد:- اي يمة وباجر العصر گالت راح تجيكم
سحبتني عمتي ودخلتني للبيت
جان من الداخل بعد احلى وبي ريحة طبخ مع العلم جانت نفسيتي مقفوله بس ريحة الطبخ طيبة
صعدتني للغرفة
اسيا:- هايه غرفتج رتبتها الج اني بيدي
بيلسان:- عاشت ايدج
تقربت مني ولزمت ايدي:- باعي ..اخذي عالجو
تره هذا بيت جدج صح حقج راح تشوفيها صعبة بالبداية ويمكن هسه كلنا بعدج ماحابتنا وصعبة عليج تتغير حياتج بين يوم وليلة
بس بعد هذوا لكيتج اهلج وبيت جدج ..
هزيتلها براسي بمعنى اي وانا بداخلي الف حجاية
صفنت شوي ورجعت گالت:- اكلج شنو اسمج ..يعني شنو جانو يصيحوج هناك
-بيلسان
هزت براسها ومو كلش راضيه وهي تباوعلي
-بس باعي من اليوم انتي روفان ..هالاسم والدج الله يرحمة جان يعجبه وبحيث من اول يوم اجيتي سماج هالاسم ..ف حبيبة احتراما اله ولغيابه خلي هالاسم هو اسمج
ماعرف شنو اجاوبها
حتى اسمي مو اسمي !!
هزيتلها براسي واصطنعت الابتسامة
طلعت وتركتني بحيرتي
اباوع للغرفة
شون راح اكدر اتعايش هنا انا؟
احس روحي بمغامرة
بحالة او وضع لازم افوز بي
وماعندي خط رجعة
بعدني باول ساعة واشتاقيت لامي وابويه
كضيتها صفنات لحد ما الله فرجها وجابولي جنطي اخذتهم بدلت هدومي وبقيت كاعدة بالغرفة
مستحية انزل واتمشى بالبيت
صح امي كلتلي افرضي شخصيتج
بس مو اكوم امشي بعدني من اول يوم وافتر بينهم! ..
دخلت عمتي من الباب وگالت:- يلا عمه تعالي تعشي
جانت الساعة تسعه وشوية
نزلت وراها وانا اباوع للبيت وكلشي بي
بالبيت جنا ناكل بالمطبخ دائما
هنا شفتهم فرشوا بالصالة عالكاع
جان الاكل ريحته تفتح الراس اتذكر جان تمن وفاصولية خضرا وزلايط والدجاج وشوربة
كعدنا انا وبيبي وجدي وعمتي
اطمنت گلت ايه احتمال بس ذوله اهلي يارب مايطلعون هواي
شوي ودخل من برا شاب من ذوله اللي شعرهم طويل ولبسهم ضيك
حلو جان مابي شي بس مارتاحيتله
ايسر:- السلام عليكم
شافني بقى صافن بوجهي مصدوم
تعدلت عمتي وحجت:- تعال سلم على بنت خالك
هايه روفان ..
هزلي براسه وگال:- مرحبا بنت خالي
ابتسمتله وكوة طلعت مني ال:- مرحبا
حجت بيبي :- هذا ايسر ابن عمتج اسيا
اجا كعد وبقى بس يباوعلي مانزل عينه ...

اول ليلة جانت صعبة
صعبة شكد ماوصفها
تخيلوا انو ليلتها كعدت ابجي بالليل انا ولوحدي بالغرفة
ماكدرت انام اريد امي مثل الطفل
الغرفة جبيرة شوي بس خنكتني
احس روحي كاعدة بتابوت من الخنكة !!
وابقى اردد يارب هونها يارب
جنت قبل باسبوع مشتريلي ابوي تلفون
طلعته من الجنطة لكيت جايتني رسالة من ليليان قبل ساعات گايله :
-لاتكطعين ويايه بداعة الله ..ماعندي غيرج انتي من رويحة الغالية قسم بالله معزتج عندي بالدنيا ..
احس جنت محتاجة هيج شي حتى يخليني انفتح بالبجي واللطم
اباوع لرسالتها وابجي بجي بصمت اخاف احد يسمعني يگول هاي جاهله تبجي على اهلها ...

ثاني يوم كعدت من روحي
صحيت ساعة جانت عشرة وربع
ضحكت من شفت اليوم ثلاثاء!!!
اليوم اللي جنت متحضرتله ليش هيج صار ياربي ليش؟
كمت غسلت ونزلت
ماعرف وين اروح بعدني ماندل بس المطبخ
مريت من يم المطبخ بهدوء سمعت صوت عمتي اسيا داتخابر بس ماعرف ويامن
اسيا:- اي ول البارحة وصلت جابوها جدك وابوك
عرفت داتحجي عني گلت خلي شوي اسمع
اسيا:- ههههههههه انجب ولك عابتلك ...لاااا عود تجي وتشوفها
صدك شوكت طيارتكم؟ ..لعد مادكوم تحضر غراضك شعندك باقي بالمنام لحد هسه ...ديلا حبيبي وكول لأخوك ذاك ابو راس عمتك ضايجة منك إذا جيت لتشوفها وجهك
سمعت صوت احد ديمشي بسرعة سويت روحي توني نازله ودخلت للمطبخ
بيلسان:- صباح الخير ...
.
.
.
للحكاية بقيـــة

تكدرون دگولون الروايه هسه ابتدت
وهسه بلشت حياة بيلسان ..
زين بيلسان لو روفان🤔؟

#منة الله_الأيوبي