ليلة من العمر

البارت السادس والثلاثون

عالسريع فتحت الجرارات وطلعت علبة جانت بيها قليل جم وحده
شربتها وخليت راسي عالمخدة ...نزلت دموعي
هو شنو هالحاله اللي وصلتها انا؟ ..غطيت وجهي وبجيت
بجيت لحد ما نمت بدون ما احس ...

ثاني يوم كعدت على صوت خبصه وهوسه جوا
تعدلت وكمت طلعت من الدرايج شفت جهال عمه نعمة
بسرعة رجعت لغرفتي ولا اريد اشوفها
من ذاك اليوم وانا ماملتقيه بيها ابد بقيت اللوب بالغرفة حتى النومه طارت وراسي مصدع
سمعت صوت قيس جوا جايب المعالج الطبيعي مالعمه اسيا
بقيت كاعدة بالغرفة واكلب بالتلفون لو اتمدد واصفن
شوي وجتني رساله
باوعت اوس:- بعدج نايمة؟
بيلسان:- لا كاعده
اوس:- لعد وينج
بيلسان:-ويني؟ ..بغرفتي
اوس:- ساعه وحده ونص ليش باقيه بالغرفه بيج شي؟
مريضه يوجعج شي؟
جنت دايخة ف داكتب ببطئ بعدني جاي اكتب اتصل علية
فتحته
اوس:- ها
بيلسان:- ها ها
اوس:- شبيج
بيلسان:- مابيه شي والله
اوس:- لعد وينج ليش مانازله
بيلسان:- ماكو شي
اوس:- من شوكت تضمين عني؟ ..احجي اسمعج
بيلسان:- عمة نعمة جوا وماريد اللتقي بيها
اوس:- هاا فهمت
بيلسان:- شون عرفت انا مانازله
اوس:- سالت قيس وگال ماموجودة
للحظات وخر سمعته ديحجي ويه واحد وياه
شوي ورجع گلي:- اي شسمه الو
بيلسان:- الو وياك
اوس:- كومي بدلي ..وخلي يجيبج قيس يمنا للبيت
بيلسان:- لا اوس شيجيبني
اوس:- ماتبقين ويه عمة انتي ..كومي يلا سمعي الحجايه
بيلسان:- بس
اوس:- بلا بسابس يلا كومي وجيبي دوياتج هاا يلا راح اروح هسه وراح اخبر قيس هم اگله
حجاها وسده
كمت غسلت وبدلت هدومي
وجبت جنطه صغيرة خليت قطعة هدوم كلت خاف نمت هناك لا اتبهذل مثل بيت ماما صح جنت مستصعبة الروحه بس كلت احسن ما ابقى هنا ولوحدي وهسه يجي رجلها وهم يذبله حجايه وماتحمله
صرت اتجنب اي كلمة لان ماعرف شكد ممكن راح تاثر علية وتخليني اصارع ايامي المتعبة بيها !! ..
بدلت وخلصت نزلت جوا لكيت بيبي وعمه كاعدين بالصالة
شافتني راسا دارت وجهه
جليلة:- ها بيبي انتي صارلج ساعه معلكه كل هذا ..على خير وين
بيلسان:- رايحة بيت عمو محمد
رفعت حاجبها
جليلة:- وشكو
بيلسان:- هيج رايحة 
بوكفتي طلع قيس وياه المعالج سلم علينا وطلع
جليلة:- اكو شي يعني لو شنو
بيلسان:- شنو ماكو شي بس هيج رايحة
شويه ورجع قيس دخل ..باوعلي:- ها خلصتي
جليلة:- شكو وليش ماخذينها وياكم
قيس:- بيبي وغفران بنت خالتي جايين يمنا كالوا نريد نتعرف عليها وهاي ..هسه بيبي يعني شكو ليش هالاسئله تره اني تعبت شكد ماتسألين شكو شكو يعني اهوووو وانتي امشي كدامي
لغمطها عليها وسوا نفسه ديتقشمر
ضحكت وراسا طلعت كباله
اجا وراي باوعلي وهمس
قيس:- هو شكو
بيلسان:- هو صدك بيبيتك جايه وتريد تتعرف علية؟
قيس:- هي اي جايه بس ماتعرفج اصلا بس هيج گلت
بيلسان:- اي انا جيت لأن ماريد ابقى هنا ويه عمة واصلا اوس گلي
قيس:- هااااا طخت
طلعنا وجان منتظرنا المعالج وصله اول شي بعدين باوعلي وگال:- راح اوديج للمستوصف
بيلسان:- ليش
قيس:- اوس گلي تشيلين الكانولة
باوعت لايدي ..صايرة هيكل عظمي من شكلها
تنهدت ودرت وجهي ..رحنا للمستوصف وشلتها
تعودت عليها حسيت شي فارغ بيدي ...
وراها رحنا على بيتهم
بيت عمي محمد صغير وبسيط
بس كلش مرتب بحيث كل قطعه بي كاعدة بمكانها تحسوها وهيجي كل غرفه لون هي واثاثها
دكينا الباب طلعتلنا بنان
قيس:- ها بيبي جاي
بنان:- اي قبل نص ساعه هيج
دخلنا جان ريحة الطبخ يالله
جنت مستحيه ومتفشلة من جيتي 
دخلنا الصالة لكيت حرمه جبيره بكد بيبي هيج بس من ذوله العجايز اللي تحسوهم خبره بكل شي وريحتهم طيبة
وبنيه صغيره شباب حلوه سمرا
شافتني جتي علية خاله هاجر وتبوس بيه اندارت عليهم
هاجر:- هاي چنتي خطيبة اوس
سعاد:- يامحمد ..تعالي تعالي
فتحتلي ايديها تقربت بستها وباستني
سلمت عالبنيه
هاجر:- هاي أمي ..وهاي بنت أختي غفران
بيلسان:- اهلا وسهلا
ابتسمت وكعدت يمهم ..جنت كلش مستحيه وشوي حسيت انو ورطه جيت وياريتني ماجيت اوف منك يا اوس هسه شيكولون عني ..
بقينا كاعدين شويه نسولف بس انا يسالوني على بيت جدي وعمتي اسيا
شويه واجا عمي محمد
اول مادخل كامو وكفوا يسلمون عليه
كمت شو تقرب وباسني من راسي
مادري بس هيج كزبر جسمي !
يمكن اول مره شخص يبوسني هيج بوسه دافيه
استحيت هواي راسا ابتعدت بهدوء
حضرنا الغده وكمت وياهم احضر اوس ما اجا يكولون للمغرب يجي
نزل قيس وكعدنا كلنا تغدينا
ام خاله هاجر وهي خاله هاجر اصلا من غير قوميه
حبيت امها هوايه فريحيه يعني واحد يطمنلها بسرعه وبس يحب يكعد يسولف وياها حجيها حنون
من خلصنا ماقبلت خاله هاجر اسوي شي بس كتلها انا وبنان ننظف
شوي وجتنا غفران رادت تغسل وياي ماقبلت كعدت يمنا ونسولف
هي طلعت بصف خامس اعدادي بعدها متاخرة ثلاث سنين بس ماسالتها عن السبب استحيت گلت خاف ماتحب تحجي
شوي ودخلنا كعدنا بالصالة بس بصوت ناصي لأن بيبيتهم نايمه يمنا
المشكله بعد ما اخذت عالجو بعدني متجنبة ومتشنجة من الوضع
لهذا جنا اغلب الوقت كاعدين نصفن شويه لحدما الله يقدرنا ونفتح سالفه ..
دخل اوس
حسيت گلبي فز من شفته
مادري بس لأن يمكن صارلي يومين يوم ماشايفته!
ابتسم وسلم على غفران
تقرب من بيبيته
اندار علينا وهمس:- صارلها زمان نايمة؟
بنان:- لا ماهواي
اوس:- لعد عوفوها خطيه نايمه
بنان:- جوعان؟
باوعلنا وحك بلحيته
اوس:- لالا مو هواي
باوعتله ومادري شجاب بالي گتله:- تريد احضرلك بعده حار الاكل شوي
صفن بوجهي شوية ورجع گال
اوس:- اي لعد
گلتله بنان وهي تباوعلي وترجع تباوعله
بنان:- مو انت مو جوعان
اوس:-عاد هسه جعت انتي شكو
ضحكنا كلنا وكمت للمطبخ احضرله الاكل
حسيتني انا اكبر منهم ف لازم انا اهتم بهيج سوالف مادري حبيت اتحرك وابرز نفسي بجيته
شوي ودخل سبحان ووجه مي بعده مماسحة زين
ريحته قوية ..
تقرب جان جگ المي يمي
شرب وديدندن أغنية
اوس:- وبموت فيه موت طول مانا وياه ..ماهو معنى الحب لقيتو معاه
صوته حلو هادئ
خله الكلاص ودالمحه بطرف عيني ديباوعلي
باوعتله أنا وداصبله التمن
گتله:- شكو؟
اوس:- هاا
ابتسمت ورحت خليتله الصحونه
بيلسان:- يلا تعال أكل
كعد ردت ادخل لزمني من أيدي:- تعاي
بيلسان:- شكو
اشرلي اكعد يما
بيلسان:- تغديت
اوس:- كعدي بس ..سويلي واهس
وخرت ايده ورحت كعدت يما
اوس:- خومو حجيتي شي ويه عمه
بيلسان:- لا من نزلت راسا رحنا سألتني بيبي ليش ومادري شنو قيس لغمط الموضوع
اوس:- شگال
بيلسان:- گالو انو بيبيتك وبنت خالتك جايين فـ يريدون يتعرفون علية
اوس:- اي زين
بدا ياكل وانا سحبت تلفوني ونزلت راسي داكلب بي
رفعت راسي شفته ديباوعلي ...سألته:- شبيك مضيع شي بوجهي؟
اوس:- روحي
صفنت بوجهه وكمت ابلع ريكي
ماعرف شنو احجي
استحيت واحس صار بداخلي مادري شصار فد شي مامفهوم ولا كدرت افسره
بسرعة درت وجهي وكمت الله نقذني ولكيت مواعين شويه عالسنك كمت اغسلهم حتى اندار عنه
شوي ودخلت غفران
غفران:- اوس بلا زحمه بس جبتلي الملازم اللي كتلك عليهم
اوس:- اي بس والله بالمكتب مالتي بعدهم باجر بس اروح ذكريني اخليهم بالسيارة
غفران:- يلا المهم جبتلي عاشت ايدك
اوس:- تدللين شنو تريدين وصيني ابد لاتقصرين بشي
ابتسمت وگلتله:- حيل شكرًا
حجتها ودخلت
كمل اكله اجاه اتصال كام دخل لميت وخلصت تنظيف
راسي رجع يموتني
غراضي خليتهم بغرفة بنان دخلت طلعت الدوا شربته وشربت المهدئ
شفت تلفوني متصله علية امي
كعدت على فراش بنان واتصلت بيها شوي سولفنا وحجينا وختمته وياها
لا هي تبين نفسها حزينة كبالي ولا انا ابين
بس ثنينا نعرف انو داخلنا دينزف من الحزن وساكتين
مابيدنا شي ثاني نسويه ..
خلصت وياها كمت احس عيوني كامت تغووش بس خليت راسي عالمخده ماحسيت بعد بشي راسا نمت ..