ليلة من العمر

البارت الواحد عشر

ماحس الا صار بوجهي ايسر
فزيت وحتى الجنطة وكعت من ايدي
گلبي احسه راح من الخوفة
كشييت منا ردت بسرعة ادخل للغرفة صار كبالي
ايسر:- اوكفي دقيقة بس
بيلسان:- وخررر
ايسر:- بس دقيقة الله يخليج
باوعتله بخزرة:- شرايد
ايسر:- والله والله ماجنت بوعيي
ماكدر اباوعله نزلت عيوني من عنه واحجي:- ابعد عني ترى لخاطر عمة ما فضحتك
ايسر:- اعرف والله اصلا اجا اوس ونزل بيه ضرب ورزايل ..بس والله والله ماجنت صاحي بوقتها
بيلسان:- اي ديلا بس وخر عني ماريد تبقى بوجهي
حجيتها وعبرته
گال:- حتى انتي؟ ..والله ماردتج تاخذين نظرة مو زينة عني
انداريت عليه وگتله:- انت اصلا اي واحد يشوفك راح ياخذ عنك نظرة مو زينة ..باوع على شكلك وتصرفاتك واولها تعاملك ويه امك
نزل راسه ساكت ماحجا شي
رجع رفع راسه وگال:- زين عادي تصيرين صديقتي؟
صفنت ماعرف شنو ارد عليه
هسه شجاوبه هذا!
هو انا ماناقصني بس انت والله
بيلسان:- ايسر ..انا بنت خالك ومثل اختك صدكني ماعندي مشكلة اتجاهك بس ماريدك تطلع بوجهي الله يخليك
حجيتخا ورحت ركض لغرفتي
وسديت الباب بوجهه قوي
خفت خفت طول ماجنت واكفه واحجي احس على اعصابي ورجفة گلبي واكفه
يالله رجعت للخوف والتوتر
رجعت لهالشعور المقرف ليش مابقيت هناك لييش ...

بدينا بتحضيرات العيد
هذا اول عيد بعيد عن امي وابوية!
جانت صعبة هالفكرة مجرد ما تصير ببالي احس اريد ابجي بكل ماعندي من دموع ..
نزلت للسوك ويه عمتي
واشتريت هدوم وحجابات ومرينا عالصالون بالمنطقة
صديقة عمة حفتني ونظفتلي وجهي
گلتلي انتي على باب كلية ودوام ولازم اترتب
عمري مافكرت بهالشغلات والسوالف
امي ماجانت تحجي بهالمواضيع كبالنا ولا حتى تخلينا نسمعها
لهذا جان امر غريب علية احسه ..
راح مني كورس بس عمي گال راح يحاول ويه الاساتذة
بس حتى امتحنه واكمل الكورس الثاني اداوم بعد العيد ...

صار يوم عرفة
اجو بيت عمي محمد وكعدنا وياهم نحضر
نحضر بالفطور وشويه يحجون عالعالم
وشويه يستغفرون
جانت لحظات جديدة علية بس حلوة
ولمن اللتمينا رغم هوستهم وخبصتهم الحلوة
بس مامرتاحه جنت
جان گلبي وعقلي كله عند اهلي
جنت اتمنى اقضي هاليوم وياهم!
اليوم كله ماوقفت عن الدعاء الهم واترحم لأختي
المغرب جنا داننتظر الأذان
كملنا كلشي بالصالة ..الصالة صارت خبصة
جدي بصفحة كاعد ينتظر ياذن حتى يصلي
وعمتي ومرت عمي مترقبين السفرة خاف بيها شي ناقص
بيبي مادري شدتدردم يمكن داتحجي علينا
قيس واوس وعمي كاعدين يتفرجون عالتلفزيون على قناة دينية
جانت لحظات دافية وحلوة
اول مره اعيشها
اول مره اكون بوسط هيج ناس كومة
تعلمت عالهدوء والبساطه بكلشي وكل حياتي
مفتقدة بيبي وجدي من انا وطفلة من هيج ماجان عدنا هيج اجواء ولا بحياتي عشتها حتى عمامي مو شكول واحد ينجمع وياهم ...
ماتحملت ردت اكعد لوحدي
طلعت للمطبخ يم الباب وكفت وفتحت الباب الرئيسي
خليت بس باب المشبك
وعيني عالسما واسمع المؤذن يقرا
حجيت وانا عيوني عالسما
حجيت بگلبي كلشي باقي بخاطري
يالله ..
يالله رحمتك وحكمتك من كلشي ديصير
يارب شكد منتظرة جبرك عن كلشي عشته
من موتت اختي لحد ما هسه فقدت حتى اهلي وهما عايشين!
اعرف انو بعد كل شي ديصير راح اشكرك عليه
بس تعبت انتظر
تعبت اصبر روحي بهالكلام بعدني باول ايام واحس اختنكت مابعد بيه اتحمل ولا يوم الاخ
يمكن اريد ارجعلهم مو علمودي
اريد ارجع علمودهم ..هما ماعدهم غيري
وماباقيلهم بهالدنيا غيري شون راح اهدء گلبي وانا تاركتهم لوحدهم
منو هسه مهتم بيهم؟
دگلي مدبرين روحنا بس انا اعرف هي تحجي هيج حتى لايبقى بالي يمهم ..واعرف بيها هسه شكد حياتهم صارت منطفية
تركتنا نورهان وحسيت بوقتها ولحد هسه كلشي بهالدنيا منطفي
فما بالكم هما هسه حياتهم شكد صعبة !
ابويه كبر وامي كبرت
وثنينهم صحتهم بالنازل ويحتاجلهم من يكون وياهم ويداريهم
يالله كلشي جاي يصير على گلبي ..
جنت احجي بصوت خافض ومغمضه عيوني
صدفة فتحتها لكيت حركة بالمطبخ
انداريت بسرعة لگيت اوس توة طالع
استغربت شنو جابه وشجان ديسوي!
هذا الانسان المعقد هم جنني
استغفرك ربي واتوب اليك ...