ليلة من العمر

البارت السابع والعشرون

ركضت بسرعه لكيت عمتي جاي تستند عالبوب وتمشي
رحتلها ركض
بيلسان:-ها عمة رايده شي اجيبلج شي
باوعتي عيونها وارمه من البجي
رادت توكع راسا لزمتها كعدتها عالقنفه
كعدت يمها ولزمت ايدها ..وتقربت بستها من راسها
بيلسان:- يرجعلج والله انتي امه لو وين مايروح مصيره يرجعلج
حجت بصوت مبحوح:- اني اعرف ابني .. اني اعرف شكد كاره وجوده هنا ... مستحيل يرجع
بستها من ايديها
بيلسان:- لادكولين هيج هو ماعنده بس ام وحده لو وين ماراح ..الا مايرجع لحضنج
باوعتلي عيونها مدمعه
اسيا:- جنتي تدرين مو
باوعتلها وعيوني مدمعه ..هزيت راسي بمعنى لا
اسيا:- بلي هو كلج لمن طبيتيله للغرفة
صفنت شوي ركزت
اذكرت لمن كلي راح اشرد ولمن فزيت من سمعت صوت حركه يم الباب
باوعتلها وفتحت عيوني
اسيا:-اي سمعتكم ..وانكسر كلبي بس جنت اصبر روحي اكول جذاب مايسويها ماتوقعت لهالدرجه كلبه حجر وعافني
نزلت دمعتي
هي هم اكو هيج ناس ماتهتم لاهلها؟
هم اكو هيج كلبهم قاسي بحيث ميفكرون بالي يسوه
امه هاي يابشر امه
لو شكد ماقست عليه بالنهايه هي احن وحده بهالدنيا عليه
ماعرفت بعد شحجي وشكوللها
لازمه ايديها وهي تبجي بصوت ناصي واني دموعي تنزل
عافتني وكالت:- رايحه اتوضى
بيلسان:- اجي وياج
اسيا:-لا بنتي لا
عافتني وكامت وتمشي احس حيلها رايح ..بقيت اصفن
والنغزه بقلبي كرهتني بحياتي
ياربي دخيلك شهل سفره الكشره
باوعت عالجنط بعدهم جوا تذكرت تلفوني
رحت فتحتها وطلعته
فتحته لكيت بس مكالمتين من ماما
معقوله بس ثنين؟!!
معرف بس اكو شي مو طبيعي
ولكيت رسايل من اوس
بعد توني فتحتهم وداكتبله .. اتصل رديت
اوس:- وينج
بيلسان:- الو اوس
اوس:-شبي صوتج شصاير
بيلسان:- ماكو شي
اوس:- عمه كعدت؟
بيلسان:- اي هسه وراحت تتوضى
اوس:- شونها
بيلسان:- تكسر الگلب
سمعته تنهد .. سكت ورجع كال:- وانتي؟
بيلسان:- شبيه
اوس:- هو اني داسالج شبيج انتي
بيلسان:- مابيه شي
اوس:- خبرتي امج؟
بيلسان:- هسه فتحت التلفون بعد
اوس:- دازتلج رسايل عالفايبر كايله ماعدها شحن وكهربهم طافي
بيلسان:-اهاا من هيج متصله بس مرتين
سكت ماحجا شي ..بقيت ساكته اني هم
اوس:-عينج على عمه واني باجر الصبح اجيكم
بيلسان:- ماعرفتو شي عن ايسر
اوس:-ماكو شارد للشمال
بيلسان:-اوووفف
اوس:-الله كريم ... يلا اروح هسه
تصبحين على خير وانتبهو على نفسكم
بيلسان:- تمام وانت بخير
سديته وبقيت اصفن بالكاع
حسبه تجيبني وحسبه توديني
رجعت فتحت التلفون وداكلب بي
لكيت كايلين بكروبنا الدوامات بعد اسبوع وجم يوم
عزاا والله ماعندي واهس اداوم شهل لوصه
انوب النتائج بس ربي يستر ..
انكسر واهس من كلشي بهاللحظة هاي ..

ثاني يوم كعدت فزيت على صوت التلفون
باوعت لكيت ماما
راسا تعدلت وفتحته
- ها يمة حبيبه شونج
بيلسان:- الو ماما حبيبييي
-رجعتو لا
بيلسان:-اي البارحه بس مادكيت عليج لان رجعنا وتلكتنا مصيبه
- خير ياستار شكو
بيلسان:-ابن عمتي اسيا شارد من البيت لمن جنا هناك
- ياهو هذا الدكولين مو طبيعي
بيلسان:-اي ايسر
- وين ولى
بيلسان:-يكول اوس للشمال طالع وعمه ذابت روحها هاي البارحه كله هي بس ادك على نفسها وتبجي
- يايمة الله يرجعه لحضنها
بيلسان:-اي والله .. انتو شونكم بابا وينه
- الحمدلله يمة مشتاقتلج ماما شوكت تجيني
بيلسان:-اوف اي والله حتى انا اشوف اوس شوكت يجيبني هسه وكتها طلعت سالفة هذا ايسر
- يلا ميخالف .. شوكت دوامج
بيلسان:-بعد اسبوعين
- اي زين بعد عندج مجال ..
سكتت شوي ورجعت گالت:- يلا امي روحي اني هم اكوم احضر الغده
بيلسان:- بوسيلي بابا هواي
-يوصل حبيبي سلميلي على رجلج
تنهدت وكتلها :-يوصل
- صيري ادميه وياه
بيلسان:-شمسويه ليش
- مادري بس ادري بيج شونج
بيلسان:-اي بس ماتدرين شونه
- لا حسيت بي خوش رجال
بيلسان:-اوكي اوكي ماما
- يلا روحي وانتبهي على نفسج