ڪَـــيَانْ

الفصل الثالث عشر _ ويتوبُ عليه

الفصل الثالث عشر"
"رواية ڪَـــيَانْ"
✧✧✧✧✧✧✧✧✧

قالت بصوتٍ عالٍ ولهجةٍ دبت الرعب بأواصله وهي تمسك من طرف ذراع معطفه:

"أنتَ برضه مش عاوز تحرم يا شهاب؟!"

نظر لها «شهاب» بخوف وردد:

"كـيـان !!"

ردَّت عليه «كيان» بحزم:

"أيوه كيان"

ثم رفعت صوتها ونادت على الجميع لينتبهوا لها:

"تعالوا.. كُل اللي في البيت يجوا حالاً"

اجتمع الجميع إثر صوتها العالي وتعجبوا عندما وجدوها ممسكة بطرف ذراع معطف «شهاب» وبيدهِ شئٌ ما، فتحدث «باسل» بتعجب:

"هو في إيه يا بنتي؟! ومالِك ماسكه إيد شهاب كده ليه؟!"

تحدثت «كيان» بضيق:

"اِنطق يا شهاب وقول كُنت بتعمل إيه؟!"

نظر «شهاب» أرضًا بخزي من أفعاله فتعجب الجميع أكثر، فتحدث «فهد» بتعحب:

"ما تقولوا في إيه يا جماعه، وإيه اللي في إيد شهاب ده؟!"

تحدثت «كيان» بسخريةٍ وهي تسحب الكيس من يده:

"ده كيس بودره، مخدرات يعني أصل شهاب كان بيحطهالك في العصير"

ضحك «زيدان» بقوةٍ وقال:

"يخربيت عقلك يا شيخه اسكُتي، ده أنا صدقتك وقولت إنك بتتكلمي جد"

ردَّت عليه «كيان» بتأكيد:

"بس أنا بتكلم جد فعلاً يا زيدان"

نظر لها الجميع بصدمةٍ فتحدثت «غالية» بعدم تصديق:

"بس يا كوكي متهزريش في الحوارات دي"

تحدثت «كيان» بعصبيةٍ وتأكيد:

"بس أنا مش بهزر يا جماعه.. أنا فعلاً بتكلم جد، شهاب بقاله يجي شهر بيحط المخدارات في عصير فهد"

شهقت النساء بفزعٍ وردد «فهد» بصدمةٍ:

"إيييه؟! يعني أنا مدمن؟!"

اِنقض «رعد» على «شهاب» وأمسكه من تلابيبه وهزه بعنفٍ وهو يقول بعصبيةٍ شديدة:

"اِنطق يا زفت عملت كده ليه في أخويا؟!"

بينما وقف «فهد» مصدومًا وخائفًا من فكرة إدمانه، فتدخلت «كيان» بضيقٍ وصياحٍ وهي تبعد «رعد» عن «شهاب»:

"سيبه يا رعد.. بقولك سيبه"

ابتعد «رعد» عنه على مضضٍ وتحدث «فهد» بصدمةٍ عندما تذكر:
"يعني إنتِ يا كوكي اللي بقيتي مدمنه؟!"