#عرس_الذيب
🖊 خولة الغريب 🖊
🍾 بارت 40 🍾
تبعات البنت للبيت لي قالها .. كانت عبارة عن غرفة صغيرة .. فالراس كاين البياص فين غتجلس و حداها التلفزة و الآلات دالكشف ..! كرسي صغير فالجنب و جوج فورنويات كبار مسخنين الجو ..!
الفرملية:( دوزات واحد الريدو و قالت بابتسامة ) أجي لهنا تبدلي عليك .. أنا نعاونك يلا ما قدرتيش
شريفة: لا ماشي مشكل .. واش نحيد كلشي ؟
الفرملية:( مداتلها واحد ليزار ) من التحت حيدي كلشي و لوي عليك هذا و حتى لي سوتيام زوليهم ..!
شريفة: واخا
خذات من عندها ليزار و دوزات الريدو عليها .. مقاتلة كتحيد فلباسها .. حتى كملات و خرجات عندها
الفرملية: أجي معايا نعاونك تطلعي ( شدات فيها تا طلعات فداك الدريجات الصغار و تكات فوق البياص ) لا لا .. حطي رجليك فهاذ الحديدات بحال كتكالي بيهم ( متبعة معاها ) فوالا و زيدي هبطي للتحت شوية
شريفة:( دارت لي قالت لها و رادة لبال ) واش نزيد ؟ حاسة براسي غنطيح ..!
الفرملية: لا ما غطيحيش .. غير باش يبان مزيان .. صافي دابا راك هي هاذيك ( شافت فوجهها بانتلها مزيرة ضحكات و قالت ) غير ارتاحي ما عندك مناش تخافي
فوهات لباب شوية و عيطات للطبيب لي دخل داير ليكات فيديه .. قرب لعندها .. كيقلب لها فصدرها من فوق الحوايج ..! حرك راسوو بالإيجاب بمعنى كلشي هو هذاك .. و داز كيقلب لها فكرشها بيديه .. لي كيبركو بالجهد .. حتى غوتات و حبساتوو ..!
الطبيب:( عاود زير و غوتات .. طلق منها و قال ) عندك المصران الغليض منفوخ
جر الكرسي و جلس لتحت حدا رجليها و بصوت هادئ هضر مع الفرملية لي معاه .. حتى عطاتوو واحد الأداة صغيرة بحال شي مسمار و فيها شي جعابي كيخلعوو غير شافتهم شريفة غمضات عينيها و زيرات عليهم بالجهد .. كتردد بصوت خافت
شريفة: يا ربي .. يا ربي .. اممم يا ربي
حلات عينيها شافتوو دار شي مادة فبواطة صغيرة و هضر مع البنت لي مشات كتكتب فواحد الورقة حطاتها مع البواط ..!
الطبيب: السونار ..!
هزاتوو الفرملية .. دارت فالراس ديالوو جيل و وقفات على شريفة كطلعوو معاها بشوية .. كتحاول ما تقسحهاش واخا هكاك وجعاتها حتى غوتات و قطعات فراسها الصوت .. صابرة حتى شد بلاصتوو و تكلف الطبيب بنفسوو .. كيحرك فيه و عينيه فالتلفزة ..!
الطبيب: الوالدة نقية الحمد لله ( نعتلها بصبعوو تشوف ) المبيض حتى هو ( كيحرك و يهضر ) العملية درتيها بالجراحة و لا الليزر ..!
شريفة: بالليزر .. حيث أنا عمري ولدت و ما عندي حتى شي تشوه و ما كانش مرخي بزاف ..!
الطبيب:( حرك راسوو كيفحص فيها و يسمعلها ) كتبقى الجراحة حسن ببزاف .. واخا كتاخذي شهر كامل باش تبراي .. عكس الليزر لي ف 3 ايام كترجعي لحياتك الطبيعية ( حيدلها السونار و ناض كيزول الليكات من يديه ) الأمور كلها عندك مزيانة .. كملي و تفضلي عندي ..!
أنت تقرأ
عرس الذيب 🐺مكتملة🐺
Romance💎مكتملة💎 هناك قلوب عاشت وماتت وهي تنتظر فقط لحظة عطف وإحتواء ! وهناك قلوب قد غدر بها رغم أنها لم تنبض يوما إلا بالوفاء ! و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء ! 🐺 عرس الذيب ...
