#عرس_الذيب
🖊 خولة الغريب 🖊
الفصل الثالث - ذنب لا يغتفر -💣 بارت 151 💣
حكيم:( هز عينيه فيها و بجدية قال ) بغيتي غير الطلاق ..! جاك ا مدام ..! صداقك غيبقى لك تصرفي فيه كيفما بغيتي ( على الدار ) و النفقة غتوصلك كل شهر تال عندك ..! وجدي راسك غذا نمشي معاك نفكوو هاذ المنامة ( باستهزاء ) بلا ما نعذبوك و نجرجروك فالمحاكم ..!
بلعات ريقها كتشوف فنظراتوو الجدية و الطريقة الحازمة باش كيهضر ..! هي لي من وجهها باينة غير كتهدد .. باغى ترجع تسمع منوو .. الفراق هو لي عمرك تحلمي بيه بغيتي و لا كرهتي ما يفرقني عليك غير الموت ..! من نهار دخل لحياتها بزز منها و هو كيقولها و يعاودها و دابا جاتوو ساهلة يقبل بالطلاق ؟
مزالة كتستوعب تا طارت حبيبة من بلاصتها غتطرطق بالفقصة معاهم بحال القلية ..! عينيها خارجين و جنابها طيباتهم بالضرب .. كل مرة خابطاهم بيديها كتويل ..!
حبيبة: لاااا مزياااان و لاهيلا مزيان هاذشي ..! الطلاق هو لي بقى لكم ..! و الله و ما تديرو عقلكم و تتفاهموو حتى نعلقكم و نبقى غير نعطي فينما جات ( طرطقات عينيها فيهم ) مالكم كبرتوو عليها ؟ يالاه تردو عقلكم لبلاصتوو ..! نتي ا داك الجنية يلا ما جلستيش على داك المساسط لي كياكلوك و تكمشتي و الله تا نشويهم لبنتي ..!
شريفة: وا خالتي ..!
حبيبة: يخلي الشيطان راك مزوجة و تخرجي فنص الليل و تفرعي الباب زايدة بحالك ما مقبولاش و تصاورك ما يتنشروش و عباد الله يتفرجوو فيهم و هو آخر من يعلم ..! ( ضارت لولدها محمرة عينيها ) و نتا ا الكبير فخوتوو و المرزن فيهم ..! ما جبناش بنات الناس عندنا نتكرفسوو عليهم .. عارفها مريضة و ما عندها حد و كتعطيها فالدق ؟ و مكملها مهبطها مجلسها مع المحابسية ..!
شريفة:( ردات كتأكد ) ربعة و عشرين ساعة فالضس ..!
ملاك:( قالت كتشوف فيها حاطة يديها على حناكها كتبردهم ) تستاهلي ..!
حبيبة: سكتووو .. يسكت لكم الحس ..! تبارك الله عليكم زعما ما عندي ما نسالكم .. تا قلت ارتاحيت من جهتكم و باغيين تسكتولي القلب فخطرة عاد ترتاحوو ..!
رد الكل عليها تا من نور مكمشة فحكيم خلعاتها : الله ينجيك ..!
حبيبة: هي غلطات و نتا غلطتي و سالينا ..! نعلوو الشيطان و نوض دي مراتك لداركم صلحوو لي بيناتكم و نعاود نسمع شي واحد فيكم كيجبد الطلاق على فموو .. نهز جلابتي و ما تعرفوني فين زدت .. و الله تا نديرها و نخليكم تضبرو محاينكم ..! و ها السخط ها الرضى يلا عاودتي حطيتي فيها يديك .. غنسخط عليك ا حكيم يلا مشيتي تا ضربتيها ..!
حكيم:( وسع عينيه و قال بتفاجئ و بنبرة مصدومة ) يَّما ..!
حبيبة: ما كاين لا يّما لا خالتي .. صافي هضرت معاكم بجوج و يلا ما كنعزش عليكم ديرو لي قالكم راسكم و خليوني نطج للزنقة يضربوني الحيوط تقول ما عنديش الولاد مقطوعة من شجرة ..!
أنت تقرأ
عرس الذيب 🐺مكتملة🐺
Romance💎مكتملة💎 هناك قلوب عاشت وماتت وهي تنتظر فقط لحظة عطف وإحتواء ! وهناك قلوب قد غدر بها رغم أنها لم تنبض يوما إلا بالوفاء ! و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء ! 🐺 عرس الذيب ...
