#عرس_الذيب
🖊 خولة الغريب 🖊
الفصل الثالث - ذنب لا يغتفر -💣 بارت 149 💣
رجعات للوطيل شربات الدوا ديالها و دوشات من الرملة تا ترخات و ولاو عينيها كيتشدو بوحدهم بالدوا لي كيفضيهم لها و لكن قررات ترجع تاخذو بانتظام باش تولي شوية فصحتها ..!
نعسات تا شبعات و خرجلها النعاس من الوذنين و ناضت بالشوية عليها وجدات راسها و ماكات وجهها بالخاطر عاطية لراسها وقت و مهتمة بيه على الآخر ..! ب كسيوة سخونة و بوط طالع تال ركابيها و شعر مسرح و مبوكل فالجناب مع مكياج مغطي الدقة .. مركزة على عينيها مجبداهم و صابغة شنايفها بلون الاحمر لي كتسطى عليه .. خرجات كتمشى ..!
مشات للبوفي شافت شنوو دايرين فالعشا و تلذذات بلي عجبها جالسة بوحدها تا سمعات الضحك موراها و شافت داك العيالات د الصباح مجمعين فطبلة طويلة .. شي عشرة بيهم و اغلبيتهم مقاربين فالعمر ما كيضورش حس الرا٠جل حداهم .. ما كاين غير قولها و ضحك عليها ..!
شافتها وحدة منهم و شيرات لها كتأكد عليها تتزاد عليهم و بالفعل ناضت هزات طبسيلها و جلسات معاهم كتاكل و تسمع أحاذيتهم عينيها ضاحكين و كل وحدة كتعاود على زبلة من زبايلها و هي صغيرة .. فشلوها و فوجات معاهم و من العشا ديريكت للقاعة ديال الانيماسيون .. قبالتها قبة مجمعين فيها الدراري على البيار كيلعبوو و جلسة مجنبة بالضواو فاللون فالازرق بارد بلي فوطوي ضايرين .. كيفرق البارمان الشراب .. مخلطين كور و مغاربة كيشربوو و يكميو منهم بنات و منهم رجال ..!
و لداخل طالقين الموسيقى و لي منشط الليلة داير جهدو باش يشخض الجو .. كلشي كيشطح و يغوت دايرين بيناتهم مسابقات باش يكثر الحماس .. تا تطلقات اغنية رومانسية و ناضوو لي كوبل كيشطحوو و جرو معاهم تا شريفة .. كل وحدة مع صاحبتها ..!
شادين فبعضياتهم كيشطحوو و يكركرو تقول ضاربين المعجون و هما غير مستمتعين بالسيمانة الوحيدة فالعام لي كيتجمعوو فيها و مفوجين على شريفة .. لي لقات راحتها وسط الغوات و التصفار و تا هي طلقات صوتها كتغوت من اعماقها باغى تتفاجى و مرتاحة منين تا حد ما داها فيها و كلها حاضي جنبوو و الدنيا مأمنة بالحراسة لداخل لا ضسارة لا تصوير ..!
**********************************
دازت سيمانة و هي طافية تيليفونها منقاطعة على العالم الخارجي ..! كتصبح على الفطور مع العيالات لي تعرفات عليهم و كتدوز للابيسين من اكواجيم و رقص و مسابقات تقافية و تكمل باللعب فكرة اليد .. تدوش و تطلع تبدل عليها غادية لليوغا كترخي اعصابها و تصفي دماغها ة ترجع تدوش مرة اخرى تشرب دواها و تنعس .. و فالعشية سوا سبا و مساج .. سوا كتمشي تدير ضورة بالباطوو تريح فهدوء .. و لا كتخرج تدير لامارش مع المجموعة .. و جربات حتى ل buggy وسط الرملة و الهضبات طالعة هابطة فيهم بسرعة كبيييرة عايشة اللحظة و ما فيها و صوت غواتها كيتسمع بالجهد و هي دايزة وسط الجمولة كيرعاو هما و المعاز و الخرفان .. قاطعة طريق طويلة و هي صايكة .. دار معاهم ساعتاين و كانت احسن ساعتاين دوزات و شبعات فيها رملة و مناظر كيخروضوو العقل و مع كل غوتة كتخرج ديكشي لي مخزون فصدرها خانقها ..!
أنت تقرأ
عرس الذيب 🐺مكتملة🐺
Roman d'amour💎مكتملة💎 هناك قلوب عاشت وماتت وهي تنتظر فقط لحظة عطف وإحتواء ! وهناك قلوب قد غدر بها رغم أنها لم تنبض يوما إلا بالوفاء ! و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء ! 🐺 عرس الذيب ...
