#عرس_الذيب
🖊 خولة الغريب 🖊
الفصل الثالث - ذنب لا يغتفر -💣 بارت 155 💣
و ما حدها مزال ما هضرات و قالتوو فين كانت داك الليلة و فين غبرات سيمانة كاملة .. ما حد الموضوع باقي ما تسد و غير متناسينوو و ما غيقدرش يسرطوو بسهولة ..! و باش ما يتفركعش عليها و هو مزال ما برد من لي وقع .. منخلها و كيتصرف بهداوة و هدوء .. داير حدود وهمية بيناتهم و تا هي حاسة بيهم .. و كيفما هي كتربيه على الضرب تا هو كيربيها على الخروج من الدار و الشوتينغ غير بسكاتوو لي كيمرضها تا هي ..!
بجوجهم ما مرتاحينش و بجوج كيقلبوو على حل جذري و طرق جديدة يتعاملوو بيها فاش يتعصبوو من بعضياتهم ..! شريفة عيات من المشاكيل و الصداعات و السفرة عاوناتها تفهم شحال من حاجة و من بيناتهم .. هذا ماشي الياس و يلا بقات فكل مرة كتتراد معاه و تتضارب آخرتوو غيدير فيها كارثة شي نهار .. راه غير كيميك عليها و يضرب و يزكل مخليها تدير يديها تا هي و تبرد على راسها ..! هي مراتوو .. ماشي صاحبوو لي غتخرج فيه عينيها و يبداو يتسابوو بجوج عطيني نعطيك ..!
هي ماشي شمك٠٠ارة . كتبقى أنثى و باش تا هو ما يمدش عليها يديه من لول ما تشعلش معاه على نص كلمة ..! واحد يطلع و الثاني يهبط و يبرد .. و هاكا تا هو غيصبر عليها فاش تكون معصبة منوو و ما غيستفزهاش ببرودو و يخليها باغى تنطح راسها مع الحيط ..!
قادرة تدافع على حقها بهداوة و بلسان حلوو و بالحييلة و تأدبوو و تبدل فيه شحال حاجة ما عاجباهاش غير من لتحت للتحت .. بلاصة ما تخرج عينيها و تا هو يشدها ضد معاها و يتعاند ..! تعلمات بسبابوو تتحكم فلسانها و دابا غتبدا تتحكم تا فأفعالها بالتدريج ..!
كيفما تا هو فكر فالتنخال و ما يهزها ما يحطها من بلاصتها .. فعوط الضرب ..! غيصعر غيصعر و يبعد يبرد راسوو بزز .. حلف ما يعاود يقيسها غير بينوو و بين راسوو .. الله يجعلوو يدخل فحيط غير باش يبرد و ما يبردش عصبيتوو و حرو فيها و فلحمها .. تدير لي دارت ما غيضربهاش و غيبدل معاملتوو و غيربيها بطرق اخرى و زادت هضرتها هي و حبيبة دخلو ليه مع العظام كينخرو .. واخا عاق بشريفة و قلعها طايرة من المرايا لي فوق راسها كتبينلوو وجهها و حركاتها المفروشين و لكن واخا هكاك هضرتها عندها فيها الصح .. كيفاش غيكبرو هاذ الولاد و هما كيشوفوو باهم كيع٠نف امهم ..؟؟
خلاتوو مع نور و دخلات هي للدوش واخدة راحتها كتطلق عظامها لي تدكدكوو عليها .. عيات بالجهد بالتخمال و التوجاد للعراضة .. كلشي زربات عليه و معلمة تلعب على الوقت .. و لكن تمارة قضات عليها .. تا ولات كتفكر تقولوو يجيبوو شي وحدة تعاونها فالدار .. واخا غير مرة فالسيمانة فاش ما يكونش هو ..! ضروري من العوين خصوصا فاش غتبدا الخدمة ديريكت ..!
مخشية فالبانيوو و الما سخون كيداعبها مع الزيوت و الاملاح المعدنية داخلين لها للجذر و الورد خفيف لاسق فلحمها مزوقة بيه ..! بقات كتماصي لحمها من وذنيها تال رجليها بالشوية عليها .. تا كملات و غطسات فخطرة مفزكة شعرها و كتحك وجهها بيديها ..!
أنت تقرأ
عرس الذيب 🐺مكتملة🐺
Romance💎مكتملة💎 هناك قلوب عاشت وماتت وهي تنتظر فقط لحظة عطف وإحتواء ! وهناك قلوب قد غدر بها رغم أنها لم تنبض يوما إلا بالوفاء ! و قلوب من الرحمة معدومة ، و بالغدر موصومة ، ملوثة بالكذب ، لاتعرف معنى للنقاء ! 🐺 عرس الذيب ...
