عِــشْــق بَــدَوِي لـنْ تَــفـهــمِــيـه! " بالدارجة المغربية "

💕 الفصل الأول 💕

عـــشــق بـدوي لــن تـفـهـمـيـه! 🌾

فكرة وإشراف: ندى علامي

بقلم: Sola Ait Reddad

#الـــفــصـــل_الأول:

أخـذلـيـه كـي لاينسـاكي.. وأوجـعيه كـي يحبـك أكـثر 📌

#الجزء_الأول:

الخمسة دصباح فاق على صوت آذان الفجر ...توضا وصلا صلاتو ..لبس جبادورو وسلهامو فوق كتافو لعراض وبنيتو الضخمة وطولتو ..جاو معاه..رجع شعرو اللور ورش عطرو الرجولي خرج من بيتو تمشا شحال تا وصل لاتيراس كطل على كاع الأراضي دلفيرما ديالو، كيشوف الخدامة والفلاحة داخلين يبداو خدمتهم طول الشوفة نظرات حادين ونايمين راضي على نفسو وعلى هدشي لي وصل ليه ورتو من جدودو وأبدا واش عمرو كره ولا تذمر من كونو تاهو فلاح وتربى فلاح وكبر على يد جدودو الفلاحة..راجل وسط الرجالة يهزو ليه ألف حساب كلمتو سماعة وماتجيش فوقها كلمة ثانية شديد وخصيم ..عزيز عليه المعقول ومن عمل عملا أتقنه صارم فتعاملو ولكن فوقت الشدة دراع

تنهد ورجع اللور نازل فالدروج كلهم زليج بلدي فاسي حر.. تا وصل للمراح ديال الدار فوسطو خصة ديال الما وجليسة تماك فالأرض بزربية مخدومة باليد وهيادر ملونين وخديات بريش النعام وطبيلة فالوسط فوقها كل ما لذ وطاب من فطور مغربي مية فلمية

مو جالسة تماك والخدامات واقفين على راسها يمدو ليها قرب باس يديها وجلس فبلاصتو المعتادة متكي على الخدية

للا يطو:كي صبح ولدي

سلمان:هو هداك الوليدة

مدات ليه كاس دأتاي برزتو :رد ليا المزاج

خداه منها وبدا يجغم من كاسو وفطر هو ومو بهدوء

للا يطو: ولدي داز شحال على طلاقك وانا رجل هنا ورجل فلاخرة وباغة نشوف حفادي

شاف فيها: ماشفت من مور الزواج غا صداع الراس ..

تنهدات: وصافي هاد المرة لي جبتيها انتفاهم معاها

حط الكاس: نتي صعيبة وكتبقاي الواليدة انجيب شي بنت الناس تاني ما اتفاهميش معاها انعاود نطلقها تاني

وناض جمع الوقفة: وقفي على العيالات يوجدو كسكسو قبل صلاة الجمعة يخرجوه للفلاحة

خرج وخلاها لقاهم سرجو ليه عودو طلع وركب فوقو ومشا كيتسارا وسط الأراضي والفلاحة كيلقيو ليه التحية وهو كيحرك غير راسو ..ماشي كيخافو منو بالعكس كيحتارموه ويهابوه ..عارفينو واخة قاصح وصارم معاهم ماكايدوزهمش لا هوما لا عائلتهم

دار راجع فحاله هبط من فوق عوده وزاد حتى كيوقفه صوت من موراه تلفت لعنده

سلمان : زيد اسي نور الدين