عِــشْــق بَــدَوِي لـنْ تَــفـهــمِــيـه! " بالدارجة المغربية "

💕 الفصل 22💕

عـــشــق بــدوي لــن تـفـهـمـيـه! 🌾

فكرة وإشراف: Nada Alami

بقلم: Sola Ait Reddad

كنت أطعمها قمح فؤادي براحتي.. عجبا كيف بات يرضيها فتات الطريق 🥀

#الجزء_80:

داز شحال ديال الوقت وهي باقا فبلاصتها كتبكي والبنات غادين جايين عليها منهم لي بقات فيها ومنهم لي عجبهم الحال وبغاوها فيها فحال الهاشمية لي مكرهتش تنتفها كل مرة تغوت وتخرج فيها عينيها الكبار لي مكحلين تا دخلت للايطو كتشوف فيها وتنگر

للايطو: امم جبتيها فراسك .. فورنا بكري وخشينا يدينا فكسكسو طايب بكري .. عيالات آخر الزمان ماعرفت اش عجبو فك .. كن ما مرضي وولد الدار الكبيرة نقول دار شي ذنب ولا دا شي سخط تا تعاقب بيك .. الله يخليك بالخلا

دازت عليها خلاتها كتبكي ماعندها جهد ليها قيد ليها يديها وخلاها غ كتشوف وساكتة

شيرت للايطو للهاشمية قبل ماتخرج: دوزي غسلي دوك الطناجر

نفضت الهاشمية يديها من الدقيق لي كانت كتغربلو فبانيو كبير وناضت كتمسح يديها فالتزارة غسلتهم وكرطت الما ورجعت للدقيق كملتو والغدا طاب وصابرين باقا مكمشة فبلاصتها حدا البلاكارات لي التحت راسها كيعطيها الصداع والحرقة مبغاتش تبرد عليها تا بداو يحطو فالغدا عاد ناضت قلبها سخف بالجوع وتمارة لي ماموالفاهاش بقات لها غ يد وحدة ومع ذلك ماقالوهاش

مدت لها وحدة من البنات الطاجين: هاكي هادا خرجيه الخداما

قبل متعتارض صابرين ناضت الهاشمية طايرا شدتو ومدتو لوحدة اخرى

الهاشمية: لا گالك سي سلمان متخرجش عند الخداما حدها الدار

عطاتها الشبكة ديال الخبز : دي هادي حطيها فوق الطبلة ورجعي للبلاطو ديال شلادا

شدتها من عندها بيد وحدة داتها حطتها حدا الطاجين لي جالسة حداه للايطو كتسنا سلمان ورجعت للبلاطو جابتو وجلست حداهم عينيها مكيشوفوش بالجوع

هزت طرف د الخبز من الشبكة قطعت منو بليسرا ومدت يدها للطاجين تاكل معاهم قبل متوصلو جاتها دقة لظهر يدها تاحمارت شافت فيه ماعارفاش مالو تاني

سلمان: تهزي فحالك

ماستوعبتش كلامو جاها غ كيضحك معاها رجعت مدت يدها تاني وجرها لها بزعف ودوا بحدة

سلمان: وا تهزي الكوزينة مع الخدم لاباغا تاكلي متجلسيش معايا انا فالطبلة

حطت الدغمة كتشوف فيه مصدومة يدها ولا كيترعدو وهدرتو كتعاود فراسها جمعت الوقفة وناضت الكوزينة لقات البنات ساطو فالغدا وكيفرقو فاللحم شافوها وخشاوه كلو ففمهم وناضو كيمضغو مشاو يغسلو