عِــشْــق بَــدَوِي لـنْ تَــفـهــمِــيـه! " بالدارجة المغربية "

💕 الفصل 55 💕

عشق بدوي لن تفهميه! 🌾

#الجزء177:

خرجت من عندها الطبيبة فالصباح من بعد مادارت لها كونترول تلاقات سلمان لي حتى هو كان عاد داخل من عند الطبيب على حسب رجلو طمناتو بلي كلشي مزيان مكاين حتى شي اعتداء وبلي طبيعي متعقلش بحكم المخدر لي كانو كيعطوها

دخل عندها عطاها تفطر وبقا جالس حداها كيشوف فيها بهيام

صابرين: مالك

سلمان: قرب عندها كيشوف فعينيها) كن وقعت لك شي حاجة يخرج ليا العقل ماعمرك تبعدي عليا ماعمر شي حاجة غ تفارقني عليك ديريها فبالك ..

ابتسمت ليه كتشوف فعينيه والحالة لي كان فيها البارح مافارقهاش الليل كلو فينما تحرك ينوض عندها يسول ويطمن ماخلاهاش تنعس

سلمان: ملي قالو ليا كلشي ميـ ت تلفت وليت كنقول غ شنو غ ندير دابا بلا بيها وا..

صابرين: قاطعاتو) كيفاش كلشي مـ ات؟

سلمان: هز اها راسو بااه) كانو باغين يدخلوك لداك الكهف باش يجبدو شي كنز ولا ماعرفت ساعا طاح عليهم دك الكهف ونتي حفظك الله لقاوك برا .. كيفاش تامدخلوكش؟

صابرين : ماعرفتش ماعاقلة على والو

سلمان: باقي واحد فيهم حي .. غي يفيق وديك ساع يودي ويقول كلشي .. يلا الا كملتي فطورك نوضي نلبسك باش نشدو الطريق

وقفها بدل لها حوايجها وخرجو عندهم طوموبيل من بعد ماهدر مع الجوندارم على بوشعيب وقالو لهم غي يفيق ويلحقوه عليهم يحققو معاه

شدو طريق العودة وهاد المرة غير .. غادين بشوي كيشوفو فجمال المناطق الجبلية خالقين جو زوين لصابرين باش ينسوها شوي من بعد ماشافوها غ كتدور فعينيها ومصدومة ملي شافت الدنيا كيف مقلوبة بالمخزن .. وقفو تغداو ودارو شوي حدا الويدان عاد رجعو كملو طريقهم مادخلو الدوار تال العشا لقاو الفيرما غ طرطق كلشي تماك كيتسناو غ شافوها وطارو عليها كيسلمو ويحمدو لها الله على سلامتها وشي كيسول كيف وقع وشنو دارو وكيفاش رجعت وهما عيانين ماعندهم جهد للمعاودة طلعت رباب مع صابرين لبيتها دوشت ليها كتسولها شنو طرا ولاخرا غ كتشوف ماعاقلة على والو

رباب: عنداك يكونو دارو لك شي حاجة ونتي مغيبة .. ماقربوش لك؟

صابرين: كدور راسها بلا خايفة) لا لا مكاين واالو شافتني الطبيبة وقالتلي مكاين والو .. صافي وااااش نتي باغا تحمقيني يكونو دارو ليا شي حاجة نحماااااق

شدتها ليها بالغوات وسط الدوش ولات رباب غي كتساوي ندمت علاش سولاتها لوات عليها البنوار وخرجت لبست حوايجها وبدلت ودخلت لفراشها تنعس وخلات ليهم بنادم التحت مضاربين معاه يدخل فوج يخرج فوج تال نص ليل عاد خوات الدنيا وطلع عندها سلمان لقاها نعست تكا حداها كيشوف فيها ويلعب بيدها ويدوز صبعو على الخط طويل لي فيها وفبالو الحلمة لي شاف اول ليلة ليها معاه .. تنهد بعياء من هاد الكابوس لي مخربق ليهم حياتهم ولا خايف عليها كتر من لول مابقا مأمن على حتى شي واحد .. قرب منها خشا راسو وسط صدرها كيلعب خصرها تا داه النعاس فحضنها وارتاح من بعد سيمانة ديال السهير