دخلت رقية تا ظلام الحال زربت عليهم بالعشا وكل واحد مشا لبيتو .. هز البيسي ديالو كيشوف فيه تادخلت عليه مدرمة
رقية : يلا اخويا طلقني قول اش عندك
غانم: حط البيسي فوق الطبلة حداه وتقاد فجلستو فوق السرير ) وخا باغا غ تعرفي شنو كاين .. جلسي .. مكتهلاش فراسها نهار كلو موحلة راسها فشغل فينما كان تقلب عليه ظل غابرة وسط الكوزينة تال نص الليل وتجي بديك البيجاما لي كلها مرقة تنعس بيها حداك بلا غسيل بلا والو الزيف فوق راسها ليل ونهار والبيجامات طوال .. هدرت معاها مامرة ماجوج وهي كدير غ لي قالها راسها .. نهار لول شفتها مزوقة ومقادا لي شافها يقول هنا نبات فلخر قاتلك دكشي غ باش تزوج ملي تزوجت رجعت عايشة قنديشة ناعسة حدايا! صافي ماتفاهمناش الله يسهل لكل واحد ماحد باقي يلاه بادين مكاين لا ولاد لا والو لي تخمم ليهم
رقية: وهي ماخممتيش ليها ماعارفش زعما دارهم كي دايرين باها غ سمع الطلاق ولا باغي يسلخها قدامنا بزز باش فرقناه عليها ملي غ تسيفطها لدارهم مغتكونش تعديتي عليها ديك ساع
غانم: الوالدة فهميني الله يرحم لك الوالدين واش انا جريت عليها؟ واش كانت جالسة تاجيت قلت ليها خرجي لداركم بلا سبب!
