عِــشْــق بَــدَوِي لـنْ تَــفـهــمِــيـه! " بالدارجة المغربية "

💕 الفصل الرابع💕

عـــشــق بــدوي لــن تـفـهـمـيـه! 🌾

فكرة وإشراف: ندى علامي

بقلم: Sola Ait Reddad

أخذليه كي لاينساكي وأوجعيه كي يحبك أكثر 📌

#الجزء_10:

تحط العشا فالصالون البلدي فوق الطبلة ديال العرعار تجمعو كلهم كيتسناوه يهبط ملي ماجاش سيفطت له وحدة من الخدامات

الخدامة: للا يطو قالكم غ تعشاو ماقادش

للا يطو: كيفاش غ تعشاو من امتا كناكلو بلا بيه

دفعت الطبلة ووقفت كتمشا بزز وتمايل بركابيها طلعت فدروج كتعكز على الحيط حتى وصلت عنده كتنهج دقت ووقفت كتساراح

كان جالس فالبالكون كيف عادته مقابل مع الأراضي حتى كيسمع دقان تنهد ماحاملش هاد تبرزيط ديال الخدامات عارف مو لي مسيفطاهم حل الباب بجهد يله غ يهدر ورجع سكت

سلمان: الوالدة اش طلعك تال هنا

للا يطو موكية على الحيط: جايا نطيح ونوض باش نشوف مالك ملي رجعنا من عندهم وانت حالك ماهواش

سلمان شار لها تجلس فوق الفوطوي لداخل: ارتاحي ليك.. مكاين والو غ راسي مخربق وصافي

للايطو: كن غ ساعفتيني ماعندك مادير بيهم

سلمان: الوالدة راه هدرنا هاديك هي لي غ ندي.. ياك قلت لك ماباغيش نتزوج حيت مغتفاهميش معاها قلتي ليا لا لي جبتيها مغنقولش عليها شي حاجة واختارها انت اش تبدل دابا

للايطو: وانا قلت زعما تجيبها بنت دوار منا وفينا ماعارفة ماسامعة لي قلنا ليها تقول اه، انت مشيتي جبتي هاديك لي غايبة ست سنين ولا اكتر على دوار ماعرفناها اش كانت دير تم

هز فيها عينيه مخرجهم: الوالدة هبطي تنعسي غ تكوني عيتي اليوم

للايطو: اييه عيت هانا غادا

هبطت تاني كتميل فمشيتها وهو مقابلها فدروج تاهبطت عاد سد الباب ورجع لبلاصتو كيفكر فيها بطيرانها مامحتاجاش المدينة من صغرها كدير العجب وعلماتو لبنات الدوار.. كانو ديما والديهم كيتشكاو منها لنور الدين على الفعايل لي كتعلمهم؛ تفكر نهار خرجت ماكياج رباب ودارت على بنات الدوار زوقتهم خلاتهم كيدورو كيف شيخات تجمعو باواتهم وجاو لنور الدين للبلاد يتبراو منه كلامهم دخل من ودن وخرج من لاخرة مكيهدرش مع صابرين وخا يشوفها دارتها كحلة قدامو

ابتسم بخفة من فعايلها ورجع عقدهم: حبل الشيطان، ولكن انا ماشي نور الدين باش نخليك مطلوقة على ربعة انا لي غ نجمعهم ليك الا كنتي باقا زايدة فيه

.............

نهار جديد..

فاقت معطلة كيف عادتها دخلت دوشت ووقفت قدام الماريو كتشوف جبدت منه سروال دجين أزرق وتيشورت سمطة فالأحمر لبستهم على طايتها المنحوتة وزادت فوقهم تريكو د الخيط قصير عندو عقيدات من جهة صدر سرحت شعرها وكتأفف على الخصلات الموف لي بدات كتمشي لها صباغتهم