عِــشْــق بَــدَوِي لـنْ تَــفـهــمِــيـه! " بالدارجة المغربية "

💕 الفصل الخامس💕

حطت لها عمتو صنيديقة صغيرة ديال العرعار مزوقة بالورد حمر فيها صداقها طاويين الورقات وموقفينهم وفوقهم قطع د شوكولا

عمة سلمان بابتسامة حنينة: مبروك عليكم ابنتي الله يحفظكم

ابتسمت لها وهبطت راسها كتشوف قدامها حتى تحط الغدا

بقات حداه مالقاتش كيف دير تنوض عاد ماماها كل مرة تخرج فيها عينيها تبت وتحشم

حطو لهم الغدا بداو بالبسطيلة مدو يدهم كياكلو وهي بقات كتشوف حتى جابت لها رباب فورشيط وموس قطعت طرف صغير حطاتو فطبسيل عاد بدات كتقطع وتاكل بشوي وللا يطو حبست مقابلاها كتشوف فيها كيف كتاكل والظفار حمرين طوال نغزت سلمان حداها زعما شوف.. هاد الاخير مادار حتى رد فعل كمل ماكلته عادي حتى سالاو غينوضو فحالهم..

عـــشــق بــدوي لــن تـفـهـمـيـه! 🌾

فكرة وإشراف: ندى علامي

بقلم: Sola Ait Reddad

أخذليه كي لاينساكي.. وأوجعيه كي يحبك أكثر 📌

#الجزء_13:

جات رباب نوضاتها لبيتها لقاتها جامعة لها حوايجها فالفاليز والكادوات لي جابو لها العائلة

جرت صابرين فاليزتها قائلة:

هانا غ نخوي عليكم الدار زغرتي فاش نمشي

جرتها رباب معنقاها كتبكي

رباب:اش هاد الهدرة واش انا غ نسخا بيك

صابرين حالا عينيها لي عامرين دموع مانعاهم يهبطو: سخيتي بيا ملي عطيتيني لهم وانا ماحاملاهمش

جرت الفاليزا وخرجت لقات باها جاي طالع

نور الدين: دغيا الناس كيتسناو

طولت فيه شوفة كتهز راسها بشوي: وخا ابابا هانا غادا عند الناس سمح ليا الا تقلت عليك

زادت غ تهبط فالدروج حتى جرها معنقها كيبكي نزلو دموعها بلا هواها زيرات عليه كتبكي وتشهق: بعتيني ابابا ياك

نور الدين : متقوليش هاد الهدرة ابنيتي ربي لي عالم ببلاصتك وسي سلمان راه راجل ونص عطيتك ليه حيت عارف منلقاش ماحسن منه

بعدت منه كتمسح دموعها وهبطت بلا حتى كلمة

جا عندو سلمان لي كان باقي واقف كيهدر مع شي رجال طلع الفاليزا لكوفر وحل لها الباب حداه طلعت وزاد وللا يطو وراها باغا طرطق حيت قالولها العيالات رجعي خليها تركب حداه مبغاتش لهم وحلفت لا هبطت عياو يطلبوها عاد رجعت لهم اللور وحالفاها فصابرين

فطريق العودة تفارقو اللي بعيد مشا ولي من دوار دخل لداره بقاو غ هما بيناتهم

دخل للفيرما من بابها الكبير وهي حداه كتدور فراسها كتشوف الأجواء التيساع والخضورا عجبتها..