عِــشْــق بَــدَوِي لـنْ تَــفـهــمِــيـه! " بالدارجة المغربية "

💕 الفصل الثالث💕

عـــشــق بــدوي لــن تـفـهـمـيـه! 🌾

فكرة وإشراف: ندى علامي

بقلم: Sola Ait Reddad

أخذليه كي لاينساكي.. وأوجعيه كي يحبك أكثر 📌

#الجزء_السابع:

نهار لآخر..

داز كله تجهيزات للخطبة لي قررو لها من بعد 4 أيام .. نور الدين والخداما كيتسخرو ويجيبو شنو خاص وعيالات الخدامة معاونين رباب فالكوزينة على الحلوة ويقادو العراضة هادي عادة فدوارهم فين ما كتكون شي لامة كيتجعمو ويتعاونو محافظين على هاد التقاليد د زمان.. وصابرين غ كتشوف ومخنزرة ولي باركت لها كتدور فيها حتى مبقاوش طافو بساحتها

هبطت فلعشية تاكل هاد المدة كاملة وهي سادة عليها

لقات كاسكروط فوق طبلة وجلست حتى دخل عليها باها هز كاس د الما يشرب شاف فيديها وقال بلطف قبل مايخرج

نور الدين: حيدي ابنيتي هادوك ظفار غ يشوفوهم دار راجلك ميعجبهمش الحال

حطت دكشي لي فيدها ورجعت لور تسدت لها الشهية من كلمة راجلك

جات عندها رباب هازة ليها قفطان د جوهرة:

هاكي قيسي هادا راه يله جبتو من عند الخياطة

خداتو منها بنترة ولاحتو

صابرين: انا بغيت كفن نخيطه اما القفطان لبسيه نتي لي فرحانة لجنازتي

طلعت وخلاتها كتشوف وكتدعي لسلمان بالصبر عارفة بنتها معكسة الا شدت الضد مكتهدش

. نفس شي فالفيرما وصات للا يطو على حوايج واجدين وتعمدت تجيبهم سواقيين جلابة طالعة وتكشيطة بالعقاد بالإضافة للبيجامات طوال وزيف

لوست للا يطو: هي غ تلبس لك هاد الحوايج وهي بنت المدينة

طلعت فيها للا يطو حواجبها الرقاق: علاش شنو بغات تلبس الفيرما عامرة رجال وزيدون هاد شي شافو سلمان وعجبو لا كانت مرا تقوليه لا

عيطت للخدمات قادو دك شي فصواني كبار د الفضة مع الفاكية والحنة ودكشي لي كيديو فعادتهم وسلمان غ كيشوف مكيفهمش فهاد شي اعتمد على مو ويدور ويوصي واش خاص شي حاجة

سلمان: الوالدة ها غانم طالع للفيلاج الا كان باقي شي حاجة غ تخص يجيبها

للا يطو: الخير هو هذا اش بقا مازال غ نديو

حطت دكشي من يدها وناضت: انا داخلة نعس ضرني راسي بطلوع والهبوط

خلات الحوايج فوق الطبلة جمعتهم لوستها ودخلت لبيتها تنعس

..................

يوم الخطبة..

لابسين حوايجهم وواقفين عند الباب مقابلين الصواني كيدخلوهم لرونج كحلة ديال سلمان مع 2 كراطن ديال السكر وخرجو غادين هما وغانم وشي وحدين من العائلة قراب