جادلٍ كل الدروب المعشبه تنبت باثرها

1

-
عايله ابو نجد
-
كانو ماسكين الطريق وهم راجعين من مكه .
نجد دخلت راسها بالوسط ولفت ل جهه ابوها:بابا وقف عند بقاله تكفى
ذيب مسك شعرها:يحبك ل البقالات بس
نجد بوجع مسكت شعر ذيب اللي م كان كثير وشدته بقوه
سلطان ابو نجد ضحكت: ذيب فكها وانا ابوك قطعت شعر اختك بعدين ينجد تونا كنا عند البقاله ورا م قضيتي منها
نجد فكت شعر ذيب ومسكت لحيه ابوها اللي كانت شوي طويله وكاسيها الشيب:طلبتك يبابا فيه بطاطس اشتهيته تكفى
سلطان استلطف حركه نجد ودق خشمها بصبعه:على خشمي
ابتسمت نجد وهي ترفع حواجبها ل ذيب وتقهره وترجع لمكانه وتحط السماعه باذونها
وكان ميول نجد ل الشعر والشعار فتحت دفترها وقعدت تكمل البيت اللي وقفت عنده وتدور قافيه تمشي معه .
-بعد وقت قصير جداً-
وقف عند محطه ولف سلطان ابو نجد عليها:يلاه نجد وانا ابوك انزلي واخذي اللي تبينه واخذي اخوانك معك
نجد:ماراح تزل معي ؟
سلطان وهو يعطيها فلوس:لا بريح على م تخلصون
اخذت نجد الفلوس: تبي شي ذيوبي ؟
ذيب كشر:ياشينها منك ، جيبي اللي تجيبينه
ضحكت واخذت اخوانها اللي اصغر منها معها ونزلت
نجد :يلاه اخذو اللي تبون 
راحو يتراكضون وياخذون اللي ودهم فيه ونجد اخذت اللي تبي وقعدت تنتظرهم
بعد م حاسبت عطت اخوانها الاكياس
نجد روحو اركبو السياره انا شوي وجايه راحو اخوانها وهي راحت ل دوره المياه والمسجد اللي كان موجود على الطرف
بعد م خلصت وصلت الوتر على السريع طلعت وهي م تشوف سيارتهم ! دورت وتنادي ولا فيه احد يرد الصوت عليها ارتعبت ولا تدري وش تسوي لفت من جهه البقاله وشافت مجموعه عمال وخافت ودخلت في المسجد وهي تصييح وخايفه يجونها العمال فتحت شنطتها تدور جوالها والمصيبه انها م لقته !!
-
-في مكان ثاني -
اللي كانو راجعين من ديره خوالهم ل ديرتهم .
مشعل لف على الجازي:الحين وراء م رحتي مع ابوي وامي ؟
الجازي تربعت على المرتبه ولفت جهته:والله وانا اختك جو ابوك ماش لا يشغل شيلات ولا اغاني ولا يطربني قلت مالي الا اسري مع اخوي هاليله وطربني
مشعل مسك راسه:يكثر هرجس وش تبيني احط يا ام طرب
الجازي ضحكت:مدري حط على جوك احب جوك انا يالحبيب
مشعل ضحكت:وشهو حبيبة انتي بعد اسكتي بس
قطع كلامها وهو يرفع الصوت على الشيله وقعدت الجازي ترقص بستهبال وهي جالسه
بعد وقت قصرت على الصوت الجازي ولفت على مشعل:مشعل شراييييك توقف عند اي بقاله ؟ لاني بموت من الجوع والطريق طويل
مشعل لف على محطه شبه هاديه ولا فيها احد الا عمال وشافهم كلهم عيونهم متوجهه على المسجد استغرب وضرب بوري وكلهم لفو عليه
مشعل نزل الدريشه:تعال عب بانزيم
الجازي:مشعل بنزل ل دوره المياه وبجي وانت قش لنا اشياء زينه فكني من اللي م تتاكل
مشعل:يلاه انزلي قدامي
وصلها ل المسجد وراح ل البقاله .
-
الجازي دخلت دوره المياه وهي تسمع صوت بكي مكتوم استغربت وقالت يمكن انها تتوهم الا الصوت يزيد خلصت وطلعت علطول ل مشعل اللي كان ينتظرها بالسياره برا ركبت وهي خايفه
مشعل عقد حواجبه:علامس ؟
الجازي برعب:فيه صوت احد يبكي داخل بس مدري من خفت وطلعت
مشعل ناظر العمال اللي رجعو تجمعو ويناظرون المسجد:والله اني داري تجمعهم مب على سنع ادخلي داخل المسجد شوفي وش فيه
الجازي وهي خايفه:مشعل صاحي ؟ والله مدخل خايفه
مشعل فتح باب السياره:انزلي انزلي بدخل معس يلاه
الجازي فتحت الباب وهي ترجف ودخلو داخل
مشعل عوره قلبه من صوت البكاء المكتوم الجازي تقدمت ودخلت نص راسها للمسجد ناظرت الا وحده متكوره على نفسها وتبكي ، لفت على مشعل وهي تهمس:فيه وحده تبكي داخل شسوي ؟
مشعل بنفس الهمس:ادخلي شوفيه وش فيها يلاه يلاه انا هنا بسمع
تنحنحت الجازي ودخلت نجد علطول فزت برعب لملمت يدها ل صدره وهي يرتفع وينزل
الجازي قربت:بسم الله عليك شفيك هنا لحالك ؟
نجد ودموع م وقفت تكلمت بهمس:اهلي نسوني
الجازي وهي تمسكها وتجلسها:هدي انتي وعلميني شسالفه كيف نسوك وان شاءالله بيرجعون ولا بنرجعك لهم
نجد مسكت وجهها وهي ارتاحت شوي ل الجازي بعد كلامها وعلمتها السالفه .
ومشعل برا يسمع السالفه كلها بعد م خلصت نجد كلامها:
الجازي تعالي
نجد فزت برعب وهي ترجف ورجعت دموعها تنزل:منذذذا
الجازي مسكتها:لا ترتاعين ذا اخوي اكيد شافني تاخرت وجاء
نجد مسكت يدها وناظرت عيونها ودموعها تنزل:تكفين لا تروحين لين يجون اهلي اخاف يدخل احد من العمال اللي براء علي
الجازي ضمتها تهديها:ابشري ابشري ماراح اروح الا وانتي بين اهلك بروح ل اخوي اجيس لا تخافين
-