طلعت مسرعه لـ غرفتها نطلع جوالها الي كان يشحن ، أخذته و دقت عليه اخذت دقايق و رد عليها يرحب بـشوق و حُب : أرحبي ي دهر قلبي و رجعانه أرحبي ثم أرحبي ، ابتسمت وقالت : يحبيبي انت البقى ، شخبارك
وينك مختفي لا تدق ولا تسأل عن شي
تنهد وقال : نحمد الله انتي شخبارس و شخبار سيوف ، والله ينظر عيني ضغط الشركه قسم بالله قاعد احاول أفضى عشان ادق عليتس بس شنسوي
زفرت وقالت : يالله م عليه الله يقويك ، منتم جايين ؟
حك شعره وقال : والله للحين مدري غيث الي بيحدد متى يبي عاد انا قلت له و نشوف بعلمكم قبلها ب كم يوم ، بيان : خلف !! كيف م حدد للحين بتطول يعني م راح تجي الخميس و الجمعه ! تبيني اصبر ل خويك يختار متى يبي شدخلك فيه انت تعال
خلف : بجي ان شاء الله بجي اصبري ، منتظرين فهد بعد شغله كثيف مره هالاسبوع ان شاء الله نخلص جايين
بيان : اف طيب
ضحك وقال : شفيتس تأفأفين
بيان : انا قلت لك قبل لا تروح بتخليني انتظر شهر شكلك صح !!
خلف : الحين انا قلت كذا ؟ اصبري انتي م فيتس صبر
بيان : طيب طيب يصير خير
-
بعد مرور يومين ، رجعوا الديره لـ بيتهم و مسكنهم
فبيت ابو سلطان تحديداََ ف المجلس عند العيال
متجمعين ب الحوش يسولفون
صقر : الحمد لله ع سلامتكم
خلف : الله يسلمك يخوك
يزيد ضحك وقال : هاه اشتقتوا ولا
فهد : عساس م قاعدين مع بعض يعني
يزيد : انت اخر واحد تسولف عساس قاعد معنا يعني
ضحك صقر وهو يقوم : شويات بروح و بجي
-
ابو فهد : سُميوه تعالي هنياا
سُميه : وش يبه أمرني
ابو فهد : اسمعي الحين ، فيصل اخو صديقتس ديم يبي يتقدم لتس ع سنة الله ورسوله
قاطعته سُميه بصدمه : يبه !!!! م ابيه
قطب مشاري حاجبه : وشوله م تبينه !!
سُميه : مابي مابي
مشاري ب عصبيه : وليه ان شاء الله من تبين !!!
سُميه وهي كاتمه الغصه بداخلها : يبه مو غصب قلت لك م ابيه ، نسيت وش سوا ب بيان و خلف و اميره !
مستحيل أخذه لو الدنيا كلها تنقلب علي !! م ابيه
مشاري : الا تبيه ، ذا ماضي و الرجال عاقل م عليتس شي ان شاء الله
نزلت دموع سُميه بقهر : يبه م ابيييه
ام فهد : مشاري الله يهداك قالت م تبيه
سُميه بصوت متذبذب : لو بتغصبني عليه ليه جاي تعلمني بعد ! انا الي بتزوج ولا انتم قلت م ابيه !!
ابو فهد : اذلفي اذلفي بس يصير خير
طلعت سُميه وهي مو حاسه بنفسها من الصياح و الشهقات الي م قدرت تكتمها طلعت للـحوش وهي تحس بـ الدنيا تدور عليها صادفت الصقر و م حست بنفسها الا وهي بـ حضنه ، انصدم صقر من حس بدموعها على ثوبه وقال : سُميه ؟؟ وش بلاتس تصيحين !! ، م قدرت تكتم شهقاتها و صياحها ، دقايق و بطلت عيونها بصدمه وخرت من صقر وقالت بصوت متذبذب : معليش اسفه والله
اتجهت بتروح سحبها صقر من يدها وقال : وش فيتس طيب ؟ ليه تصيحين ليه ذا كله عسى م شر ؟؟
انصدم يشوف دموعها تنزل ورا بعض وقالت سُميه : لو اقولك وش بستفيد انا ؟
صقر : انتي قولي شفيتس !
سُميه : ابوي يبي يخطبن..ي
قاطعها وفتح عيونه بصدمه : ووشوو يخطبس !! حق مننهوو
سُميه : فيصل
صقر زفر م يبي يوضح شي : و اذا فيصل طيب شفيه ؟
سُميه : صقر !! م ابيه م ابيه
ابتسم وقال : واذا انا ؟
سُميه نزلت دموعها وقالت : صقر م امزح ترا
صقر : ولا انا اتكلم جد
م حسوا الا بخروج ابو فهد ، انخرشت سُميه و سحبها صقر خلف الجدار م حست سُميه الا وهي مكتومه بـحضنه ، تحس بـ انفاسه القريبه ، تستنشق ريحة عطره الي عجزت تنساها ، وخرت منه وقالت : ابعدد وجع تخيل لو شافونا .!!
ضحك وقال : محدن بيشوفنا ، تبيني اخلصتس من فيصل انا بنفسي بجي اخطبتس وانا من البدايه ناوي اخطبتس و انصدمت يوم علمتيني ان فيصل يبيتس !
سُميه : وانت م تذكرت الا الحين !! كم صار لك تقول لـ نيلان انك تبي تخطبني وهي تعلمني وانت مدري وش تنتظر بضبط ، وظيفة و عندك بيت و عندك وش بعد
طاح يضحك من عصبيتها : زين زين استهدي بالله
انا بكلم عمي ولا يهمتس ريحي بالتس ولا تنزل دموعس انتي تدرين ان فيصل يخرب دايم زي م سوا ب بيان و خلف يبي يسوي فينا تسذا لانه خابر اني ابيتس
سُميه : يمال العافيه وانت ليه تعلمه.؟
صقر : م علينا ، عطيني يومين ب الكثير و بكلمه ان شاء الله زين ؟
ابتسمت تمسح على وجهها وقالت : طيب ، والي صار هالحين م يطلع ! ادري انك م تقدر تسكت
ضحك و راح من عندها و انسحبت هي بهدوء تدخل للصاله ، دخلت عند البنات و وجهها احمر من قوة الصياح فزت ريهام وقالت : سمسوم !!! شفيتس
سُميه : ابد م فيني شي
نيلان : تسذوبه ، شفيتس !
سُميه : ابوي ، يبي يخطبني ل فيصل اخو ديم غصب
شهقت ود وقالت : يويلي وصقر .!
سُميه : مدري مدري خلاص اسكتوا كفايه الي فيني
ريهام : يحياتي انتي ، م عليه ان شاء الله عمي بيهدا و قولي له بهدوء و بدون صياح انتس م تبينه
سُميه : و اذا رفض وش اسوي اتزوج واحد م ابيه.!
نيلان : سُميه كلنا ندري انتس انتي و صقير تحبون بعض الا انتم ، ان شاء الله منتي الا له و خليتس من الصياح م راح ينفتس كلمي خوانتس يقعنوه
سُميه : ان شاء الله
طلعت من الصاله وهي خانقتها العبره تنزل دموعها بهدوء ، محد حاس فيها م تدري وش تسوي الحين مو متخيله انها مع فيصل وهي ولا عمرها فكرت انها تكون له ، خايفه من ابوها ومن كلشي حولها ، تكت على جدار المطبخ تكتم صياحها و حرقان قلبها ، جاء سعود ياخذ له مويه و تجمد من شاف وجهها الاحمر : سُميه ؟
فزت وقالت : لبيه
سعود : وش فيتس هنا وش تسوين
سُميه : هاه ولاشي كمل طريقك
سعود : اكيد ؟! الواضح انه في شي علميني وانا اخوتس شفيتس وش مضايقتس ؟
سُميه : ابوي
فتح عيونه وقال : افا ابوي مره وحده ؟. ليه شفيه
سُميه : يبي يغصبني اتزوج فيصل وانا م ابيه
سعود : ذا بس ؟ ابشري انا اكلم ابوي و اقوله ولا يهمتس
ابتسمت وقالت : يحبيبي والله ، اصبر لا تكلمه الحين خله بكره كلمه الحين بيفصل عليي و عليك
ضحك وقال : يصير خير
اتجهت سُميه للصاله الخارجيه تبي تقعد لحالها
-
بـ المجلس عند العيال
دخل عليهم سعود نكد مزاجه على صياح اخته
جلس وقال خلف : سعيدان شصار
سعود : وش ، م صار شي ابد
سحبه صقر وقال : علمني شصار ؟ مودك انقلب ليه
سعود : يارجال م صار شي
صقر : سعووود !
سعود : يليل ، خلاص يبوي بيني وبين اختي انت شتبي
فز وقال : سُميه !! شفيها
سعود ضحك وقال : انت شبلاك لازم تدري ؟
قرب صقر و سحب سعود معاه ل برا : سعيدان علمني شفيها ؟ شبلاك لا تسو نفسك م تدري اني ابيها لي !
سعود بحده : تبيها لك الباب مفتوح تعال اخطبها لا تقعد تتفلسف على راسنا ابيها و ابيها و الرياجيل جايين يبون يخطبونها و ابوي بيغصبها على واحدن منهم و البنت م وقفت صياح على نفسها ؟؟؟
صقر : ابشر والله اني قد كلامي و جاي اخطبها ، و اذا على فيصل م عليك خله علي ذا م يعيش بدون م يخرب
سعود : زين يصير خير قفل على السالفه
-
دخل خلف مستعجل للصاله و قال : اميره بسرعه اميره وينها .!!! ، فزت ام فهد وقالت :وشبلاك ؟
خلف : اجهزواا الغيث جاي بيخطب امميرره
شهقت ام سلطان وقالت : هالحين !!
ضحك وقال : ايه ايه فيه وقت باقي اخلصوا انتم
ام سلطان : زين زين
*
بعد أذان المغرب تحديداََ
عند اميره بـ غرفتها ، متوتره خايفه م توقعت بيوم ينكتب النصيب والقدر و تصير لـ غيث م توقعت انها بتحبه بيوم من الايام و بيحبها ، قربت تاخذ فستانها الخفيف لونه سُكري يبرز تفاصيل جسمها عليه نفشه خفيفه من على اليد ، سوت بشعرها ويفي خفيف و لبست اكسسواراتها الفضيه و كعب فضي حطت مكياج هادي و ناعم ، دقايق و دخلت عليها بيان وقالت : اميره انزلي يلا الناس جوو
فزت بخوف وقالت : يلا جايه
-
بـ المجلس متجمعين دخل غيث بهيبته و رزانته دخل و سلم عليهم وقعد جمب الشيخ و معاه نادر و مُلهم
ابتسم الشيخ و استفتح بدايه العقد على ذكر الله و رسوله و الدعاء بـ الخير ناظر الشيخ لـ ابو سلطان وقال : قُل زوجتُكَ ابنتي اميره على كتاب الله و سنة الله ورسوله صلى الله عليه وسلم .
ابتسم ابو سلطان وقال وهو حاط كل ثقته فـ غيث : زوجتك ابنتي اميره على كتاب الله و سنة رسوله صلى الله عليه وسلم .
ابتسم الشيخ و قال بهدوء وهو يناظر غيث : قُل قبلت
بهذا الزواج و رضيت به
اخذ غيث نفس بهدوء و ابتسم يقول : قبلت بهذا الزواج و رضيت به
ابتسم الشيخ و مد يده يسلم عليهم وقال : اللهم بارك لهما وبارك عليهما وجمع بينهما في خير وعافية وستر
ردوا بصوت موحد : اللهم امين
مد الشيخ الكتاب لـ غيث يوقع و بعدها لـ ابو سلطان ، الشيخ : عطوها الكتاب توقع هنا
خلف : ابشر
ركض خلف لـ برا فـ الصاله و معاه الكتاب فـ يده ابتسم دخل يكلم اميره الي باين عليها التوتر و الخوف ابتسم وقال : اميرتي تعالي وقعي ههنا
قربت اميره اخذت الكتاب وهي مو قادره تسيطر على رجفة يدها وقعت و مدت الكتاب لـ الخلف ، قرب ضمها بحنان وقال : الله يوفقس يابعد هالدنيا و الله يكتب لس الخير والسعادة
ابتسمت تمسح دموعها وقالت : يحبيبي ي خليف امين يارب
ابتسم يرجع لعندهم و مد الكتاب للـ شيخ
دقايق و طلعوا العيال و بقى غيث و خلف و ابو سلطان و ابو فهد ، قرب ابو فهد من غيث وقال : اسمع ي غيث انت رجالاََ كفو ونعم التربيه حط اختي بـ عينك زي م حنا نحطها بعيوننا و انا و ابوي واثقين فيك و ان شاء الله بنحدد الملكه بعدين
ابتسم غيث وقال : ابشر بنتكم احطها فـ عيوني لا تخافون ، و ان شاء الله م بقصر معها
ابو سلطان : ان شاء الله
طلع غيث و صادف اميره الي كانت بكامل كشختها الي طيرت عقله تجمد فـ مكانه ، لفت و انصدمت من شافته ، ابتسمت بهدوء و قربت تبي تطلع مسكها من يدها وقال بصوت خفيف : وش ذا ي اميره !!
انخرشت اميره وقالت : وشو بسم الله
غيث : شذا الزين كله ارفقي بي !!
ابتسمت وقالت : ماخذته منك !
انسحبت بسرعه و اتجهت لعند البنات مستحيه ، ابتسمت وهي تشوف التراحيب و الاحضان و الكل يبارك لها ، ام عبدالرحمن : وااه اميره كبرتيي
ابتسمت تضمها بقوه : يعيوني ي هنوفيي
عائشه : يحظ غيث دامه بياخذ اممورهه
ابتسمت وقالت : يقلبي عواش
-
عند العيال بـ المجلس
ضحك غيث وهمس ل خلف : ي وسخ كان خليتني اتأملها شوي شذا م يصير كذا
قرصه نادر وقال : وجعاه شعندكم
همس مُلهم وقال : مخبولين ذول
نادر : تشوف ! مو منهم مننا حنا يوم رحنا معاهم
ضحك غيث وقال : ارجعوا الشركه يلا ؟
ضحك مُلهم وقال : ظلام ما اسمع
نادر : تصدق حتنا م سمعت
انفجر غيث ضحك وقال : بالله
نادر : ايه يارجال م سمعنا شي
خلف : انا بسمعكم طيب
ضحك نادر وقال : اجتمعوا امحق اثنين
قطب غيث حاجبه وقال : نعم نعم وش قلت ؟
مُلهم : م قال شي قاعد تسمع خرابيط انت
انفجر ضحك وقال : يغطي عليه بعد !!
نادر : محزمي المليان ذاا شدراك انت
ضحك خلف وقال : وربي انك بزر
نادر : والله البزر ذا ولدك مب انا
طاح خلف يضحك وقال : حدك ع ولدي اذلف بس
غيث : لو اني ماخذ ذياب و حمود و مسعود و لؤي ابرك منكم تصدقون انكم مزعجين قسم بالله
غمز نادر وقال : شرايك نروح و تجي لك حبيبتك هاه
ضربه غيث على كتفه وقال : صدق خلف يوم قال بزر
انفجر يضحك وقال : امزح يبوي شفيك
مُلهم : اعقلوا خلاص يخواني
-
يُتبع
-
( ارحبوا ي شيّوخ قلبي شحالكم عساكم بخير ، ان شاء الله البارت عجبكم الصراحه حسيته مليان أحداث ملخبطه مع بعض بس ان شاء الله يعجبكم ، و م باقي شي و توصل روايتنا لـ 7k قارئ هذا انجاز عظيم بنسبه لي ، جعلني فداكم والله ❤️❤️❤️! )
أنت تقرأ
كل الامان في حُبك وكل الاماني قربك
Randomرواية كل الامان في حُبك وكل الاماني قربك للكاتبة : رهف القحطاني ✍🏻 - ثاني إنطلاقه لي 🤎. - ترقبوا معنا الروايه ✨.
