كاعدين بالسجن والاخبار نسمع بس مو أكيدة يكولون الحكومة راح يصدر قرار العفو واحنا كل لحظة ننتظر تجينا الخبر اني وخضر واحد يباوع لثاني باوعت لخضر وكلت:- إذا طلع العفو شنو ناوي تسوي
أخذ خضر نفس عميق:- تعرف طول مااني مسجون محد زارني من اهلي غير صديق واحد عندي هو ضل يزورني والبقية ولا سألوا عني عندي مبلغ زين يمه امنته عنده من اطلع راح اأجر بيت واحاول افتح محل زغير على كد حالي واعيش بي
حطيت ايدي على جتفه:- اني اخوك تعال وياي راح أحسبك واحد منا وتلزم الشغل بالمحل ويا اكرم صديقي لقمتنا نتقاسمه سوا همنا واحد وفرحتنا واحد
حط أيده على أيدي ونزلت دمعته مسحه بأصابيعة :- كفو منك زلمة ونعم منك الشي الوحيد الي فرحني بالسجن وهو وجودك انت ومحسن وياي معرف شلون جنت اصبر كل هالسنوات بدونك تعرف شكد تاثرنا بفراق محسن بس وجودك بجانبي عمري مانساه راح اضل وياك ومراح نفترق
:- ولو اخوي بس تعال وياي خضر راح اشيلك على راسي
خضر:- يسلم راسك متقصر ولله دوم صاحب الفضل والكرم والغيرة بس لازم اروح اكو أمور لازم اصفي بس تاكد بين كل فترة راح ازورك
:- واني انتظرك شتحتاج مااقصر
گبل حضنا بعض وطبطت على ظهره رجعت لمكاني واتكأت عل حايط مرت ساعات محسينه غير الحُراس اجو يضربون على السجن ويصيحون :- الرئيس صـدام حُـسين انطـه عـفوا عــاام لجـميع السـجناء ،الرئيس صـدام حُـسين انطـه عـفوا عــاام لجـميع السـجناء
