طرقات نحو الهلاك

البارت (7)

#طرقات_نحو_الهلاك
بقلم #احمد
البارت_7

شهد .. رجعت التيلفون لمحمد وما اخذت بالي من الموضوع بس كلت لازم اطبق كلامو ومن باجر ابلش اصلي والتزم بصلاتي

ثاني يوم بلشت من الفجر اصلي والضهر جنا دا نتغدا وبوقتها محمد مو موجود ماعرف وين رايح وفجأة طب علينا كال احمد بالحوش

باوعنا عليه باستغراب لان مو موعد نزول احمد وجانت علامات وجهو تدل على انو مصدوم او صاير فد شي مو زين

كمنا مع بعض نريد نعرف شكو اول ما وصلنا باب الصالة عمتي وكعت على ركبها ونوال صارت تصرخ بكل صوتها

باوعت كدامي جان اكو تابوت محطوط عليه علم العراق وكدام البيت واكفة سيارة الجيش الي وصلولنا احمد بس هو احمد

تقدمت من بينهم بخطوات متثاقلة وبدون ما احد يمنعني بعدت العلم ورفعت الغطى بكل صعوبة واني لحد الان ما اعرف شصاير

جان حبيبي متمدد بيه ومسكر عيونو الحلوات جان نايم مثل الملائكة بس هالمرة ماراح يكعد ويكعدني علمود اسويلو ريوك

هالمرة نام ونامت وياه كل احلامي وطموحاتي نامت وياه الحنية والاهتمام نامت وياه كل امالي واسباب استمرار حياتي

حركت اصبعي على وجهو واني اتأملو وعرفت انو مات وبعد ما اشوفو مثل بابا وماما بس من الصدمة ماجان عندي اي ردة فعل

بقيت صافنة بوجهو ثواني وانتبهت ان يم صدرو اكو دم صاير على صدرو وقطع صفنتي محمد من اجى سحبني وهو يبجي

واول ما سحبني من التابوت طب بدر وهو يركض ومن شاف التابوت وكف بمكانو وباوع على امو كال اجى العريس يمة اجى العريس

نزلن دموعو وهو يردداجى العريس يمة اجى حزام ضهري يا بوية الغالي وويا كلامو حتى الي جانو ساكتين صارو يبجون

شهد.. عوفني محمد فدوة

محمد.. كافي شهد الله يخليج .. جان خايف علي لا ادخل بحالة صدمة

شهد.. عوفني الله يخليك مو ميت هو نايم باوع عليه نايم مثل كل يوم فدوة عوفني خليني اكعدو فدوة عوفني محمد .. جان ماسكني ويبجي

جنت احجي وياه وهو ولا كأنو يسمعني وخلال كلامي وياه اجو اهلو تجمعو عالتابوب وما تسمع بس الصياح والبجي

بعدها تقدم واحد من الجيش ماعرف شحجى ويا عمي وما سمعتو لان جنت اترجى محمد يعوفني وبسبب صوت اهلو هم

ضاهر.. بدر اخذ اختك وامك وخلينا ندفن اخوك الشهيد

بدر.. بانكسار .. يلا يمة

كوة سحبهن من التابوت وتقدمو الجيش وشباب من المنطقة علمود يشيلوه ورجعو سكرو التابوت وعدلو العلم وشالوه بس اخذو روحي وياه