طرقات نحو الهلاك

البارت (8)

#طرقات_نحو_الهلاك
بقلم #احمد
البارت_8

شهد.. عفتهن على حالهن ورحت توضيت ورجعت للغرفة فرشت السجادة (المصلاية) الي اخذتها من نوال من وصاني احمد اللتزم بصلاتي

رفعت ايديني وكلت الله اكبر وحسيت جسمي رجف ووكعت بالكاع وتأذت ركبتي وصحت بصوت مسموع كلت اااااخ

قبل ما نبدا بالبارت حاب اوضح شغلة وهي انو بداية القصة تبدا من وفاة احمد والبارتات الي قبل وفاة انجبرت اكتبهن علمود تاخذون فكرة عن القصة

يعني بهاي الاثناء عمر شهد 10 مو 12 اما باول بارت جان 8 لذلك جانت تصرفاتها عفوية كلش وما تعرف تطالب بحقها

******** وهسا نرجع للقصة *******
نوال.. اجت بسرعة .. ها شهد شبيج ليش تصيحين

شهد.. مو كادرة اصلي .. ومسكت رجلي من مكان الوجع

نوال.. ليش شبيج شصار وياج

شهد.. ماكدر اوكف على رجليني

نوال.. تمام مو مشكلة صلي وانتي كاعدة ماطول ما تكدرين تصلين

شهد.. ما يصير

نوال.. بلى يصير ما بيها شي

شهد.. ماعرف اصلي واني كاعدة

نوال.. ماكو فرق بس بالركوع

شهد.. شلون

كعدت يمي وركعت وهي كاعدة وكالت هيج تركعين وبقية الخطوات تنفذيهن مثل ما هن وماطول ما تكدرين مسموح الج تصلين وانتي كاعدة

بعدها عافتني وطلعت وبوقتها ما جنت اعرف شكد الوقت بس جنت اريد اصلي ركعتين لوجه الله وما جمت اعرف اوقات النهي بوقتها

(اوقات النهي هي بعد صلاة الفجر لارتفاع الشمس بقدر رمح ووقوف الشمس في كبد السماء ويكون هذا الوقت قبل صلاة الظهر وبعد صلاة العصر الى صلاة المغرب

ويستثنى من اوقات النهي الفرائض والسنن ذوات الاسباب مثلا السنن الرواتب وتحية المسجد وسنة الوضوء)

صليت واني كاعدة سنة ركعتين وبعد ما خلصت رفعت ايديني اريد ادعي بس ماعرف شنو اكول وماعرف شنو اطلب من ربي

بصراحة بوقتها عقلي ما يجمع الكلام الي لازم اكولو علمود ادعي وتيقنت بكلبي ان الله يعرف شنو اريد بدون ما اطلب منو

نزلت ايديني وبقيت كاعدة عالسجادة لا الي واهس اروح لفراشي ولا عندي طاقة اروح عالصالة فبقيت بغرفتي

انداريت عاللعابات الي من احمد اجى ببالي احركهن او اشيلهن باي مكان غير غرفتي بس تراجعت عن الفكرة

ذني ذكرى من احمد لازم يبقن هنا علمود دائما من اشتاقلو اباوعلهن واتذكرو جنت افكر بهالكلام هذا واحس نفسي اختنكت