طرقات نحو الهلاك

البارت (51)

#طرقات_نحو_الهلاك
بقلم #احمد
البارت_51

اسد.. بالليل رحنا ودعنا اهلها وانطيناهم خبر وثاني يوم الصبح ودعنا اهلي وتوجهنا لمطار بغداد الدولي لان من هناك راح ناخذ طيارة لبيروت

من وصلنا المطار رحنا سلمنا الجنط وكملنا الاجرائات وجان باقي عالطيارة نص ساعة وكعدنا ننتظر لحد ما يصير الوقت

صحيح روحتنا على لبنان ما تكون ذاك التغيير بس هم بيها اماكن حلوة واحنا نريد نبقى شهر ناخذ راحتنا بيه بدون ما نفكر بضغط الحياة

من صار الوقت توجهنا للطيارة بس جان بالحجز اني المقعد الي عند الجام ونارين يساري بس تبادلنا لان تريد تكون هي من عند الجام

من ركبو الحاجزين كلهم الطيار كاللنا نلبس حزام الامان ونفذنا وبدت تمشي مثل السيارة بالبداية وصارت كلش سريعة وبعدها ارتفعت

نارين ماسكة ايدي ومغمضة عيونها وترجف من الخوف ويمكن لو ماكو احد جان صراخها ترس الطيارة بس تقيدت بسبب الناس

من استقرت بالجو شوية هدأت وبدت تستمتع بالمنظر من الجام والي جانت تظهر منو ارض العراق كلوحة فنية ابدع الله في خلقها

وبسبب قرب لبنان من العراق جانت الرحلة ما تتأخر تقريبا اقل من ساعتين وصلنا بيروت وبين ما كملنا الاجرائات صارت الساعة 4 العصر

طلعنا من المطار واخذنا تكسي وكلش فرح بينا لان عراقيين واستقبلنا باسلوب كلش حلو واخذنا على فندق قريب من المطار

نزلنا جنطنا بيه وارتاحينا ربع ساعة وبعدها نزلنا نتمشى بالمنطقة نتعرف عليها ورحنا هم ناكل شي بفد مطعم لان كتلنا الجوع

جانت الحياة مختلفة هواي ببيروت وبالاخص لبس البنات كلو قصير وضيك واكو محتشمات بس مو مثل المجتمع العراقي

قبل ما نوصل المطعم مرينا من يم كوفي خاصة بالبنات جانن كل ثنين ثلاثة كاعدات سوا وبنصهن اركيلة يدخنن منها مع بعض

نارين.. تخيل تلكيني كاعدة وياهن

اسد.. علمود اهجم بيتج

نارين.. ههههههه بس صدك وين اهلهن عنهن

اسد.. ذول حياتهم هيج يعني هالشي عندهم كلش عادي

نارين.. والله غريبة المشكلة انهم عرب مو اجانب

اسد.. ليش مو اكل بنات يدخنن بالعراق وبغير مكان فهالشي موجود بكل دول العالم يلا هذا المطعم خلي ندخل

دخلنا للمطعم جان كلش راقي والاكل يمهم من صدك يخبل واكلنا ومن شبعنا رجعنا كملنا جولتنا لحد ما تعبنا ورجعنا للفندق

من وصلنا كيناها بنومة ما كعدنا لثاني يوم الصبح ولان اول مرة نكون وحدنا وماكو احد يزعجنا بقينا بالغرفة ما نزلنا