طرقات نحو الهلاك

البارت (20)

#طرقات_نحو_الهلاك
بقلم #احمد
البارت_20

(#ملاحضة .. اخواني البارت دا اكتب يوميا 2000 كلمة عدا الخميس استراحة ولو اكدر اكتب اكثر او اكتب بارتين جان كتبت الكم بس هذا اكثر شي اكدر اكتبو فاتمنى تقدرون وضعي لان ماكدر البيلكم طلبكم واكتب اكثر ❤️❤️)

شهد.. كملنا عشى وبعد العشى كعدت احجيلهن وهم كضينا الوقت كلو بجي اني ابجي عالذكريات وهن يبجن على حالتي قبل ما اجي

قبل وقت النوم اجت اية وبوجهها ضحكة شريرة كالت امير يصيح ورحت وياها من وصلت الصالة جان امير عصبي كلش

امير.. صدك اذيتي امي اليوم ولج

شهد.. بدون قصد

راغب.. كافي امير

امير.. لحضة يابة الله يخليك .. شلون هاي بدون قصد

شهد.. كلتلها من البداية ماعرف وبعدها ما جنت منتبهة واذيتها بدون قصد

امير.. ووين جان عقلج حمارة انتي وما تنتبهين للي دا تسويه عقلج وين جان لو مثل المطي 24 ساعة صافنة

دعيديها مرة ثانية اذا ما اسحلج بالبيت كلو وانظف بيج الارضية وانكلعي من وجهي لا بارك الله بيج ولا بهالوجه الخايس

جنت واكفة اباوع على صفحتي اليمين والكلمات يوكعن علي مثل الطلقات واريد بس اتحكم بدموعي علمود ما ابجي كدامهم ماكدرت

فوك ما انجبرت على شي ما الهم حق يجبروني عليه وانضربت ضربة قاضية ببطني اخير شي اني الي اترزل كدام الكل

رجعت للمطبخ جانت بخطوات بطيئة وكلامو يتردد باذني وكأنو مقطع صوتي كل ما يخلص يرجع ينعاد من جديد

بوقتها حسيت شي داخلي تحطم انذليت بما فيه الكفاية ام عهد جانت تنتظرني بالمطبخ والمسكينة ما تكدر تسوي شي

جانت كلش تنقهر من احد يسمعني كلام لو يأذيني وتبقى ساكتة بس علمود ما تنكطع رزقتها هي وبناتها ويكتلهن الجوع

اخذتني بحضنها وشبعت بواجي بذيج الليلة حتى نوم ماكدرت انام بقيت كاعدة للصبح ولا كأنو مر علي ليل وطول الوقت افكر بالموقف

من صارت الساعة 9 سكرت عيوني واخذتني النومة وبقيت نايمة للعصر ومن كعدت بس فتحت عيوني وبقيت بمكاني

ما جنت مشتهية اكل او اشرب او اسوي اي شي كل الي اريدو ان ابقى لحالي بدون ما احد يحجي وياي لو يسمعني كلام

من سمعت صوت خطوات اجى للغرفة غمضت عيوني وجانت عهد صاحتني كم مرة علمود اكعد وما رديت عليها

تحركت شوية علمود اوضحلها انو نايمة وما بي شي وعافتني وراحت وبقيت هيج لوقت العشى وما اكلت اي شي بذاك اليوم

بدا ينزل السكر عندي وبديت ادوخ شوية شوية والضاهر ام عهد والبنات ناسيات شغلة السكر او عبالهن لان نايمة ما ينزل