#طرقات_نحو_الهلاك
بقلم #احمد
البارت_30
شهد.. كملت غداي عالسريع وكمت غسلت ورجعت حطيت فراشي ونمت وعفت الشغل عالبنات وهن ما جانن يتحسسن من هالشي نهائيا
كعدت العصر شبعانة نوم وجسمي مرتاح بس عندي شوية تشنجات من التعب الي مو متعودة عليه صارلي فترة
جانت مشتغلة المولدة كمت توضيت ورجعت انتظر الاذان جان باقيلو دقايق قليلة ويأذن وكعدت العيلة علمود الصلاة
الحديقة جنا ما ندخلها بالبداية لان بعدو العشب مو منتشر بيها وما نريد نخربها بس العصر من يبرد الجو نرشها ونعوفها
جان رمضان عالابواب وشايلين همو لان الجو حار كلش والكهرباء ابد مو زينة من عدا شغل البيت والغنم والاكل كلهن متعبات برمضان
لاحظت على نفسي من اجيت يم عيلة طارق ما نزل عندي السكر واصلا ناسيتو نهائيا وماعرف شنو السبب حتى حلويات مدا اكل مثل قبل
من يجيب طارق اكل بس مو موجودات باستمرار مثل قبل واعتقد من المربى والدبس والكيك الحلو الي تسويه منتهى بعض المرات
من اذن العصر صليت وكلتلهم راح اروح اطلع الغنم كال طارق لا تتعبين الجو حار كلتلو لا عادي كال اخذي منتهى وياج لعد
منتهى ما جذبت خبر اجت فورا وياي كلتلها اني راح امشي كدامهن وانتي وراهن كالت تمام وفتحت الباب مالهن ومشيت كدامهن
صارن يمشن وراي وياكلن من الاكل الي يكون بطريقهن ويتبعني وين ما اروح اخذتهن لنص الارض ووكفناهن هناك ورحنا عن الغسطل
شهد.. شو ما يفرغ هذا
منتهى.. ابوي دائما يعبيه
شهد.. شيسوي بيه
منتهى.. يكول اذا يشربن منو حيوانات يجينا اجر بدون تعب
شهد.. ايوا بس خطر
منتهى.. لا ما فد يوم غرك بيه انسان او حيوان
شهد.. لعد فكرة ابوج حلوة
لمار.. يولن جلبات ليش ما كلتلي علمود اجي وياكن
شهد.. والله ماكو جلبة ومسعورة غيرج
لمار.. بسيطة يولي حيوانة اني الج
شهد.. اكلج رشيتي الحديقة
لمار.. لا والله نسيتها
شهد.. لعد اروح اني ارشها
لمار.. عوفيها ما عليها شي
شهد.. لا يموت العشب
لمار.. لعد روحي واحنا هسا يجي بابا بمكاننا ونلحكج
شهد.. خوش
رحت اتمشى للبيت ومحترة لان من صدك الجو نار بس استمتاعي باللحظة مخفف علي من شدة احساسي بالحرارة
أنت تقرأ
طرقات نحو الهلاك
Romanceتمضي الايام تلو الايام تتجدد الاوجاع والالام لم تجري الرياح بما لا تشتهي سفننا فلم يعد موجود من سفننا سوا الحطام قصة تتحدث عن طفلة لم ترى من الطفولة شيء فما هو مصيرها بين وحوش ترتدي اقنعة بشرية ...... #طرقات_نحو_الهلاك كونوا معنا ..........
