طرقات نحو الهلاك

البارت (33)

#طرقات_نحو_الهلاك
بقلم #احمد
البارت_33

شهد.. وبعد ما خلصت الدولكة وشربتها كلها احس نفسي ارتويت وارتاحيت والتعليلة كلها وهم يقلدون علي وعلى كمية الماي الشربتها

اني ما جنت ضايجة بالعكس اضحك وياهم لان اعرف يتشاقون وياي ومن صار وقت النوم صعدنا عالسطح نمنا كالعادة

من كعدت عالسحور جنت جوعانة كلش لان فرغت معدتي من الماي ووقتها اكلت الا انتفخت بطني وبردت كلبي بالاكل

ثاني يوم انعاد نفس الروتين بس الفرق ان بسمة طبخت واني ومنتهى سوينا حلويات (كيك وكاستر ومحلبي ومن هاي الاشياء)

اني مجرد مساعدة لمنتهى واتعلم منها وهي تسوي ومن كملناهن حطينا الزايد بالمجمدة علمود يجمد وما يخرب وتركنا الي نحط اليوم بالثلاجة

جانت معاناتنا الوحيدة هي حرارة الجو بالاخص اذا تطفي الكهرباء الضهر هنا من صدك نحس دا نحترك حرك من الحرارة

مرت الايام على هذا الروتين وما صار اي احداث تستحق الذكر الى ان اجى العشر الاواخر وقررنا انا ولمار نقيم الليل

العيلة كلهم كالولنا ما نكدر نتحمل بس احنا جان عندنا اصرار بس غيرنا بنظام نومنا علمود نكدر نقيم وما نتعب هواي

صرنا بعد العشى نخلص شغلنا عالسريع ونصعد للسطح نحاول ننام ونوقت منبه واحد من التيلفونات عالساعة 11:30

ومن يدك نكعد سوا نتوضئ وكل وحدة تاخذ قران ونصعد فوك بس نقرا قران لان ما نعرف الصلاة شلون تكون

اني ما جنت مهتمة كلش بالقيام بس حبيت اجرب هالتجربة هاي لان ما اتذكر سهرت من قبل لصلاة الفجر فاريد اشوف اتحمل لولا

اول يوم كعدنا سوا اني ولمار ونزلنا تحت الكهرباء طافية والدنيا ظلمة داخل البيت بحيث ما نشوف بعض لولا فلاش التيلفونات

توضينا عالسريع واخذنا قرانين وسجادات ثنين والقاعدات مالت القران علمود من نتعب او نسجد ما نحطو على الكاع

بلشنا نقرا بس ما توقعنا الوضع هيج يكون مع تعب الصيام وتعويدنا عالنوم بدا يسيطر علينا النعاس شوية شوية

اريد اركز عالقران ماكدر فسكرتو وتمشيت عالسطح شوية علمود اصحصح ورجعت اقرا جنت واصلة لسورة ق

رجعت اقراها يادوب كملتها وصرت اغفى  وافز واغى ومن اميل افز باوعت على لمار لكيتها غافية ومسلمتها تراب الاخت

اخذت القران منها وبعدتو بصفحة وكعدتها كلتلها تعدلي بفراشج احنا وين والقيام وين ورجعت لفراشي ونمت هههههههههه

جنت اعرف راح نتعب بس ما توقعت لهاي الدرجة ماعرف شلون اكو بعض ناس يبقون كاعدين للفجر بدون ما ينامون نهائيا