ابتسمت جسور وسرعان م قامت من سمعت تميم يناديها وراحت له
التفت سلوى على وعد وهمست لها : وعد ذا الحلو شسمه؟
وعد : حبي ترا ذي اللي قامت زوجته راح عليك
سلوى بخبث : مو مهم وش اسمه هو
وعد بعدم اهتمام : تميم
سلوى : حتى اسمه حلو نفسه احسه يصلح لي
نطقت بتسليك : ايوه ايوه
عند تميم و جسور ~
جسور ببتسامه : الحين لو مره احسب كم مره تقابلنا في اليوم بتكون كثيره
تميم : القلب مب انا
جسور : طيب الحين وء تبي مناديني وطعبا السبب الحقيقي مهم
تميم ببتسامه : لا تخافين بقول السبب الحقيقي
جسور : ايوه وش تبي
تميم : تجهزي رايحين المستشفى
قاطعته بإستغراب : ليش؟
تميم : عندك موعد ولا اجلطيني وقولي ناسيه
جسور : ناسيه بس انت ليش متهم بمواعيدي اكثر مني
تميم : لاني ابوه ي امه المهم تجهزي بنتظرك بالسياره لا تتاخرين
هزت راسها بتمام ومشت داخل الخيمه تبدل على السريع وتخرج
عند أريام و فارس ~
جلست بجانبه بصعوبه وهي تتمدد بجانبه بهدوء
فارس ببتسامه : كيفها ام نجد
أريام بتعب : تعبانه
فارس : هذا وانتي توك السابع وش بتسوين بالتاسع طيب
أريام : فارس م يضحك ترا باقي شهرين واولد
فارس : شهرين و تنور دنيتي نجد الفارس !
أريام ببتسامه : بديت اشتاق لها من الحين اوف مرا متحمسه لجيتها
فارس : منتي مثل حماسي لها
أريام : الله يبشرنا بجيتها معافاه و بصحه جيده
فارس : أمين
خيمه الرجال ~
جلس بعد ماكان يصب القهوه لهم وهو يحس بعظامه متكسره من الوقفه
لؤي : يزيد صب لي قهوه
يزيد بتعب : تخسى صب لنفسك
مِروان بضحكه : لايسمعونك الشياب والله انهم يخلوك صبصب لهم كلهم مرا ثانيه
لؤي يكمل : ولا تجلس الا لين يشبعون منها
يزيد : يخي انطمو مافيني اقوم خلاص
فؤاد بلقافه : انتم اخويا صح؟
لؤي همس لهم : ذا ليش ملقوف بزياده
كتم ضحكته مِروان ونطق يرد عليه : اي نعم ي فؤاد بس شعندك تسأل
فؤاد : لا بس كذا علاقتكم حلوه
لؤي : قل ماشاءالله بس
فؤاد : ماشاءالله
احمد : فؤاد جواد ابوي يبيكم برا
جواد : قصدك فؤاد بس صح
احمد : لا كلكم
تأفف جواد وقام مع فؤاد تؤامه بحلطمه وهو عارف موضوعه
ابو احمد بهدوء : اسمعوني زين انا قررت اخطب لكم وم ابي اي اعتراض
جواد بصدمه : ابوي اخط لفؤاد بس انا شكو الحمدلله مضاوي عندي مكتفي فيها وبعدين عندي ولد يبوي مالك عذر تزوجني الثانيه !
ابو احمد ببرود : قلت اللي عندي وبنت ال ناجي اذا ماهي راضيه تطلقها و تاخذ ولدك منها واذا م تبي تشتته ترضى بالزواج وبعدين الشرع حلل اربعه يعني مافيها شي لو تزوجت الثانيه
فؤاد بهدوء : من عند مين بتخطب لنا ومتى
ابو احمد : انت بخطب لك بنت عمك سلمان و اخوك بخطب له من بنات ال ظافر
جواد : يبه انا مو راضي عندك احمد زوجه
ابو احمد بملل : خلاص اسكت معد بزوجك بزوج اخوك احمد اسكت بس رح ناد اخوك
هز راسه بتمام وراح وماهي ثواني الا و جاء احمد
ابو احمد ببتسامه : عاد انت الظاهر انك ماراح تردني اسمعني زين يالبكر انت كبرت و انا للحين م خطبت لك اخوك اللي اصغر منك تزوج و جاب ولد وانت باقي وم ابي اي اعتراض بخطب لك من بنات ال ظافر ومابي اي اعتراض سمعت !
هز راسه بتمام بما ان مافيه مجال للرفض ومضطر يوافق
مشى ابو احمد و تركهم بمكانهم يفكرون
خيمه الحريم ~
ام ليلى ببتسامه : نسيت اعرفكم على زوجه ولدي سليمان ي ال ناجي
تكلمت هيله بما انها الكبيره بعد ام زوجها و سعاد صار مطلقه : تشرفنا فيك انا ام هادي زوجه سعد ال ناجي الاولى
ام مِروان ببتسامه : تشرفت فيك انا ام مِروان و سلوى
ابتسمت هيله بهدوء وسكتت تناظر الفراغ
الجده هيفاء : ي بنات وين جسور ماهي جالسه معكم
ملاك : راحت مع زوجها عندهم موعد
الجده هيفاء بإستغراب : موعد وشو الحين
ملاك : مدري والله لكن الاكيد يتطمنون على الجنين
سلوى ناظرت وعد بصدمه وهمست لها : ليه م قلتي لي ان زوجته حامل !
وعد شهقت بفجعه : يحماره شيليه من راسك م بيعطيك وجه تراه متزوجها عن حب
سلوى : اوكي مالك دخل فيني
وعد : بكيفك
سلوى : سوي نفسك م تعرفين عن شي فاهمه !
هزت راسها بتسليك و لفت على البنات
وعد ببتسامه : بنات شرايكم نطلع نتمشى شوي خارج المخيم
نوف : تم بس م فيني حيل اللبس النقاب
ساميه : لا عادي محد بيشوفك بس خذي الطرحه احتياط
أرياف : جسور شوي و جايه ننتظرها؟
مهره : ايوه بنات خلونا ننتظرها
وعد : نطلع نمشي اكيد راح نقابلها وتكمل معانا
ريوف : ايوه راح نلاقيها قدامنا اساسا
خرجو البنات بعد م تحجبو المحجبات و المنقبات برضو
أوجان ببتسامه : بنات الجو حلوو فيه دبابات صح؟
ساميه : ايوه و برضو فيه بقي وفيه قسم خاص بالالعاب كبير مرا و وسيع
ريوف بحماس : يلا بنات تكفون بخاطري اركب دباب
مشو متوجهين لمكان الالعاب و صادفو بطريقهم العيال و تميم اللي توه وقف سيارته
أرياف ببتسامه : جسوري جت
عند جسور و تميم /
وقف السياره بجانب بقيه السيارات ومسك يدها يمنعها عن النزول من شاف العيال متجمعين قريب من السياره
تميم بهدوء : ثواني لا تنزلين
تعدلت بجلستها وهي تلتزم الصمت وتناظر الامام بهدوء
تميم : اذا تحسين نفسك تعبانه لا يردك شي
جسور : تمام بس ترا تونا في الشهور الاولى
تميم : والشهور الاولى اخطر من الاخيره
جسور : ابي انزل
تميم : صبر
سحب المفتاح من مكانه ونزلو وتوجه لها يمسك يدينها امام انظار العيال و بالاخص مازن اللي كان يفور بمكانه، تركت يدينه من شافت البنات واقفين يناظرون لها و توجهت لهم تجري
تميم : لا تجرين !
جسور : وحشتوونيي
ريوف ناظرتها بسخريه : الله و اكبر ترا كلها كم ساعه رحتي وجيتي
جسور ببتسامه : المهم وحشتوني
سلوى بهمس لوعد : شايفه نفسها وع مدري على وش حبها تميم
وم انتبهو على اللي سمعت حوارهم بما انها قريبه منهم ولفت على اختها الواقفه جنبها
أوجان : اخت زوجك ذي انا من اول ماني مرتاحه لها وش دخلها بتميم و جسور !
أوتار : وش اسوي فيها خبيثه مرا منكده علي عيشتي كل ما قررنا نطلع انا و مِروان حاشره خشمها معانا
أوجان : الله يعنيك عليها
أوتار : أمين
لفت أوتار تدور مِروان و سرعان م توسعت ابتسامتها ولفت على اختها : اقول أوجي متى الزواج
أوجان ناظرتها بإستغراب : اي زواج؟
أوتار ببتسامه : ولد ال ناجي ما شال عيونه عنك
لفت تشوف مين وسرعان م كشرت بوجهه من شافته لؤي : أوتار سدي حلقك
ضحكت من رده فعلها و انقهرت أوجان و راحت عند جسور
أوتار بضحكه : امزح يزعوله
جسور : شسالفه
أوتار : تخيلي
قاطعتها أوجان بقهر : أوتار وجع
ضحكت أوتار زياده و جسور ضحكت معها من ضحكها
أرياف ناظرتهم بفشله : اسكتو فشلتونا
اختفت صوت ضحكاتهم من سمعو صوت الجد سُليمان، وابتسمت أوجان بإنتصار
جسور بهمس : وجع على وش تبتسمين انتي بعد !
أوجان بسخريه : على فشلتكم انتي و الست أوتار
جسور : اقول دزي بس !
ساميه بملل : مطولين صح
أرياف : لا يلا نمشي
جسور : وين؟
ريف : م اتوقع تقدرين بنروح نعلب تِجين؟
جسور : الا اقدر يلا
ريف بتوتر : مِتأكده؟
جسور بتسليك : ايوه معليك
مشو ورا البنات اللي سبقوهم متوجهين للقسم الخاص بالالعاب
عند العيال ~
مِروان : يعيال نبي نلعب مليت من الوقفه والسوالف كذا
يزيد : خلها بعدين البنات يلعبون اللحين بعدهم
مِروان : عادي نلعب وش فيها
تميم بحده : خلهم يلعبون براحتهم لا اشوف ورع يوطوط عندهم اكيد يبون يلعبون وهم مرتاحين وبعدين محارمنا منهم
سعود بطقطقه : المتزوجين مشكله ياخي درينا تغار عليها هد !
تميم : سد حلقك بس !
مازن بهدوء و بهمس خافت : مالومه يوم يغار عليها جمالها يطيح الطير من السما !
كان يظن ان محد سمعه لكن سمعوه بما انهم قريبين من بعض والهمسات تنسمع ، فار دمه تميم ولكمه بقوه والغيره تشتعل بجوفه يتغزل فيها و قدامه زين لو م مات بيده ، وظل يضرب فيه والعيال يحاولون يفكونهم عن بعض ، وبعد معانا قدرو فكونهم عن بعض و وجهيم فيها جروح ، لفو على جيه البنات
ونطق يزيد بهمس : اكتملت الحين !
شهقت بصدمه وهي تشوف وجه تميم مليان جروح وراحت له تحضنه بصدمه امام انظارهم
جسور بخوف : يمه تميم مين سوا فيك كذا !
تميم وهو يمثل الهدوء ومن داخله نار : مافيني شي
جسور بخوف : تعال اضمد لك جروحك لا تتلوث
وسحبته وراها للخيمه اللي امامهم ، ولحسن حظها كان فيها اسعافات اوليه وتوجهت لها وسحبتها وجلست امامه وهي تمسح على جروحه بقطنه ، تغيرت ملامحه من الحراره
ونطقت بهدوء : مين سوا فيك كذا علمني
تميم بسخريه : ليه بتروحين تسوين فيه مثل م سوا فيني ولا وش
جسور ابتسمت بقوه وبانت غمازاتها الصغيره : يمكن
ابتسم من جمال ضحكتها و غمازاتها وسرعان م شبت نار الغيره بصدره من تذكر غزله فيها وبجمالها
جسور ببتسامه : طيب قولي مين سوا فيك
مارد عليها وسحبها لحضنه بهدوء وقبل راسها
تميم : احبك
جسور بضحكه : لاتغير الموضوع قول ولا بعرف بطريقتي الخاصه
تميم ببتسامه : طيب انتي قولي ليش تبين تعرفين مين سوا فيني كذا
جسور : تميمم !
كانت تناظرهم من الخارج بحقد وهي تشوفه يضحك لها وحاضنها وهي مب معطيها وجه ، فزت على صوت وعد اللي جت وراها
وعد بسخريه : عايشه الدور و بزياده حبيبتي ترا م درى عنك وبعدين وش ذا الحب الي من اول م شفتيه بديتي تغارين عليه حتى من زوجته الله يشفيك بس
سلوى بحده : مالك دخل
وشمقت لها و مشت تاركتها مصدومه من حركاتها
وعد بهمس : مريضه وع
ساميه : بنت خالك ذي وش تحس فيه
وعد : مدري عنها المريضه بالله قد شفتي وحده تغار على واحد وهي توها عرفته حتى اسمه توها عرفته
ساميه : المهم معلينا من بنت خالك ذي البنات جلسو بالجلسه امشي نجلس معاهم
وعد : تم
عند العيال ~
تقدم فارس وهو يهمس ل مازن بحده : كلامك ذا م بيعدي على خير ي ولد البكير
م رد عليه مازن و رمقه بنظره تحدي
وقف مراد ببتسامه : يعيال ترا فيه فرق سامري بيجون كلمتهم نبي نولع الجو
تعالت اصوات العيال بحماس وكلن قام يجهز خيمه للفرقه لجل في الليل يلعبون سامري
لؤي بطقطقه : يبو سطام تعرف تلعب سامري ولا نعلمك
يزيد : لا معليك نعرف للسامري استريح
مِروان : يعيال بتلسبون فروه ولا سديريه
سعود : لا هذا ولا هذا بلبس ثوب كحلي افضل
تميم : ماهوب لازم فروه ولا سديريه ثوب وصل الله و بارك
غسان : طيب والبرد ترا برد الليل قوي م يرحم
تميم : تحملو ولا البسو سديريه !
فارس : كم الساعه ي هادي
هادي : سبعه ونص المغرب
فارس : قومو الصلاه يعيال
قامو وراه يتوضون وشافو الاباء و الاجداد قبلهم يصلون ، وقفو بجانبهم لين اكتملو وصار ثلاث صفوف وكبرو و صلو
عند الحريم ~
وقفت الجده هيفاء ولبست عبايتها وناظرت البنات بنص عين : ورا م تقومو تصلون الصلاه عمود الدين قمو لا بارك الله فيكم من بنات !
ريوف : ي جده انا م علي صلاه
وعد : وانا بعد
الجده هيفاء ناظرت البنات : وانتو عسا برضو م عليكم صلاه ! تحسبوني غشيمه م اعرف انكم كذابين قمو بس صلو
أريام بهدوء وتعب : انا حامل ي جده وحملي متعب م فيني قوه اتحرك كثير
الجده هيفاء : انادي لك فارس يرجع الفِيلا تسترحين
جميله : أريام ي أمي عادي صلي لازم تصلين
أريام وقفت مع البنات وراحت تتوضا وتصلي
صفو البنات بعد م لبسو شراشفهم و كبرو و صلو جميعهم
« بعد مِرور عده ساعات ، في منتصف الليل »
وصلو الفرقه وضيفوهم والاجداد كانو مستنكرين جيه الفرقه ومو عاجبهم الوضن بس كانو ساكتين ، راحو للخيمه الخاصه فيهم وبدو يحمّون الطُبل ، وماهي الا دقايق معدوده وبدو يضربون على الطُبل يستعدون للبدء ، توجه لهم مِراد و بلغهم يغنون اغنيه خاصه ، وتعالت اصواتهم وهم يرددون /
اتـصـبـر وجـرحـي مـن ولـيـفي خـطـيـر
يـا حـمـد مـا تـشـوف اللـي غـدا بـي تـسـذاه
عـود ريـحـانـتـن تـسـقى عـلى جـال بـيـر
مـايـلـن بـالـثـمـر عـجـزو هـله عـن جـنـاه
أنت تقرأ
ما للنجوم اوطان دام السما عيونك
General Fictionروايتي الثانيه ❤❤ اذا تشابهت الشخصيات بـ شخصيات حقيقيه فهي صدف لا اكثر الشخصيات خياليه ! انستقرام : 7iel_4 لا اسُتبيح النِقل او الاقتباس !!
