لفت افراح تناظرها باستغراب وهي تحس هالصوت مألوف عليها وسرعان ما شهقت بصدمه من شافت جسور واقفه وراها
أفراح : جسور
جسور هزت راسها ببتسامه وتوجهت لها تحضنها : ايواا اشتقت لكك
أفراح نزلت تميم وبادلتها الحضن : مو كثريي
بعدت عنها جسور وجلسو على كنبه منفرده : وش صار معك يروحي اخوانك؟؟
افراح تهندت بضيق : تزوجت واحد اسمه وهاب مغصوبه عصام و عباس غصبوني عليه بس حسنه زواجي تميم ولدي
ناظرته جسور وانصدمت من شافته الولد اللي جابه تميم لها ونطقت بصدمه : افراح انتي رحتي الامارات قبل رمضان؟
افراح : لا بس وهاب اخذ تميم وسافر فيه
جسور : اجل ازواجنا اصحاب تميم زوجي جاب ولدك ومقلبني تخيلي قال انه ولده وصراحه بكيت ما تخيلت تميم يكون متزوج وحده ثانيه وجايب منها ولد
افراح : الله كيوت احنا صحبات و ازواجنا اصحاب مرا حلوو
جسور : ايوه بس مو مثل حظ أرياف زوجي و زوجها اخوان
أفراح : هي خير شمعنى انتو اخوان وانا صاحب زوجك !
جسور ضحكت : مالي دخل الحياه قسمه و نصيب
دخلت أرياف بعد ما كانت عند غياث لجل يّتطمن عليها وانصدمت من شافت افراح : افراح؟
افراح ابتسمت وتركت تميم الصغير بحضن جسور وراحت لها تحضنها : وحشتيني أرياف !
أرياف : والله مو كثري
جلسو عند جسور وافراح مبتسمه لانها لقتهم بعد انقطاع دام سنتين تقريبا
أفراح وهي فرحانه : بنت ولا ولد؟
جسور : بنوته وبسميها نِيـارا
أفراح بضحكه : خلاص تأكدت انهم اصحاب لانه ناداه ابو نِيـارا مو تميم
أرياف بفهاوه : مين الاصحاب؟
أفراح : زوجي و زوجها
أرياف : اماا عاادي انا زوجي و زوجها اخوان
أفراح ابتسمت : أرياف انتي حامل؟
أرياف : ايوه وتوني دخلت الثاني
أفراح ببتسامه : الله يتمم لك على خير يقلبي و تولدين بالسلامه
أرياف : آمين يروحي
سحبت جوالها من جتها رساله وكانت من تميم يطلبها تجيه المطبخ وقامت وهي تحس بألم شديد داهمها وما أن وصلت المطبخ صرخت بأعلى صوت من الالم اللي اشتد وحست بشي ينزل و رفعت راسها تناظر تميم اللي واقف امامها مرعوب من صراخها ، خرجو ملاك و الجده هيفاء و ريم وهم مصدومين وشافو جسور واقفه بمحلها وعروقها باينه واحمرار وجهها الشديد اللي بان بسبب الالم وعرفت الجده هيفاء انها بتولد من شافت مويها نزلت
تميم بخوف : جسور !
الجده هيفاء بسرعه : بتولد يا تميم رح شغل السياره بسرعه
فزت تميم بخوف وراح يشغل السياره وجسور تصارخ بألم ، دملت ملاك مجلس الحريم وهي خايفه وتدور عبايه جسور وهي مرتبكه
أرياف بخوف : عمه جسور شفيها تصارخ
ملاك برهبه : بتولد وين عبايتها بسرعه
فزت افراح وعطتهم عبايتها خذتها ملاك وراحت بسرعه والبنات مصدومين لأن أريام ما كانت تصارخ مثل جسور
افراح بخوف : الله يسهل ولادتها
« موقف السيارات »
شغل سيارته وحركها بسرعه عند بوابه الدخول ونزل يساعدهم وامرهم يفتحون البوابه وشالها وهو يركبها قدام بجانبه وهي تبكي وسانه راسها على كتفه من الالم الشديد اللي هي تحس فيه وحرك باقصى سرعه عنده متوجه للمستشفى
خرج سلطان وهو مفجوع : شفيها جسور يا ملاك ليه تصارخ
ملاك وهي متأثره بالموقف : بتولد يا سلطان
سلطان دمعت عيونه بفرحه : الحمدلله ياارب
الجده هيفاء : انا بروح اللبس عباتي واللحقهم كلم السواق يشغل السياره وقل لبوك
سلطان : ماله داعي اكلم السواق انا بوديكم يزيد رح بشرهم
يزيد بفرحه : ابشر
راح سلطان يشغل السياره و الجده هيفاء وملاك راحو يلبسون عباياتهم
عند يزيد ~
دخل المجلس وهو فرحانه ونطق : تميم ولد عمي رباح بيجيه الظنا وراح يوديها المستشفى بتولد
تعالت اصوات الحاضرين بالتباريك ل رباح و الجد سُليمان
سعود راح ليزيد : يعني الصوت اللي سمعناه قبل شوي صوت جسور؟
يزيد : ايوه وابوي راح يودي امي وجدتي هيفاء وشف عمي رباح طالع شكله بياخذ زوجته وبيلحقهم
سعود : كلم العيال وامش نروح المستشفى ذي اختنا لزوم نكون موجودين معها
يزيد : اجل رح شغل السياره وانا بروح انادي العيال
وفعلا راح سعود يشغل السياره و يزيد راح ينادي اخوانه و سّطام
« المستشفى ، قسم الولادة »
دخلوها علطول القسم برغم ان بعض الدكاتره في اجازه العيد و تميم دخل معاها لجل يهديها من روعتها وبكأها الممزوج مع صراخها
جسور بألم : تميمم اهه تمييييم !
تميم وهو متروع : اهدي تكفين والله لك اللي تبين لو هديتي
الدكتوره بهدوء : دكتور تميم ممكن تخرج برا ما اقدر اولدها براحتي
تميم : بظل معاها كفايه ولادتها خطيره لانها بالثامن وبتولدونها طبيعي والمفروض قيصري
الدكتوره : وانت شايف انو فيه دكاتره كثير عشان يساعدوني دكتور تميم تكفى اطلع انا اعرف طبيعه شغلي
تميم : انا بطل لكن ان صار لزوجتي ولا بنتي شي ما يردني عنكم الا المحكمه
الدكتوره طنشته لانها عارفه انهم اكيد حاسبين موعد الولاده غلط لانها بالتاسع
جسور : بموت اهخخ
الدكتوره : تكفين انتي هدي ولادتك جدا طبيعيه لانك بالتاسع ومويتك نزلت صح
جسور بتعب : فيه شي نزل وبعدين استد الالم ذي مويا الولاده صح
الدكتوره وهي تجاريها بالسوالف لجل تولدها بالراحه : ايوه واللحين يلا ادفعي البيبي بقد ما تقدري
اشتد الالم عند جسور وصرخت بألم ووجها حمر وبدت دفع بالبيبي
بالخارج ~
جو ملاك و سلطان و الجده هيفاء وبعدهم بدقايق العيال و رباح و ريم ، شافو تميم واقف ويدور بمحله و واضح التوتر لان صوت جسور يصدح بالقسم ، مرت ساعه و ساعتين و ثلاث واربع لحد ما سكتت جسور واختفى صوتها وفجأءه تعالت اصوات بكاء طفله ابتسم تميم بفرح ودمعت عيونه وسجد سجود شكر لربه وتوجهو له العيال حضنوه ويباركون له وبعد دقايق وهم ينتظرون خروج جسور وفِعلا خرجت الدكتوره وبعدها جسور وبحضنها شايله بنتهم وعيونه مدمعه ، مسك يدها وسلم على راسها والممرضه شالت البيبي وراحت
تميم بفرحه وعيونه مليانه دموع : جات بنتنا يا جسور جتنا اللي بتنور حياه امها و ابوها
جسور هزت راسها بدموع : جت نِيـارا بنت تميم و جسور يا تميم !
« فِيلا سُليمان بن عقاب »
مازالو ال ناجي و ال بكير موجودين بالفِيلا وينتظرون خبر بشأن جسور ولادتها
فزت أريام ونادتهم بسرعه : تعالو بسرعه فارس ارسل صوره
تجمعو البنات عليها و سلوى اللي راحت بس فضول بس وش جابت بنت ولا ولد ، صارخو البنات بفرحه من شافو جسور وبجانبها تميم وبحضن جسور طفله صغيره نايمه ولراس جسور طوب وردي ومبتسمين
ريوف بفرحه : وااي شكلهم كيووت يجننون بسم الله عليهم
ساميه : وش تتوقعون سموّها؟
أرياف : قالت بتسميها نِيـارا ف يعني اكيد سموّها نِيـارا تميم مستحيل يرفض لها طلب
ريف : بنات تكفون اذكرو الله عليهم !
نطقو البنات ب ماشاء الله وهم فرحانين لجسور جميعهم معدا « سلوى » اللي انقهرت وجلست بهدوء وهي تفكر ليش تظلم نفسها مع تميم وهو واضح انه ماراح يلتفت لها ابدا دام جسور موجوده وفوق هذا كلو صار اب بعد ما كان عندها امل انها تخيلهم ينفصلون فقررت انها تنسحب من حياه تميم و جسور وتركز بحياتها القادمه ومصيرها مع أحمد !
ام مِروان وقفت ببتسامه : مبروك ماجاكم يا ال ظافر واللحين انا استأذنكم يلا سلوى ماما
هزت راسها سلوى بهدوء وقامت ورا امها ، خرجو من اسوار فِيلا سُليمان بن عقاب مع سواقهم الخاص وبدو ال بكير يترخصون عائله ورا عائله لحد ما فضت الفِيلا من ال بكير بقو اصحاب الفِيلا و ال ناجي
مهره : وااه بنات كويس فضى المكان مرا مزحومين
مضاوي : وبتفضى اكثر لاننا رايحين قومي اللبسي عبايتك بس
مهره : احم وربي كنت امزح المهم معلينا باي بنات وقولو ل جسوري ما تشوفين شر
ريوف بضحكه : ميمي تكفين لا يسمعك تميم تراه يغاار وبشكل الله لا يوريك حتى من عمي سطام يغار
مهره : اجل بسحب دلعي وقولوها لها جسور مب جسوري
ريف : اقول ريوف ما كأنك فضحتي باخونا شوي
لفو البنات من انفتح الباب ودخلو الجده هيفاء و ريم و ملاك وبقو العيال عند جسور
هيله ببتسامه : مبروك ماجاها والله يجلعها من مواليد السعاده
الجده هيفاء : آمين ، الا وين ام ليلى و ام ساميه وبناتهم؟
هيله : رجعو بيوتهم واحنا هذانا رايحين مانبي نطول عليكم مع السلامه
الجده هيفاء : مع السلامه
فضى البيت من ال ناجي و صارو ال ظافر لحالهم ببيتهم
أفراح : بنات انا بروح زوجي برا يستناني باي
ودعوها البنات لحد سيارتها ورجعو
وهاب : اشوف انك كونتي علاقات بسرعه
أفراح : لا ابشرك زوجه خويك و زوجه اخوه طلعو صحباتي اللي انقطعت اخبارهم عني من سنتين
وهاب ببرود : كويس
أفراح : بزورها بالليل اقرب صحباتي تراها
وهاب : بنت ولا ولد؟
أفراح : بنت وسموّها نِيـارا
وهاب بفرحه : ماشاءالله تحقق حلم تميم وجاه البكّر بنت
أفراح : وزوجته كمان كانت تتمنى ان تجيها بنت وتسميها نِيـارا سحبان الله ربي استجاب دعواتهم وحقق لهم ماتمنو
« المستشفى ، جناح جسور »
جالسه على سريرها وتميم على يمينها جالس وبنتهم بحضن جسور وتميم يتأمله بفرحه ويمسك اصابعها الصغار مقارنه بحجم كفه
جسور : تمييم تكفى تجنن ما اقدر اتحمل جمالها وااي باكلها
تميم بضحكه : يا مفترسه بنتي لا ما اسمح لك تاكلينها
سطام : صار لنا ساعه جالسين وماهم معبرينا تقهون انها تصريفه وما يبونا
يزيد : ايوه والله ولا كأننا موجودين
سعود : حسيت اننا نشبه قمو نروح
فراس : صادق
فارس : انتظر اشاره منكم وربي شكلنا غلط
سعود : اجل قمو ليش جالسين للحين
وقفو العيال ورفعت راسها جسور وهي نست من وجودهم وانشغلت تلعب مع نِيـارا
جسور : وين رايحين اجلسو ما طولتو
فارس : اشغال ياوخيتي خليها مرا ثانيه
جسور : مع السلامه اجل مابي اعطلكم عن اشغالكم
تميم ناظر يزيد و سّطام وهو مستغرب انهم ما نشبو له كلعاده : مع السلامه
سّطام : لا تفرح ترانا بنرجع
تميم : اقول رح مناك بس
سّطام : ولد عمك تراني
تميم : ايه يصير خير توكل بس
جسور بضحكه : تميم خلاص سيبه
تميم : قاهرني ذا الورع هو والزفت يزيد
يزيد بصدمه : شسويت انا
جسور : يزيد روح تميم مو ناوي خير
طلع يزيد ورا العيال اللي سبقوه وابتسم تميم بهدوء
تميم : واخيرا فضى المكان لنا
جسور بتوتر : ليه؟
مارد عليها وهو يحط راسه براسها بهدوء ، قطع عليهم دخول الممرضه وابعد تميم بسرعه وانحرجت جسور من ابتسامات الممرضه الواضح انها مو عربيه ، اخذت الممرضه نِيـارا من حضن جسور وحطتها بالسرير الخاص فيها و خرجت توديها الحضانه
جسور بخجل : ياارب م تفشلني وتقول للممرضات ولا بنهاار
تميم ببتسامه : عادي اشياء دايم تصير بين متزوجين
جسور ناظرته بصدمه : تميم انقلع برا تكفى
تميم غمز لها : راجع راجع لا تخافين وباخذ الي ابي يحُب
سحبت علبه المنديل ترميها عليه وهو خرج بسرعه
هفت على نفسها باحراج كل ما تتذكر دخول الممرضه وهم بذي الوضعيه
« فِيـلا عـبدالرحمـن الٓ ناجـي »
جنـاح جهـاد و رسيل ~
تمسح ميكبها ودموعها بنفس الوقت وجهاد متضايق على حالها
جهاد : رسيل خلاص لا تبكين اكيد بيعترف فيك اذا مو اللحين بعدين
رسيل بحرقه : متى بعدين يا جهاد فهمني متى بعدين؟ شوف احفاده تزوجو و جابو عيالهم وهو للحين مخبيني مايبي يعترف فيني وش سويت له انا
جهاد بضيق : رسيل الموضوع اكبر مني و منك
رسيل : انا ماني قادره اكتم الموضوع اكثر وبيجي يوم وتشوفون والكل بيعرف اني بنت سُليمان بن عقاب
جهاد : خلاص رسيل ترا صوتك عالي بتصحين ترف
نزلت راسها تبكب بقهر وسحبها لحضنه يهديها وهو متضايق على حالها
جهاد بضيق : رسيل خلاص اهدي
« الامارات ، قصر محمد ال سعد »
الصاله الرئيسية ~
الجده ساميه شهقت بفرحه من شافت صوره تميم و جسور وبنتهم بحضن جسور : يمه بسم الله عليهم
ناظروها كلهم بأستغراب ونطق الجد محمد : شفيك؟
الجده ساميه بفرحه : جسور ولدت وجابت بنت
الجد محمد ابتسم : ماشاءالله الله ينتبها نباتا حسناً
نِيل : وش سمتها؟ ومتى جابتها؟
الجده ساميه : جابتها صباح العيد وفارس كاتب شي تحت الصوره « نِيـارا بنت تميم »
ميثاء : ماشاءالله تبارك الله جسور ذووق بأختيار الاسماء
كوثر بأنتقاد : ليتها ركزت وهي تختار الاسم مرا مو لايّق تسمي فيه بنتها والمعنى اخس
الجده هيفاء بحِده : وش فيه معنى الاسم عادي معناه النار وبعدين هي حرّه تسمي باللي تبيه في النهايه هي امها وهي ادرى وبعدين الاسم حلو مافيه شي !!
سكتت كوثر بغصه وشغلت نفسها تلعب بيدها
ميثاء بهمس ل نِيل : شوفي كوثر حزنتني قامت عليها
نِيل : تستاهل محد قال لها انقدي الاسم خير ما سوّت فيها لو سمعتها جسور بتزعل وبعدين هي وش دخلها في البنت مو هي اللي حملت و تعبت خلاص حقها !
ميثاء : مدري بس
قاطعتها نِيل بحده : كوثر تستاهل وانتهى
وقفت ام نايل بهدوء وأشرت لبنتها : نيل يلا ابوك برا ينتظر
ثّاني : عمه خلي نيل تجلس
ام نايل : لا ابوها ماراح يرضى بعيدن بنروح نعيد على اهله ما رحنا لهم
ثّاني : عمه ترا خطيبتي عادي !
ام نايل : درينا انها خطبيتك بس ابوها مابيرضى نيل امشي قدامي
تأففت نيل بصوت خافت ومشت قدام امها
ابو نايل بحده : كان نمتو احسن
ام نايل بهدوء : خذتني السوالف مع ابوي و عمتي
ابو نايل ناظر نيل من المرايه : عيال خوالك كانو جالسين معكم؟
نيل برجفه : لا بنات بس
ابو نايل : متاكده
هزت راسها بأيه ولفت تناظر الشباك بتوتر
ابو نايل : انا مشيتها لك رمضان كله بمزاجي لكن ذي المره لو دريت ان عيال خوالك جالسين بنفس المكان وانتي كاشفه يويلك يا نيل مو يعني فيك عرق اماراتي يعني عادي تطبقين عاداتهم لا انتي سعوديه وبتطبقين عاداتنا والنقاب ذا اذا انتي رايح مكان تكونين لابسته فاهمه !
هزت راسها بتمام وهي ماسكه الصيحه
« الليل ، فِيلا سُليمان بن عقاب »
الجده هيفاء بملل : بناات اخلصو علي بروح اشوف جسور
ريوف من فوق : ياجده تكفين خمس دقايق خمس بس
الجده هيفاء بغضب : خمس دقايق غيره مافيه رفعتو ضغطي تراكم
ريف بهدوء : بسم الله عليك يمه وبعدين تعرفين ريوف و أوجان يضلون سنه عبال مايتجهزون
الجده هيفاء : عارفه بس معليه انا حالفه اني لا اعدلهم بس ذولا مو وجيه تعديل
مسكت ضحكتها أوتار لانها عارفه لو ضحكت بتروح فيها معهم لان واضح ان الجده هيفاء معصبه من ريوف و أوجان ، دخل سّطام وهو مستعجل
سّطام بأستعجال : متى ناوين نحرك جالسين لي تبون عزيمه شكلكم
الجده هيفاء بغضب : تعال اضربني احسن
سّطام بقمطه : معليش يمه اقصد بنات عيال الحمير
أريام : عن الغلط ياعم سّطام
سطام بقهر : تراني بعمرك تقولين لي عم لييه كبرتيني فوق عمري
أريام ضحكت : معليش يا عم
سطام تنرفز : لا تقولين لي عم تراني بعمرك عمري 28 سنه وصل؟
الجده هيفاء : انا اقول امس خل نروح طقت كبدي منهم ندمت اني ما رحت مع ريم و ملاك
أرياف : كلنا يا جده
سطام : الحمدلله اجل بكّلم يزيد دامه هنا يوديهم معه
ريف : ريوف تعرف تسوق معليه
سطام : كويس ، صرخ لجل يسمعونه، احنا رايحين انتو اللحقونا ريوف المفتاح عند الباب سوقي انتي
ريوف من فوق : تماام
« المستشفى ، جناح جسور »
جالسه بالسرير وبحضنها نِيـارا وترضعها رضاعه طبيعيه بطلب من الدكتوره ، انهت من رضاعتها وابتسمت وهي تشوف عيون نِيـارا الرماديه الجميله
جسور : بسم الله عليك يا أمي انتي تجننين
تمغطمت نِيـارا بهدوء وهي تغمض عيونها ، توسعت ابتسامه جسور لشكلها اللطيف : بتنامين يعيني انتي ابشري
دق الباب واستغربت جسور لكنها سمحت له بالدخول وكأنت رسيل هي اللي جت
جسور وهي تحاول تتذكر مين ذي : اهلا معليش بس مين انتي؟
رسيل بهدوء : رسيل زوجه عم نوف
جسور : عرفتك تفضلي حياك
رسيل : ابوي بيجي؟
جسور هزت راسها بالنفي بحده : لا عند جدتي
مافهمت نبرتها بس سلكت : الحمدلله على السلامه انا جيت ابارك لك وامشي
جسور : وصل تقدرين تمشين
رسيل : جسور شفيك تتكلمين معي كذا ترا بالنهايه انا عمتك
جسور : مايهمني مين تكونين بالنسبه لي بس ترا انا ساكته عشان جدتي ولا انتي وامك سراقه الرجاجيل مستحيل اسكت عنكم
رسيل بحده : جسور تراك تماديتي الا امي ما اسمح لك تغلطين عليها تفهمين !
جسور : قلت الصدق ولا امك مو سراقه رجاجيل وسحرت جدي عشان تتزوجه لانها تكره جدتي
وما ان انهت كلامه طبعت رسيل كف قوي بخد جسور من القهر ودخل تميم من تهاوهت جسور بألم
تميم بغضب : من سمح لك تمدين يدك عليها ولا عشانك بنت جدي يعني عادي تمدين يدك علينا وبعدين ماقالت الا الحّق ليش تزعلين
رسيل بدموع : وش ذنبي انا طيب
تميم : أنك بنت العقربه سميرة ذا سبب يخلينا نكرهك
طلعت رسيل وهي تمسح دموعها ولف تميم على جسور وهو مقهور
تميم بقهر :ليش كنتي ساكته يوم دريتي؟
جسور بدموع : هددني ماقدرت اتكلم ولا كل ما بقول لجده يمنعني يا تميم ماقدرت اتكلم
تميم بحّده : ولو كان بلغتيني على الاقل
جسور : ماقدرت لاننا كنا مملكين وقتها وكنت اخجل منك ومن عرفت هاوشت جدي ورحت مكه عند جدتي ساميه ابعد عن المشاكل
تميم ببرود : امي و امك بالكفتيريا والبقيه شوي جايين امسحي دموعك انا رايح
خرج تميم ونزلت دموع جسور زياده وهي تمسحها بمنديل ، بكت نِيـارا وسحبت كرسيها عندها وشالتها وهي حابسه الغصه
جسور : ابوك زعل مني يا نِيـارا وابوك لا زعل يزعل وزعله شين يا نِيـارا
دخلو الجده هيفاء و سّطام و البنات ومعهم ملاك و ريم و بعدهم العيال فارس و فراس و سعود و يزيد و غياث
سطام ببتسامه : احنا جييناا
الجده هيفاء : وجع سطاموه لا تصارخ وتروع البنت !
سطام : أسف معليش
جسور : وين ريوف و أوجان
ريف : لسى يتجهزون ، هاتيه حبيبه عمتها الحلوه
جسور ببتسامه : احلا عمه والله
تجمعو البنات على ريف وهم فرحانين بـ نِيـارا ويمدحونها
ملاك بخوف من تجمعو على ريف : خلو الصغير تتنفس بتنكتم
أوتار : صدق بنات بعدو عشان تتنفس
انفتح الباب ودخلو ريوف و أوجان وهم مايدرون عن وجود العيال
ريوف ببتسامه : منورين صح !
سطام : لا مو منورين
انحرجت ريوف من شافت العيال كلهم موجودين ، ويزيد قرص سطام بقوه من دون ماينتبهون العيال
سطام بوجع : قصدي منورين معليش
أوجان ببتسامه : وين نوني الحلوه
جسور أشرت على البنات ببتسامه : شوفيها هناك مع ريف
ريوف : نوني حبيبه عمتها وحشتينيي
ريم ببتسامه : ريوف حبيبتي ترا توها ولدت وش وحشتيني
ريوف : تعبيري مجازي مام
راحت ريوف على البنات وشالتها من ريف وهي تبوسها بخدينها
جسور بخوف : ريوف شوي شوي على بنتي لا تموتينها
ريوف : لا معليك ماببصير فيها شي
دخل تميم وهو مبتسم لوجود العائله
تميم : السلام عليكم
ردو السلام وجلس عند جسور بهدوء وانتبه ل نِيـارا اللي مع ريوف تبوسها ونطق بحده : ريوف شوي شوي على بنتي
ريوف بمزح : وي شفيكم ماراح اكلها ترا
الجده هيفاء : كتمتي البنت تراك
تميم وقف وشال نِيـارا من ريوف وحطها بحضن جسور : هنا مكانها ما تتحرك كثير
ابتسمت جسور بخفه من قرب منها وجلس بجانبها على السرير وحط يدينه على كتافها
أوتار بهمس : ريف تكفين صوري وضعيتهم والله انها حلوه
ريف بنفس الهمس : معليك صورت انتي شوفي كيف مقربها منه مرا والواضح ان يده نزلت لخصرها بعد ما كانت لكتفها
أوتار : ايي انتبهت
وقف سطام واتجه لهم وهو مبتسم
سطام ببتسامه حط يده على خد نِيـارا بخفه : بسم الله عليها حبيبه خالها تشبهني
تميم : تخسى تشبه امها مافيه ذره شبه منك
سطام ناظر امه وهو يمثل الزعل : شفتي يمه حفيدك قلت لك يمه حاقد علي بس اهتميتي لي لانك تحبينه اكثر مني
الجده هيفاء : لانك تستاهل رافع ضغطه ومناشبه بزوجته
يزيد بضحكه : اللقم عطتك وحده يا نشبه
سطام بقهر : يمهه !
الجده هيفاء بحده : يزيد سيبه احسن لك
يزيد : ماسويت له شي كذاب يمه
سطام بقهر : انت الكذاب يا كذاب
يزيد : ما اكذب انا لا تظلمني يا ظالم
سطام : ما ظلمتك يا كذاب
لاتنسون النجمه ⭐
أنت تقرأ
ما للنجوم اوطان دام السما عيونك
General Fictionروايتي الثانيه ❤❤ اذا تشابهت الشخصيات بـ شخصيات حقيقيه فهي صدف لا اكثر الشخصيات خياليه ! انستقرام : 7iel_4 لا اسُتبيح النِقل او الاقتباس !!
