مواعيد ( رواية باللهجة الليبية )

البداية " الحلقة الاولى "

رواية : مواعيـد 💞
بقلم :silla

الحلقة الاولـى ..

" البداية " ..

القوانين : كل اسبوع بينزلوا حلقتين .. 📝

11:12 صباحاً ☀️

"مدرسة " الزهُور " الابتدائية للتعليم الحُر "
انفتحت نافذة احد الفصول باش تخش الشمس ب خصلاتها الذهبية و تشع في وسطه ، و حني خشينا معاها لـ وسط اكبر فصل في المدرسة كلها ..

كان تحديداً منصوب في اوسطه طاوله كبيرة و طويله ، عليها حوالي 11 كرسي أيّ 11 شخص ،،
اعضاء هيئة التدريس ، مع معلمين المدرسة ..

كان اول اجتماع ليا ، يعني اول اجتماع نُحضره في حياتي !
كان التوتر متمكن مني ، و حاسه بل متاكده ان وجهي بدي احمر..
كنت نمروح ع روحي بـ الكراسه الي كانت قدامي ..
و عيوني تدور حول الرجاله الغرباء المترئسين الطاوله والي يحدقوا فينا و يطرحوا في الاسئلة..
ضجيج في راسي و هلبا تساؤولات ، زعما نمد يدي و نفتح شيشه المية و نشرب منها !
لا لا لازم تباني جديـّة والا ح يزبطوك هبلة يا بنت و يوزعوك من هني
بس اني عطشانه 🥲 ، لكن عادي نتحمل المُرتب مليح و الخدمة مريحه ..
بس شكل المياه مُغري هلبا ، و مصقعه ..
و الي زاد شعوري بالرغبه اتجاهها ان الشمس الحراقه جايه ع وجهي و حارقتني ..

قاطع تفكيري العميق بيني و بين نفسي ، صوت وهو يقول : احم احم
شبحت ل مصدر الصوت ، وهو ضحك و قام الشيشة الي كنت نشبحلها فتحها و مدهالي ..
شبحت للناس و كانوا يتكلموا في مواضيع اكبر و اهم مني ..
ابتسمت ل أُستاذ يُوسِف و خذيتها منه و قلت بصوت هامس : شكراً
وهو رد عليا بـ نفس مستوى الصوت و قال : " دُنيا "احني مش اطفال في صف اول باش حتى امية متقدريش تشربيها لين تستأذني ديري شن تبي بس مطلعيش صوت 😂
ضحكت ب احراج و شربت من المية و داخلي بنطربق من الاحراج ..

قاطع الاستاذ يوسف الحديث و قال : طبعاً هدي الموظفه الجديده الي اضفناها السنة هدي لي مدرستنا ..

كلهم شبحولي واني حطيت شيشت المية طول و نضت ، فنص فيا أستاذ يوسف بمعنى قعمزي ، قعمزت و شبكت يديا في بعضهم و قلت بصوت يادوب طالع : اهلاً !

ضحكوا كلهم بـصوت واحد ، وجتني قرصه في يدي شبحت بحداي و لقيت الهام تضحك و تهمس : لازم تفضحينا يعني
بلعت ريقي و سكتت ، تابع استاذ يوسف كلامه و قال : طبعا هي من انشط و ادكى الموظفات الي زارو مدرستنا ، من يوم جت حوالي ٧ شهور و هي مواضبه ع مواعيدها و معندهاش تاخير او غياب و منضمه وًمخلصه لي خدمتها ..
ابتسمت واني نشبح للاستاذ يوسف بامتنان ، كأنه بكلامه امتص كل التوتر الي كان متملكني ..
نطق احدى الاعضاء و قال : باهي عرفينا ع نفسك يا بنتي ..
خديت نفس عميق و شبحتله و قلت : اسمي دُنيا خالد ، عمري 22 سنة ليا متخرجة سنة وحده من مجال ال it " البرمجه " و هدي اول خدمه نخدمها في حياتي ..
تبسم الراجل ثم قال : من الي شفته ف خدمتك و ترتيب الاوراق جداً نظيفه و مرتبه نهنيك ..
ابتسمت بفرحه و قلت : شكراً
الراجل : و طبعا لو في يوم واجهاتك مشكله و معرفتيش حلها بحداك الاستاذة إلهام حتى هي معروفة ب خدمتها الصح ، و توريك و تفهمك كل شيء ليها ٣ سنين في المدرسة هدي
ابتسمت الهام و قالت : اكيد احني ديما نتعاونوا ..