#مواعيد
سيلا
\
\
\
\
إبتهال : فهودي ع الواقع اجمل 😍
تخررط فهد ، و الصدمه واضحه ع وجها حك لحيته و قاللها بنبرة حزم : من انتي ؟
ابتهال نصدمت : ابتهال يعني منو! تستنى في وحده تانيه ؟😰
فهد : اني مش الي تدوري عليه يا مدام اني راجل متزوج ب صغاري
( و علّا صوته ) يا اوس يا ايلين
كانوا قريبين عليه و جوه يجرو ..
هي شبحتهم حست بالاحراج و معش فهمت شن صاير : فهد من هاذو شن تقول ؟
فهد : نقولك اني راجل متزوج و ب صغاري امشي دوري ع الي تبيه بعيد ..
تكنطت البنية ؛ و مشت منحرجة وهو تنهد بتعب 😮💨: واخيرا شن الحصله هادي متوقعتهاش بكل هكي الزفت
ايلين : خالو هدي من ؟ حبيبتك ؟
تلفتلها فهد و كشخ : من قايلك الكلام هدا يا فرخه
ايلين : نسمع فيهم يقولو
فهد : لا هادي واحده غالطه ، هي تعالو خلي نركبوا في لعبة تصادم السيارات بالك ننخبط ع راسي و ننسى الي صار 😵💫
عيطوا بفرحه ، وهو شبحلهم : شن قعد من العشرين
ارين طقت يده : سلامتك يا ريّس
فهد : اخخ خاسر في جراير هالبرميل 20😑
اتجهوا للعبـة السيارات ؛ ارين و ايلين ركبوا في واحده و هو و اوس ركبوا ثانيه ، و الناس كلهم يشبحوله و فاتحين فمهم كيف يلعب و منسجم و يخبط في السيارات🙃😂
فهد : الرقم يا عسل ، مخطوب ولا يراجي فيا ؟
البنت قلبت عيونها فيه و غيرت مسار سيارتها ..
فهد نفخ : الاسبوع هادا شوره ماليش في الحلو نصيب 😞
\
\
\
\
( سلّم بنت خوي ؛ سلّم الحنانه المنانه الوداده النشادّة )
كانت غالية تلحنّلها ؛ و حنين بنت خوها تحط في صحن الكيك الي جاباته ع الطاوله ، بنت طويلة و رشيقة و مقبولة الجمال .. قعمزت بجنبها وهي تضحك بخجل : يا عمتي محسستيني دايره عصبان كله طاجين باسطي
غالية : يا بنتي الفايده انك ادكرتيني و جيتي تسلمي .. بارك فيك
حنين : يا عمتي ديما ع البال لكن تعرفي الدنيا من لما تخرجت معش فضيت من حاجه لـ حاجه
غالية ( خدت طرف كيكه ) اي يا بنتي عذرك معاك .. مش عاادية البنة سلم هالديّات
حنين : صحتين و عافية😍
خش عليهم عبدالله من برّا وقف ع عتبة الباب و طلق السلام..
غالية : خش خش وليدي مافيش حد براني
عبدالله ( خش ) اوو حنين ؛ كيف حالك شن اخبارك ؟
حنين : الحمدلله بخير شن حالكم انتو ورحال ندى و الصغار ☺️
عبدالله : الحمدلله كلنا لاباس
غالية ( تشرب في الشاهي ) ندى و الصغار من امس مريتهمش بايته عند اماليها
حنين ( تصبّ في طاسة شاهي ) كويس حتى تغيّر جو من يوم نعرفها وهي فوق
عبدالله : شنو نمشي نجيبهالك يمي توا تعاونكم ف الغدي ؟
حنين ( مدتله طاسة شاهي ) لالا سلم وخي هني روحك ؛ اهو اني اليوم مع عمتي و بنغذيها من يديا خليها المراه تفرهد ع عمرها
غالية : اي وليدي زي ما قالت حنين خليها خليها
هز عبدالله براسه ؛ و خذا طاسة الشاهي من بنت خاله : صحيت
حنين : سلمك
عبدالله : توصي ع شي يمي ؟ ساهر ف الخدمة و راكب نريّح
غالية : لالا سلامتك وليدي
أنت تقرأ
مواعيد ( رواية باللهجة الليبية )
Ficción Generalباللهجة العاميّة ليبية 🇱🇾 للكاتِبـة : سـِيلا
