#مواعيد ♥️
بقلم : سيلا
36
______________
تقوى و جنى واقفات ع المقصف و يهدرزوا ..
طلّع منه أيمن و مدلهم انفاصهم و عيونه ع جنى الي كانت تتهرب منه ..
تقوى : مافيش اخبار ع نور بنت عمك؟
أيمن : الحمدلله خوها طلع من المستشفى ، وهي للامانه منندريش عليها ماريتهاش لكن اكيد تبي يومين باش تولي لـ حياتها و تجي لانه الي صار مع خوها مش قليل..
تقوى : مش قادرين نوصلوا فيها .. ماتبيش تتكلم مع حد
أيمن عيونه ع جنىٰ : كان كلمتونى ره مشيت لي حوشهم و خليتها تتكلم معاكم من تليفونى 😅
ضحكت تقوى و زبطتها تلقيحة لي جنى فقررت تنسحب : اه حقا تذكرت خليت كتابي متع الاحياء ع المقعد .. بالك غير ياخدوهولي رهوا محلول كامل😱 ( و خذت نُصها و هربت تجري ) شوييية و نرجع
جت جنى بتلحقها لكن قاطعها أيمن الي قال : جنى
تلفتتله جنى و قلبها يدق و وجهها أحمر : نعم ؟!
أيمن : علاش معش رنيتي ع رقمي ! 😅 ماه قاعد عندك
جنى بـخجل : مانقدرش ، قلت يمكن انت ماتبيش
أيمن : اي شنو الي مانبيش 😍 ( و طلّع من جيبه ورقة صغيرة و مدهالها ) هذا رقمي لو راح منك .. نبيك الليلة تشريني ، تم ؟
خذاته جنى وهي مترددّه و تشوف يمين يسار لو في حد يشبحلهم ؛ حطاته في جيب سروالها و هزت براسها : حسب الجو ، لو خوتى مهناش توا نرن 😅
ابتسم ايمن بِ فرح و هزلها حواجبه : قلبى معبي بالكلام من يومها لي توا ، ره بينفجر من الكتمان ! ( و حط ايده ع قلبه )
تحشمت جنى و مشت و خلاته وهي تضحك ؛ اتكا ع الحيط وهو يقول : اخخخ قلبي ذاب في حلاوتها ..
جت جيهته رغد وهي تزمزك : ليمونى !
نفخ ايمن و حط ايده ع رأسه : مش توا كنتي هني و طلبتي 3 بريوش ؟؟ امتى لحقتي تكمليهم
رغد ضحكت : لا مش هكي غير ريتك تهدرز مع جنى ضربني الفضول و جيت نسأل
ايمن شبحلها : و شن هالصحبة القوية الي بينا مخلياتك تحشري خشمك بكل ثقة في حياتي ؟!
رغد تضحك بإحراج : بيناتنا عيش و ملح ، من اول يوم جيت فيه انت غير شكله فيه حد حاشي روحه بينا ( و شافت لي وين جنى مقعمزة )
شبّح ايمن لوين ما هي تشوف و فهم قصدها : مافيش بيني و بينها شي هني روحك ؛ و اني قتلك و بنعاودلك الي قلته الارتباط مداير عليه خط أحمر و مش جوي ولا اني قدّه ..
رغد شبحتله و لوّت بوزها : باهي اني مش طالبة منك لا خطوبة لا عرس ! اني طالبة تبادلني شعوري بس
ايمن ضحك : رغد انتي قداش ليك تعرفيني ؟ 3 ايام !! ره هذا الي تحسي بيه كله مراهقة و ح تندمي عليه يوم غدوا .. الهي في قرايتك سلم بنتي
تكنّطت رغد و مشت و سيباته ، ضحك ايمن وقعد يمسح في الكوشة و عيونه ع جنىٰ وهي تتكلم و تضحك..
جنى تضحك : مشالها للحوش ؟؟!!
تقوى : ايه قالي وينها حتى اليوم غايبة ؟! قلتله ايه قالي مالا ماخلتليش خيار و خدي روحه و مشالها
جنى : وووه كان ما يلقا خوها سفيان في الحوش !
تقوى : وووك متفاولّيش ، ضحا بروحه ع خاطر يطمنّا عليها اخخ رومانسي هالمنذر ..
تنهدت جنى و ساوت وشاحها : ربي يرزقنا ..
تقوى تشبح لي ايمن و تضحك : شكله عن قريب بيرزقك
جنى : يهبل يا تقوى يهبل قلبي ذاب فيه ، لكن خايفة 🥲
تقوى : من شني خايفة يا مهبوله ؟ جربي الشعور حتى مرة في حياتك
جنى : تعرفي خوتي و جوهم ، هوا التليفون و مدايراته بالدرقة عليهم كان لا قدّر الله يشدوني يقتلوني في مكانى
تقوى : ديري بالك هلبا و خلي ديما جنان اختك تعسّ عليك ؛ و تعرّفي عليه و شوفي جوّه باش يفطرنا بلوشي😂😍
//////////////////////////
هاجـر : اني بناخد التشيدّر
نجلاء : هاجر متصكريش راسك ، المودزريلا تسيح أكثر و ذوب ذوبان في الفم
هاجر ( شادة الجبنة و تنفخ ) منحبهاش و مناكلش فيها !!
نجلاء فنصت و عضت ع فمها : فيه من يتشرط بين انواع الجبن ؟ ماه كله واحد ! تزعبين اسمه هذا
خشت بينهم مريم وهي تفنص : طيح سعدكم ره قاعدات في وسط محل مش في الحوش .. خوذيهم الزوز و انهي النقاش
ضحكت هاجر بإنتصار و خذتهم الزوز ؛ جابت رحمة في ايدها زوز باكوات عصير و همست لـ نجلاء : هذا رابع محل نخشوله و خوك لا خش ورانا ولا عبرني حتااا ب نظرة في السيارة 😢
نجلاء : وانتي شن قاعده ديري هني ؟؟ استغلي الوضع و اركبي السيارة ع اساس دختي و تمهتكي عليه
رحمة تفكّر : قولك هكي ؟
نجلاء دفتها بالشويّة : ايه بري شوفي شغلك واني نحاول نعطلهم علي قد ما نقدر
