مواعيد ( رواية باللهجة الليبية )

الحلقة الرابـعة عشر

#مواعيد ✨
بقلمي ..
/
/
/
إيهاب : عندك علم انه بتموتي وانتي عزوزه ؟
انا :استغفرالله كيف بيكون عندي علم
ايهاب : ههههه يا فرخة طلع دمك خفيف ، قصدي توا كنت نفكر فيك و بنفوت ع حوشكم
انحرجت و فنصت فيه عيوني : علاش شن فيه !
ايهاب : كنت نبي ناخذ رقمك من سند
انا : وعلاش ؟
ايهاب : نبي نتشكرك لانه لولاك انتِ ره طربقت اني و السياره
انا ابتسمت بإمتنان : ولو مش بيناتنا
ايهاب " حك لحيته " تعطيني رقمك ؟
انا استغربت : اوكي بس ليش ؟
ايهاب : دنيا تستعبطي انتي ؟ مه بعد شهور بنعيشوا في حوش واحد قصدي نخليه عندي للطوارئ
انا : تمام هات نسجلك
مدلي ايهاب التليفون ، واني كتبت رقمي بتردد كبير ؛ و سجلت روحي Duno
خداه ايهاب مني وهو عاقد حواجبه : لالا بنغيره توا الولاد يشدوه اعليا ساليطه
اني " تكيت ع الحيط " شن بديره ؟
ايهاب : دنو ! اممم دونات ارجل ههههه😂
اني كشرت : بارد راك

سجلني ايهاب دونات فعلاً و شفشفلي وشاحي : وين ماشيه امالا ؟
اني " نواسي في الوشاح " لي ندى بنرفعوها معانا
ايهاب : من جايبك
اني : سفيان و سند
ايهاب : اووو سفيان اهني ماسمعتش
اني : ايه روح اليوم
ايهاب : خلي نمشي نشبحه..

و تجاوزني و نزل لوطه ، كملت اني ركوب الدروج و نخمم زعما شن يبي فيا ؟
دقيت ع الباب و طلعتلي ندى موتيه روحها : تعالي قيمي يقين راقده
خشيت وراها : شكلك قاعده ع الباب من بكري 😂
ندى : اسكتي ساكت فارحه فرحه عارمه ليا سنين ما بتت عندكم

قمت يقين من ع الصالون و بستها : وينه مطيوح السعد ؟
ندى : طالع مشية بلا رجعة يا رب
انا : خاطري نعرف سفيان شن قاله
ندى : مش مهم المهم ربّاه مكلمنيش بكل اليوم.. ( و علّت صوتها )يعقوب ماما هيا
طلع يعقوب من الدار وهو ناعس ، طلعنا من حوشها و سكرت الباب وراها و نزلنا ..
لقينا ايهاب واقف عليهم ف سيارة ، ركبنا من تالي ..

ايهاب : هي مالا توا مع السلامه و نتلاقوا مره تانيه
سفيان : ان شاء الله و سلملي ع عمي و خالتي توا اكيد راقدين منبيش نخلعهم
ايهاب هز راسه : يوصل
و غمز ليا بدون ما حد ينتبه ، لوحتله بيدي ✋🏻
تباعد عن السياره و سفيان انطلق : راجلك وين ؟
ندى :بايت برا اليوم
سفيان : مقالكش لا لما روحت ؟
ندى : لالا مافتحش فمه بكل
ابتسم سفيان ع جنب و كمل سواقته ..
و سند كان ذايب ع الكرسي ، و مغمض عيونه ..
واني في حضني يقين ، و راسي عند الموقف الي صارلي مع الاستاذ 🙂
يا حليلي كيف بنقابله غدوا وهو شافني بالحالة هديكا ؟
لطيف ، جنتل ، واضح انه رومانسي سعدود مرته
بس لو بتسألوني هل في مشاعر تحركت في قلبي ؛ بنقوللكم لا
ما حسيتش بشيء خارق للعادة !
ت هو ايهاب الي خطيبي و منحسلاش بشيء ! ههههه شكلي تبلدت
\
\
\
اما ايهاب ف كان متكي راسه ع الحيط و يدخن ..
و يمر عليه شريط حياته قبل سنتين ..

كان خاش للعمارة ب باقة ورد اكبـر من راسه ، و كان الورد الجوري زي ما تحب هي 🌹..
توجه ل شقة عمه ، واسا روحه و طق الباب..
عطل الباب باش ينفتح لكن في الاخير فتح سفيان و وجها اسود زي الفحم..
قاله تفضل ، خش وراه ايهاب و لقي الكل متجمع في الصالة و متكدر !
مالقاش بين الحضور معشوقته دارين ، ف قعد يسال و يعاود ..
و كانت الاجابه من ليلى : هربت دارين يا ايهاب هرربت مع ولييد هربت و خلتلنا الرساله هادي