مواعيد ( رواية باللهجة الليبية )

الحلقة السابعة و العشرون

روايـة : مواعيـد 🕟
لـ سيـلا 💓

ان شاء الله تنال اعجابكم 🌷
//////////////////////
سارّة شهقت : شننوووو ؟
مها " ترسم في عينها " سكري فمك و واطي صوتك بتفضحيني
سارة : شن الفيلم الهندي هذا ، تخيلي مجاش وراكم الولد ره مشيتوا فيها
مها : باهي شن بنديرو نخلوها تتفضح يعني ؟
سارة : مش هكي لكن ع الاقل كنتي حكيتي ل نضال ولا واحد من خوت دنيا دار حل !
مها : الاء مابتش و خافت من الفضايح ؛ قلنا نحلوها ما بيناتنا
سارة " قعمزت ع السرير مقابّله اختها " لا معاه حق حكيم انتِ خرجتي عن السيطرة ، و بعد الرعشه هادي كلها عندك خلوق تتزيني و تتمكيجي ؟؟
ضحكت مها و شبحتلها : مالا نمشي للولد تقول طالعه من القبر ؟
سارّة : و هذا الثاني شن قصته
حطت مها الماسكرا ، و قامت القلم ترسم في فمها : هذا يا حنه واحد شافني في الكافي و من يومها يجري وراي ، و الصراحه مافيهوش غلطه جمال و مبادئ 💸
سارة : و نيته زواج ؟ ولا زي سند طياح سعد وخلاص
مها تأفأفت : بالله معش تجبدولي سيرته سند ، غلطة و مشت في طريقها
سارة : ايه هاذي اختي الي نعرفها ، تحسابيني اني امجد واخذاته لانه نحبه وخلاص ؟ راه الحب يجي مع اي شخص لكن التبحبيح و الهني عند اشخاص معينين بس..
مـهّا ( تنهدت وهي ادّكن في روجها ) شن خذت منه الحب ماما الله يرحمها ؟ ، ماه هربت مع بوك و ضحت ب عيلتها ، وهو من ثاني عام بعد ما ماتت مشي تزوج .. هاذو هما التريس زي بعض
سارة : مادكنيش هلبا راه يقول عليك فانص
مها ضحكت و ناضت : لالا هذا جوه فري ؛ وهو ب عضمة لسانه قالي مرتي نبيها حلوة و تهتم بروحها وماعنديش شروط ثانيه..
سارة ( وقفت ) خلي اني نختارلك شن تلبسي ، سادك من الشعشوعي توا نطلعلك حاجه حلوه و نازكه و بسيطة ..
ضحكت مها و قامت تليفونها : به ، مالا اني خلي نتصل بـ هدير
سارة ( فتحت الدولاب ) تمام

اتصلت عليها ؛ و في غضون دقايق ردت وصوتها ناعس : الو مها
مها : راقده قصدك ؟
هدير : ايه نضت ع تشرينتك
مها : نبيك ضروري كان مش ضروري ره قتلك ولّي ارقدي 😂
هدير ضحكت : تكلمي شن فيه ؟
مها : سيارتي مافيهاش بنزينه و عندي موعد ضروري ونبيك توصليني
هدير : موعد مع مني ؟
مها بضحكة : مجووود 🙈 عازمني
هدير ضحكت بخبّث : كويس هلبا ؛ نغيّر و جاياتك
مها ضحكت : خيرك متحمسه اكثر مني ؟
هدير : فارحه بيك مضيعتيش الفرصة كالعادّة ..
مها : لالا شغلت عقلي المرة هادي ..
هدير : به وين عازمك ؟
مها : في مول**** الي في ***
هدير : نص ساعة و نكون عندك وتي روحك
مها : سلّمها صاحبتي الفزاعة 😘 ان شاء الله يارب نصبيلك ف الأفراح
//////////////////////////
يشبَح للصور ؛ و فاتح عيونه بـِ صدمة طلع من الاستوديو طول و قام آدم من سوريته بعصبيّة : شن يديررروو عندك الصور هذو شن يديرو عندك
ادم : هيا بعتتهملي ..
دفّه فهد ع الحيط بقوة و عيّط بعلو حسّه : كذااااااب
آدم : اني وياها كنا في علاقة و أي حبيبين بينهم صور
فهد ( جبّد المسدس من جيب سرواله و سحبّه ) بتحكي الحقيقة ولا نرزيك في عمرك !
آدم بإصرار : هاذي الحقيقه
فهد : تعرف وربي يا عيل يا امسخ ، توا بنخش ع محادثتك انت وياها بنلقا مش هي الي باعتتهم و دييني و ما نعبد المسدس بنفرغه في راسك
خاف آدم و عيط بفزع : لاا استنى ..
ضحك فهد و حطّ مسدسه في جيبه ؛ وتربع ع الارض : هي نسمع فيك
~
~
~
~
~
سند : الحساب 75 دينار
المرأة شبحتله و شقلّبت عيونها : شن خذيت اني دجاجة و زوز باكوات حليب
سند مبّتسم بالسيف : هكي الأسعار شن نديرو يا مدام الله غالب
نفخت المراة ، و حطت الفلوس و خذت شكارتها و طلعت ..
خذي سند الفلوس و حطهم في الصندوق نفخ و قعمز ع الكرسي : الزف الخدمه المعفنه اهيا الي يسوى و الي مايسواش يلّاغي فيك تقول اني مركبّه الدولار ..