مواعيد ( رواية باللهجة الليبية )

الحلقة الواحدة و الاربعون

مواعيد
للكاتبة / سيلا 💕
__________
نشوف لـ اختي بصدمة و مش مصدقة عيوني ، خدها متورم و ازرق..
و عينها منفوخه و حمرا ، و ايدها ملفوفة ب فاشة ..
و دموعها يتقاطروا ع خدودها !!

شهقت و قربت منها : شن صااار خيرها ؟؟ من دار فيك هكي
إيهاب : نخشوا لداخل و نحكوا.. ولا بننشروا عارنا للجيران!!
وئام : ندى تعبانه هلبا و لازم ترتاح ، خششيها لداخل واحني نفهموك..

خشينا لداخل ؛ و طول ندى خشت لدار نومنا من غير ما تتكلم و سكرت عليها لباب..
قعدت ع اعصابي و طلعت ل ايهاب و وئام في الصالة..

انا : شن صارر خيرها اختي انطقوااا!!
بلعت وئام ريقها و شافت لـ إيهاب ، سكت ايهاب و شبحلي..
انا : تكلموووو مطيحوليش قلبي!!!!! البنت من ضاربها و داير فيها هدا كله و وين صغارها وييين!!

خدي ايهاب نفس عميق و قال : تعاركت مع عبدالله..
وئام ( غمضت عيونها )ملاخير عبدالله طلع متزوج عليها

فتحت عيوني بصدمة ، و من قوة الصدمة لين طحت ع الصالون: ك ك كيف!
ناض ايهاب من مكانه و اتجهلي : اهدي ما تزيديهاش حتى انتِ
وئام وقفت وهي تلكلك: الي صار انه المراه آلي متزوجها جت و هددتها في نص حوشها .. ف ندى حكت الي صار كله قدام العيله و عبدالله تكنطا منها و صار الي صار 😣
إيهاب : مضربهاش ب ايده لكن دفها ع الطاوله ف ايدها انتردت و وجها تورم.. و كانت لحظة غضب م..

قاطعاته و شبحتله واني نقول بعياط : اطلع برا حوشنا اطلللععع لبرا اطلععع
انصدم إيهاب و فنص عيونه : و شن دخلي اني!!
وقفت قدامه و دفيته : كله منكم طول عمركم لاحقينه و قاعدين لعنه و غمه ع قلوووبنا اطلعوووو من حياتنا اطلعوووو و اقسم بالله خوووك الحقير كان مندمتاش ع الي داره ما اسميش دنياا اطلععععع

جتني وئام تجري و شدتني من يديا تهدي فيا : معليش ايهاب اطلع توا اني نهديها و نكلم منيب يروح بيا..
أنا : أولها زواجها من عبدالله كله غلطط ف غلط زي زواجي منكك كلهم غلطات حياتنا الي مش عارفين نوقفوووهم خسرنا اختي دارين و اعتبرناها ميبيته و كله منكم كللله منكم الله يلعنكممم

سكّت إيهاب و خلاني نعيط في الصالة ؛ و فتح باب الشقة و طلع و كلامي يتردد في وذنه ..

أنا ( نبكي و نضرب ع رجليا ) ااااه قوليلي بس شن ندير يا وئام ناار في قلبي نااار .. مش قادره ندير شي خوي و عزوتي معش يقدر يذير شي قعد مقعمز في تركينه ولا قادر يتحرك ولا يذافع علينا زي قبل.. اااه ياوئام حالتها تقطع القلب الله لا تربحه الكلب الله لا تسامحه الله لا توجهله خييررالله ينتقم منه..
نزلوا دموع وئام معاي و تشدلي في ايديا : دنيا خلاص مش كويس الي اديري فيه .. حسيبه ربي تحسبي فيه و شوفي الايام كيف توريه و يولي عليه الي داره
انا : كسرها يا وئام كسررها وخيتي كانت زي الوريده الله لا تسامحه ذبلها مشفتيش نضراتها تواا مشفتيش دموعها و وجهها الاسود💔 اااه يا قهرتي فيك يا بابا اااه يا غيبتك علينا ياريتني متت وراك ولا ريت هالايام اااه
تتهدت وئام و ضمتني ليها : خلاص حبيبتي ربي حسيبهم
انا ( نبكي و نشهق ) وينك يا سفيان وينك يا حبيبي وينك
///////////////////////////
اما سفيان فكان في غرفته ، مدرق روحه ب البطانية
و فاتح ع صور حياة و يتفرج عليهم .. و الدموع معبيات عيونه..
خدي نفس عميق و بدي يمسح فيهم بالوحدة..