مواعيد ( رواية باللهجة الليبية )

الحلقة السابعة

#مواعيد 💌
الحلقة 7
بقلم " سيلا "
/
/
/
/
/
جنى : نور الابلة منبهتنا الف مرة معش نلبسوا حدايد شن هدا الي في يدك
مدت نور يدها وهي تواسي في حديدتها : حلوه صح ؟ هدية من خوي سفيان
جنى " ضربتها ع ايدها " اني ف شن وهي في شن نقولك الابلة بتشدك تقتلك ب الطوبو وانتي فارحة ب الحديدة
تقوى : جنى انتي تنصحي في من ، نور تعودت ع التهزيبات خلاص معش لقولها حل
جنى : اي وانتي الصادقه ما يقدر عليها كان الي خالقها
تقوى " ضحكت " و مُنذر طبعاً ..
نور : بالله اسكتي اسكتي انتي وياها و اوقفوا ف مكاناتكم التفتيش بدي
جنى : الله و تقول فيها ب كل ثقه واثقه انها ح تخش بكامل برستيجها..
سكتت نور و تلفتت لقدام وهي تضحك..
و تقوى و جنى وقفوا كويس وراها ، و كان عباره ع طابور طويل زي اي طابور مرّ علينا في حياتنا المدرسية 💓

اقتربت منهم ابلة حنان ، و بدت تطلب منهم يمدوا يديهم..
وصلت في نور ، و قامت حاجبها وهي تلعب ب العصا : نور شن قتلك اخر مره ع الاكسسوارات ؟
نور : باهي يا ابلة قتلك اعطيني سبب منطقي ل منعهم نحيها لكن انتي معطيتينيش
حنان " عقدت حواجبها " حني لازم نستأذنوا من حضرت جنابك باش نديرو قوانين المدرسة ؟ 😠
نور : لا طبعا لا مش للدرجة هدي يا ابلة لكن ع الاقل حطوا قوانين منطقية 🌚
حنان نفخت و ضربت ب عصاها ع الارض : تحركي اوقفي برا الطابور يلااا .. قليلة ادب

نفخت نور ، و قامت شنطتها للي كانت ع الارض و توجهت للحيط و وقفت عليه ..
و صاحباتها يفنصوا فيها و يتحلفوا .. قابّلها طابور ولاد صفها و من بينهم زميلها و صديقها " منذر " .. يلوحلها ب ايده و يضحك و ياشر ب حركات تعني ان لاحقك..
ضحكت نور و قامتله حواجبها بمعنى ورينا شطارتك..
و فعلا من دون سابق انذار تحرك منذر من الطابور .. و طول ابلة حنان لمحاته و كشخت : انتتت مفروض ديما مكانك بحداها .. استغفرالله عمره ما فات عليا زوز ب قلة الادب هادي 😠
" و ضرباته ب العصا ع قفاه "
تحرك منذر لجانب نور وهو يقرقر و يضحك..

نور : عندك علم الحصة الاولى تاريخ😫
منذر : ثقالت دم ع صبح ، شن رايك منخشوش ؟
نور : لا الابلة تعرف اختي ح تحكيلها طول و اختي مثبته عليا
منذر " ضحك و طلع من جيبه حاجه و قال " افتحي يدك
فتحت نور يدها و قالت باستغراب : شنو
حطلها في يدها كمشت سامينسا و ضحك : تمشّي بيها الوقت بس ردي بالك تشدددك ..
نور : متخافش طمن بالك خبرة اني..

قاطع حديثهم ابلة " فايزة " الي نزلت من دروج للساحه وهي مكتفع يديها و تشبح ل نور و منذر : شنو كل يوم هكي يا نور ؟
نور : والله المره هدي مدرت شي كله ع خاطر
شقفت حديده🥺
فايزة : هيهيهي كان منعرفش طولت لسانك بنصدق.. بس يلا الله غالب هذا حال الي معنداش ام تربي..

" و شبحتلها ع جنب و توجهت للطابور تساعد حنان في التمارين الصباحيّة"
و خلت نور تحت آثر كلمتها .. انجرحت و الدموع تجمعوا في عيونها
شبحت ل منذر و لقاته يشبحلها و يحاول يخفف..
و لانها متحبش تشبح نظرة الشفقه من عيون حد .. تباعدت عليه و مشت للحيط الي مقابل وهي تشبح للشمس و عيونها معبيات بالعبّرة..
وهو واقف يشبحلها و قلبه عاصرّه عليها و لاكن لخبّرته ب شخصية نور الي ليه 4 سنين صداقه معاها .. يعرف جيداً انها متحبش حد يربت ع كتفها .. فـ خلاها براحتها و شدّ الحيط و سكت ..