OCEAN (သမုဒ္ဒရာပိုင်တဲ့လခြမ်းငယ်) (Complete)

အပိုင်း ၅၁

ဧည့်ခန်းကျယ်ကြီးထဲလူစုံနေပေမယ့် စကားသံတွေတော့တိတ်ဆိတ်နေလေသည်။တစ်စက္ကန့်ကုန်သွားလေ စိတ်လှုပ်ရှားမှုကပိုတိုးလာလေ။စိုးရိမ်စိတ်ကိုယ်စီနှင့်မို့ ဘယ်သူမှလည်းစကားမပြောချင်ကြ။

နံရံကပ်နာရီရဲ့တစ်ချက်ချက်စက်သံတွေကြား နှလုံးခုန်သံတွေပါကပ်ညိပါသွားပုံရသည်။နေ့လည်စာတောင်ဖြောင့်အောင်မစားနိုင်ကြဘဲ ဧည့်ခန်းထဲမှာသာတောင်လျှောက်မြောက်လျှောက်လုပ်ပြီးခုံမှာဝင်ထိုင်ဖြစ်ကြတာ။

သမုဒ္ဒရာကငယ်ငယ့်ကိုသိုင်းဖက်ထားပြီး စိတ်သက်သာရာရစေရန် လက်လေးကိုဖွဖွဆုပ်ထားပေးလေသည်။ဘယ်လိုစကားတွေဆိုရမှန်းမသိအောင်သူကိုယ်တိုင်လည်းစိတ်နှင့်လူသိပ်မကပ်ချင်။

Geoနှင့်တိမ်ငွေ့ကတော့ဘေးချင်းကပ်ထိုင်နေကာ မျက်မှောင်တွေတွန့်ပြီးဘာကိုလေးလေးနက်နက်တွေးနေကြသည်မသိ။တွဲယှက်ထားတဲ့လက်ချောင်းထိပ်တွေဆီမှ အအေးဓာတ်ကGeoလက်မှဖြစ်ပြီး နွေးထွေးတဲ့တိမ်ငွေ့လက်တွေဆီမှအပူကူးယူနေရသည်။

ကျောက်စက်ကပင်ထနောင်းညိုလက်ကိုဇွတ်ချိတ်ထားပြီး နောင်းညိုကတော့သတိမမူမိသလိုရှေ့ကပန်းအိုးကိုကြည့်ရင်းအတွေးလွင့်နေလေသည်။

စက်ရိပ်မှာသာခေါက်တုံ့ခေါက်ပြန်လျှောက်ရင်း ခြေမကိုင်မိလက်မကိုင်မိ။အပူပေးထားတဲ့သံပြားပေါ်ကပုရွက်ဆိတ်လိုမျိုး နှလုံးသားကဆောက်တည်ရာမရ၍ လူကပါအသိစိတ်တွေလမ်းပျောက်ချင်နေသလိုပင်။

အစောနလေးတင် Horizonကဖုန်းဆက်လာသည်။လေဆိပ်ကနေထွက်လာနေပါပြီတဲ့။မနက်စောစောပို့လိုက်တဲ့Mailကြောင့်သမုဒ္ဒရာတစ်ယောက် shockဖြစ်သွားသလို အားလုံးကိုလာခိုင်းကာအကြောင်းစုံရှင်းပြဖြစ်သည်။

Horizonပို့လာတဲ့အကြောင်းအရာတွေကိုမြင်ပြီး အားလုံးပါးစပ်အဟောင်းသား။mailကမနေ့ညကပို့ထားတာဖြစ်ပြီး မနက်ကမှဖွင့်ကြည့်မိတာမို့ ဖုန်းဆက်မေးလို့မရတော့။ဟိုကလေယာဉ်ပေါ်ရောက်နေပြီ။

အကြောင်းအရာတွေကရှင်းလင်းနေသလို ဟိုဘက်ကပြောတဲ့အသံဖိုင်ပါနားထောင်လိုက်ရတာမို့ သူတို့ဆွံ့အကုန်သည်။Horizonကသေချာမှသူတို့ကိုအကြောင်းကြားလာတာ။သူ့သားလေးကိုပါအပါခေါ်လာခဲ့ပြီးမှအဖြစ်မှန်တွေကိုဖွင့်ပြောလာတာ။