"အိပ်အုံးနော် အစောကြီးရှိသေးတယ်ငယ်ရဲ့"
သူအိပ်ယာထတော့ နိုးလာသူကသူပါထဖို့ပြင်သည်။အခန်းတွင်းအနွေးဓာတ်ကြောင့်အိပ်ချင်နေသော်လည်း သူထတော့ယောင်ပြီးလိုက်ထချင်နေတာ။
စောင်ကိုလည်ပင်းထိခြုံပေးပြီး နှဖူးပြင်ထက်အနမ်းတစ်ချက်ဖိကပ်လိုက်သည်။ထို့နောက်နှာခေါင်းလေး၊ပါးပြင်လေးနှစ်ဖက်နှင့် နှုတ်ခမ်းလေးဆီအရောက်ခပ်ဖွဖွစုပ်ယူလိုက်သေးသည်။
အိပ်ယာနိုးတာနှင့်လုပ်မိတဲ့ပထမဦးဆုံးအလုပ်ဟာ အနမ်းပန်းတွေပျိုးခြင်းပါပဲ။အိမ်ထောင်သက်တမ်းတစ်လအတွင်း သူ့ရဲ့အကျင့်လေးတစ်ခုဆိုလည်းမမှား။
တစ်နေ့ထက်တစ်နေ့တိုးလာသည့်မေတ္တာတွေဟာ သမုဒ္ဒရာရေတွေလိုပါပဲ။ကုန်းမြေထုကိုတိုက်စားပြီး ကမ္ဘာမြေကြီးကိုအနိုင်ပိုင်းကာနယ်ချဲ့လာနေသလိုမျိုး တိုးပွားလာတာတရိပ်ရိပ်။
နေ့သစ်တိုင်းမှာ အချစ်သစ်တစ်မျိုးပိုလာသည်။မနေ့ကအချစ်ထက်ဒီနေ့ပိုချစ်လာတာ ကိုယ်တိုင်သာသိသည်။အဆုံးမဲ့ချစ်မိနေပြီလို့တွေးတုန်း ပိုတိုးလို့ချစ်နိုင်မှန်းတွေ့ရှိတော့မှ အချစ်တွေဟာအဆုံးမဲ့ကြောင်း သူလက်ခံရတော့သည်။
တစ်လအတွင်းတောင် ဒီလောက်ဆိုရင် တစ်သက်တာအတွက်ဆိုရင်ရော။
မျက်နှာသစ်ကာ ခြံတစ်ပတ်ပြေးမိတော့ ပန်းရနံ့တွေကသင်းသင်းပျံ့ပျံ့။ပိုင်ဆိုင်မှုလေးကို နေ့တိုင်းနမ်းရှိုက်ခွင့်ရနေတာမို့ ဒီရနံံ့တွေကသူ့ကိုမဆွဲဆောင်နိုင်တော့။
ကောင်းကင်ကြီးကိုမော့ကြည့်မိတော့ နေကတဖြည်းဖြည်းတက်လာပြီး နေရောင်ကတဖြည်းဖြည်းတောက်လာလေသည်။နုနယ်လှသည့်မြူမှုန်တစ်ချို့က နေရောင်၏ချောင်းကြည့်မှုတွင် ရှက်ရွံ့စွာပုန်းခိုကြလေရာ ပတ်ဝန်းကျင်တစ်ခွင်လုံးကန့်လန့်ကာနောက်မှထွက်လာရတော့တာ။
အိမ်အပေါ်ထပ်ပြန်တက်ကာ အိပ်နေသူမနိုးစေရန်ခြေသံဖွပြီး ရေချိုးခန်းဝင်ရသည်။ဒီနေ့အလုပ်ကိုသွားရမှာမို့ Formal Suitအညိုရောင်ကိုသာထုတ်ထားလိုက်သည်။အဝတ်တွေမလဲသေးတာက ပိုင်ဆိုင်မှုလေးမထသေးလို့။
YOU ARE READING
OCEAN (သမုဒ္ဒရာပိုင်တဲ့လခြမ်းငယ်) (Complete)
Paranormalမင်းကိုပိုင်ဆိုင်ခွင့်နဲ့ပတ်သပ်လာရင် ကံကြမ္မာကိုတောင်စိန်ခေါ်ပစ်မယ်ငယ်ငယ် မင္းကိုပိုင္ဆိုင္ခြင့္နဲ႕ပတ္သပ္လာရင္ ကံၾကမၼာကိုေတာင္စိန္ေခၚပစ္မယ္ငယ္ငယ္
