رياض الباهيات

رياض الباهيات 🤍 الجزء 17

(خرج السلطان من حمامو ولبس عليه وهبط لطابلة الفطور للي كانو كيتسناوه فيها مع جلس بانت ليه جورية جاية)
السلطان: قولي لهاديك ترجع لجناحها وديو ليها ماكلتها ومن اليوم ما تخرج من جناحها حتى تولد ويكون خير
فخيتة: علاش أوليدي شدارت ليك مسيكينة
زهور: حرام عليك أخويا دابا تسمعك ..
السلطان:(ضرب الطابلة بيديه وهضر معصب حتى قفز كلشي ومنهم جورية لي رجعات لجناحها وهي مفهماش لاش دار السلطان هاكا) الكلام لي نقول مايتعاودش
فخيتة: كنتي توصي عليها و الحاجة المخيرة تأمر تمشي ليها وكتلح عليا نخرجها من الجناح حتى تبدلتي ...قول شنو كاين واش دارت شي حاجة معجباتكش
السلطان: بصحة فطوركم (ناض وخلاهم محتارين او وحدة كتشوف فلخرا).
زهور: بيني وبينك ديك خيتي النهار اللول محملتهاش ومدخلاتش لخاطري أمي غا ساكتة يعلم الله علاياش مطوية
فخيتة: بديتي تاني ..كوني تحشمي البنت كرشها لفمها ويتيمة وهازة دقة راجلها و دقة ناسها لي مخلاو ليها جد ولا طاسيلة وبغيتيها تجمع و ضحك ..ياك للي فيهاش شاداه
زهور: هاي هاي جاتك النفس عليها ...وا نوضي دابا سوليها شدايرا حتى قمعها السلطان هاد القمعة...أنا عارفاك شادة ليها الخاطر حيت كان علي هو عقلك ..وكتشمي فيها ريحتو
فخيتة:(ناضت وهي كتقول) لا حول ولا قوة الا بالله...ضرك راسك ...
(قصدات السلطانة جناح جورية.. لقاتها كتمسح دموعها  وهي تجلس حداها كطبطب على راسها)
فخيتة:..متبكيش ونتي واحلة فروحك  أبنيتي ...قولي ليا واش خرجتي بلا لتام وشافك شي حد
(حركات راسها بلا )...هي لقاك مولاي داخلة للجردة الخاصة ؟
جورية: مخرجتش من جناحي  بمرة ولثامي عمرو خطاني السلطان غير تقلت عليه وبغاني نخوي القصر ..ضيافة عزيز النفس راها مكتفوتش تلتيّام و أنا تبنّدْت ليكم هنا ..نخدم بشفار عياني و ما بقى فبداني ولا نتقّل على حد من جيراني ..بقا غير لقالها ليا مول الدار لي أنا فيها
فخيتة: متقوليش هاد الهضرة ...السلطان قلبو كبير ..وهو بنفسو كان كيوصي ويعاود عليك ..ضروري تكون شي حاجة لي خلاتو يتصرف هاكا...رتاحي دابا  مديريش فبالك  وأنا غانقلقل سوقو
**********
قدام جناح مولاي عثمان كانت واقفة جورية قدام الباب كتسناه يأدن ليها باش تدخل حيت دخلها الوسواس لراسها وقالت يكما عرف حقيقتها
جورية: مولاي سمح ليا لقلقت راحتك بغيت نعرف شنو الذنب لي درت نستاهل عليه غضبكم مني أمولاي ..مكنتش غادا نجي بالحق نفسي مطاوعاتنيش
(السلطان كان كيختم شي وراق ومامسوقش ليها
جورية: إلا زعجكم الوجود ديالي أنا غانقلب فين نسكن أمولاي المهم عندي راحتكم
السلطان: (جاوبها ببورودة ) عندك باش
جورية: من الورث لي خلا ليا المرحوم نمشي نشري شي دويرة على قد الحال نعيش فيها أنا او ولدي
السلطان: هه الورث ؟ اينا ورث
جورية: كيفاش أمولاي
السلطان: كاع لي كان كيملك راجلك رجع للبلاد حيت الفلوس لي دار منها داكشي سرقها من بيت المال يعني لا نتي لا غيرك عندكم شي حاجة دابا ..داكشي لاش سيري تكمشي فجناحك حتى تولدي ويكون خير
جورية: و أنا أمولاي شنو ذنبي تعاملني بهاد الجفا ..أنا معالما على والو ...أنا زوجوني ليه مكنعرفو حتى شكون واش وزير ولا طلاب ولوكان تعرف لي دار فيا تشفق على حالي وترفق بيه ..أنا غا يتيمة أمولاي معندي فين نعطي بالراس وليني قادرة نعري على دراعي ونجيبها من فم السبع باش نربي ولدي فالحلال وما نصبرش نعيش فالدل
السلطان: دابا عيشتك فقصري ولات دل ...عدرتك هاد المرة على صلابة لسانك جناحك ولمعجبك حال باب القصر وسع من كتافك نتي لي بقيتي ناقصاني
(خرجات جورية ودموعها فطرف عينيها مشات لجناحها وبكات حتى شبعات وهي تهز رزمة دارت فيها شي حويجات وشي فليسات وتسنات حتى بان ليها الحس مقطوع مع وقت القيالة مشات هزات العودة وخرجات من القصر بقات غادا وهي معارفاش فين ،قصدات الواد وتمت طالقة رجليها جنبو وحاضية العيالات دايرين خيم من ليزور و كيغربلو الشعير، شوية بان ليها واحد الراجل  كبير فالسن مهموم، جالس بعيييد مشات عندو )